এতিয়াৰে পৰা আৰু এটিএমৰ পৰা টকা উলিয়াবলৈ নালাগে কার্ড!

সমগ্ৰ দেশৰ সকলো বেঙ্কৰ সকলো এটিএমতে এতিয়াৰে পৰা টকা উলিয়াব পাৰিব কার্ড অবিহনেই। ভাৰতীয় ৰিজার্ভ বেংকৰ গৱৰ্নৰ শক্তিকান্ত দাসে আজি এই কথা ঘোষণা কৰে। মানিটাৰী পলিচী কমিটিৰ বৈঠকৰ পিছত গৱর্নৰে জনায় যে এই ব্যৱস্থা ইউপিআইৰ জৰিয়তে হ’ব।

শক্তিকান্ত দাসে জনোৱা মতে, বর্তমান কার্ড অবিহনে এটিএমৰ পৰা নগদ টকা উলিওৱাৰ ব্যৱস্থা মাত্ৰ কেইটামান বেঙ্কৰ নিৰ্দিষ্ট কেইটামান এটিএমতহে উপলব্ধ। এইবাৰ সকলো বেঙ্কৰ সকলো এটিএমৰ ক্ষেত্রত এই ব্যৱস্থা গ্রহণ কৰা হ’ব। বর্তমান এছবিআই, এক্সিছ বেঙ্ক, আইচিআইচিআই বেঙ্ক আৰু বেঙ্ক অব বৰোডাৰ কেইটামান এটিএমতহে কার্ডবিহীন নগদ উলিওৱাৰ ব্যৱস্থা চলি আছে।