দিল্লীৰ বহু অংশত তীব্র তাপ প্রবাহৰ পূর্বাভাস দিলে বতৰ বিজ্ঞান কেন্দ্ৰই। বুধবাৰেও তাপমাত্রা ৪০ ডিগ্ৰী অতিক্ৰম কৰিব পাৰে বুলি পূর্বাভাস দিয়া হৈছে। আগন্তুক কেইটামান দিনত এই তীব্র তাপ প্রবাহ চলিব পাৰে বুলিও সতর্ক কৰিছে বতৰ বিজ্ঞান কেন্দ্ৰই।
বতৰ বিজ্ঞানীসকলে জনোৱা মতে, দীর্ঘ দিন ধৰি শুষ্ক বতৰৰ ফলতেই উত্তৰ-পশ্চিম ভাৰতত আৰম্ভ হ’ব ধৰিছে এই তীব্র তাপ প্রবাহ।
মঙ্গলবাৰেও দিল্লীৰ বহু অংশত তীব্র তাপ প্রবাহ লক্ষ্য কৰা গৈছিল। নৰেলা, পিতমপুৰা আৰু স্প’র্টছ কমপ্লেক্সত পাৰা স্তম্ভ আছিল ৪১ ডিগ্ৰীৰ ওপৰত।
৩-৫ এপ্রিলত দিল্লীত আৰু এটি তাপ প্রবাহৰ আশঙ্কা আছে বুলিও বতৰ বিজ্ঞান কেন্দ্ৰই জনাইছে।
উল্লেখ্য, বতাহৰ সর্বোচ্চ তাপমাত্রা স্বাভাৱিকৰ তুলনাত ৪.৫ ডিগ্ৰী বেছি হ’লেহে তাপ প্রবাহৰ সৃষ্টি হয়। কিন্তু সর্বোচ্চ তাপমাত্রা যদি স্বাভাৱিকৰ তুলনাত ৬.৪ ডিগ্ৰীৰ ওপৰত হয়, তেতিয়া আৰম্ভ হয় প্ৰচণ্ড তাপ প্রবাহ।
