ফেচবুকত মুখ্যমন্ত্ৰীক হত্যাৰ ভাবুকি দিয়া যুৱকৰ বিৰুদ্ধে এজাহাৰ

ASSAM TIMES POST
গুৱাহাটীঃ মুখ্যমন্ত্ৰী সৰ্বানন্দ সোণোৱালক সামাজিক মাধ্যমযোগে হত্যাৰ ভাবুকি দিয়া এজন যুৱকৰ বিৰুদ্ধে বৃহস্পতিবাৰে গুৱাহাটীৰ দিছপুৰ থানাত এজাহাৰ দাখিল কৰে এজন অধিবক্তাই। মুখ্যমন্ত্ৰীজনক সুৰজিত হৰ্ষ নামৰ এজন যুৱকে তেওঁৰ একে নামত থকা ফেচবুক একাউন্টযোগে হত্যাৰ ভাবুকি প্ৰদান কৰিছিল। ইয়াৰোপৰি যুৱকজনে হিন্দু ধৰ্মীয় বিশ্বাসত কুঠাৰঘাত কৰি মুখ্যমন্ত্ৰীজনক অভৱ্য গালি পাৰিছিল একে মাধ্যমতে। ইয়াৰ পৰিপ্ৰেক্ষিততে অধিবক্তা বেণুধৰ নাথে এজাহাৰৰ জৰিয়তে উচিত ব্যৱস্থা গ্ৰহণ কৰিবলৈ আৰক্ষীক অনুৰোধ জনায়। উল্লেখ্য যে বুধবাৰে মুখ্যমন্ত্ৰীজনৰ বিৰুদ্ধে ফেচবুকত পোষ্টটো দিয়াৰ লগে লগেই অসম আৰক্ষীয়ে তদন্ত আৰম্ভ কৰিছে।