ASSAM TIMES POST
বিশেষ প্ৰতিবেদনঃ সকলো অবড়ো ভোটাৰক একগোট কৰাৰ লক্ষ্য লৈছে সাংসদ নৱ শৰণীয়াই৷ এই লক্ষ্যৰে কোকৰাঝাৰৰ সাংসদ নৱ শৰণীয়াই এইবাৰ বিটিএডিৰ পৰিষদীয় নিৰ্বাচনত ৪০ খন আসনৰ ভিতৰত কমেও ৩৫খন আসন দখল কৰাৰ পৰিকল্পনা লৈছে৷ ইয়াকে লৈ সাংসদ নৱ শৰণীয়াই ৰাজনৈতিক কুচকাৱাজ আৰম্ভ কৰিছে৷
মন কৰিব লগীয়া যে অবড়ো ভোটাৰৰ সমৰ্থনত নৱ শৰণীয়া দুবাৰকৈ সাংসদ হিচাপে নিৰ্বাচিত হৈছে৷ সাংসদজনে বিটিএডিত বঞ্চিত জনজাতি আৰু বড়ো লোকসকলক সংঘবদ্ধ কৰাৰ এক পৰিকল্পনা হাতত লৈছে৷ তাৰ যোগেদি বিপিএফৰ বিৰুদ্ধে যুঁজ কৰাৰ চিন্তাৰে আগন্তুক বিটিএডিৰ পৰিষদীয় নিৰ্বাচনত অবতীৰ্ণ কৰাব প্ৰাৰ্থী৷
উল্লেখযোগ্য যে বড়ো উগ্ৰবাদ আৰু উগ্ৰ জাতীয়তাবাদৰ বাবে বিটিএডিত জনজাতি আৰু বহু বড়ো লোক বঞ্চিত হৈ আছে৷ সাংসদ নৱ শৰণীয়াই উল্লেখ কৰা মতে জম্মু আৰু কাশ্মীৰৰ বিভাজনৰ পাছত বিটিএডিত বাঘে-চাগে একগোট হৈছে৷ মন কৰিব লগীয়া যে ৰাজ্যসভাৰ সাংসদ বিশ্বজিৎ দৈমাৰীয়ে বিটিএডিক কেন্দ্ৰীয় শাসিত ৰাজ্য হিচাপে ঘোষণা কৰিবলৈ দাবী উত্থাপন কৰিছিল৷
ইপিনে, বিটিএডিৰ মুৰব্বী হাগ্ৰামা মহিলাৰীয়ে পৃথক বড়োলেণ্ড নালাগে বুলি কৈ আছে৷ স্মতৰ্ৱ্য যে যোৱা ৫ আগষ্টৰ সিদ্ধান্তৰ পাছত দিল্লীলৈ সকলো বিপিএফৰ বিধায়কক তলব কৰিছিল৷ তেতিয়া বিটিএডিক কেন্দ্ৰীয় শাসিত ৰাজ্য হিচাপে ৰূপ দিবৰ বাবে এই বিধায়কসকলৰ যোগে হেঁচা দিবলৈ চেষ্টা কৰিছিল৷ বিপিএফ ক্ষমতাত থাকিলে অসমক বিভাজন কৰিবই৷
সেয়ে আসন্ন পৰিষদীয় নিৰ্বাচনত বিপিএফক ক্ষমতাৰ পৰা অপসাৰিত কৰিব বুলি সাংসদ নৱ শৰণীয়াই উল্লেখ কৰে৷ উল্লেখযোগ্য যে বিটিএডিত ৪০ খন পৰিষদীয় আসন আছে৷ তাৰে ভিতৰত ৩৫ খন আসন দখল কৰাৰ পৰিকল্পনা কৰিছে সাংসদজনে৷ এই লক্ষ্য আগত লৈ সাংসদজনে চলিত ছেপ্টেম্বৰ মাহত বিটিএডি সেনা গঠন কৰিব৷
এই বিটিএডি সেনা হ’ল সুৰক্ষা বাহিনী৷ ইয়াৰ পাছতে অহা অক্টোবৰ মাহত এটা ৰাজনৈতিক দল গঠন কৰিব৷ এই ৰাজনৈতিক দলটোত বিটিএডিৰ শোষিত, নিষ্পেষিত, নিৰ্যাতিত আৰু হত্যাৰ বলি হোৱা লোকসকলে ৰাজনৈতিকভাৱে আত্মপ্ৰকাশ কৰিবলৈ সুবিধা পাব৷ ইতিমধ্যে বিটিএডিত সকলোবোৰ বড়ো দল-সংগঠন একত্ৰিত হৈছে বুলি প্ৰকাশ কৰিছে সাংসদ নৱ শৰণীয়াই৷
