মঙ্গলবাৰে দুপৰীয়া তীব্ৰ বিস্ফোৰণত কঁপি উঠিছিল কৰাচী বিশ্ববিদ্যালয় চৌহদ। আত্মঘাতী বোমা আক্ৰমণত এখন গাড়ীত থকা ৩ চীনা নাগৰিকসহ চাৰিজন নিহত হয়। আক্ৰমণৰ দায়িত্ব স্বীকাৰ কৰে বালুচিস্তান লিবাৰেচন আর্মীয়ে (বিএলএ)।
বিএলএই এক বিবৃতিত জনায়, আত্মঘাতী আক্ৰমণ চলোৱাৰ বাবে মানব বোমা হিচাবে কামত লগোৱা হৈছিল শাৰি বালোচ ওৰফে ব্রামশক। চিচি টিভি ফুটেজত দেখা গৈছে, বোৰ্খা পিন্ধি বিশ্ববিদ্যালয়ৰ গে’টৰ মুখত থিয় হৈ আছে এগৰাকী মহিলা।
চীনা নাগৰিককেইজনক লৈ বগা এখন ভেন বিশ্ববিদ্যালয়ত প্ৰৱেশ কৰিবলৈ লোৱাৰ মুহূর্ততেই বিস্ফোৰণ ঘটে। ৩০ বছৰীয়া শাৰি দুই সন্তানৰ মাতৃ। আত্মঘাতী আক্ৰমণৰ ১০ ঘণ্টা পূৰ্বে নিজৰ টুইটাৰে একাউণ্টৰ পৰা লিখিছিল, ‘গুড বাই’।
বালুচিস্তানৰ তুৰবাতৰ নিয়াজাৰ আবাদৰ বাসিন্দা শাৰিয়ে প্রাণীবিদ্যাত স্নাতকোত্তৰ কৰিছে বালুচিস্তান বিশ্ববিদ্যালয়ৰ পৰা। এমফিল কৰিছে আলামা ইকবাল মুক্ত বিশ্ববিদ্যালয়ৰ পৰা।
২০১৪ চনত বিএড কৰে শাৰিয়ে। ২০১৮-ত এমএড। বালুচিস্তানৰ কেচ জিলাৰ এখন প্রাথমিক স্কুলত শিক্ষকতা কৰিছিল। শাৰিয়ে বিয়া কৰাইছিল এজন দন্ত চিকিৎসকক। তেওঁলোকৰ এটা পুত্ৰ আৰু এজনী কন্যা সন্তান। এজনৰ বয়স ৮, আনজনৰ ৫।
