ASSAM TIMES POST
শিৱসাগৰঃ শিৱসাগৰ চহৰ দিনক দিনে চোৰ-ডকাইতৰ বিচৰণ থলিলৈ পৰিণত হৈছে। শিৱসাগৰ আৰক্ষীৰ চকুৰ সন্মুখতেই নিতৌ ইটোৰ পিছত সিটো চুৰি কাৰ্য সংঘটিত কৰিছে। শিৱসাগৰ আৰক্ষীক যেন প্ৰত্যাহ্বন জনাইছে চুৰে। শিৱসাগৰ আৰক্ষী চোৰ কৰায়ত্ত কৰাত এক প্ৰকাৰে অসহায় হৈ পৰিছে৷
শিৱসাগৰ চহৰত সোমবাৰে নিশাও সংঘটিত হ’ল এক চুৰি কাৰ্য। ফুকন নগৰ নামঘৰত সংঘটিত হ’ল এই চুৰি কাৰ্য। কালি নিশা চুৰে নামঘৰৰ দৰ্জাৰ তলা ভাঙি নামঘৰৰ দানপাত্ৰৰ পৰা নগদ ধন চুৰি কৰি নিয়ে।
তদুপৰি দেওবাৰৰ নিশা চহৰৰ টাই সংস্কৃতিক বিকাশ কেন্দ্ৰৰ সন্মুখত থকা ট্ৰেইলাৰিং প্ৰশিক্ষণ দিয়া প্ৰতিষ্ঠান এখনৰ পৰা সাতটা কৈ চিলাই মেচিন চুৰি কৰি নিয়ে চুৰৰ দলটোৱে। একেটা স্থানতে থকা আন এখন ট্ৰেইলাৰিং দোকানৰ পৰা যোৱা ১৭ আগষ্টৰ নিশা চুৰে ৫ টা চিলাই মেচিন চুৰি কৰি নিয়ে। ১৭ আগষ্টৰ চুৰিৰ ঘটনাৰ পিছতেই সেই স্থানত আৰক্ষীৰ পহৰা অধিক হ’ব বুলি ধাৰণা কৰা হৈছিল যদিও শিৱসাগৰ আৰক্ষীক বুঢ়া আঙুলি দেখুৱাই পুনৰ একে স্থানৰ পৰা দেওবাৰে নিশা চুৰে চুৰি কাৰ্য কৰিলে। ঘটনাৰ পিছতেই শিৱসাগৰ আৰক্ষীয়ে চহৰৰ বিভিন্ন স্থানৰ পৰা ৩০ টা মান শিশু-কিশোৰক আটক কৰিছে আৰু তাৰে দুটামানৰ স্বীকাৰোক্তিৰ ভিত্তিত ষ্ট্যেচন চাৰিআলিৰ দোকান এখনৰ পৰা চিলাই মেচিনসমূহ উদ্ধাৰ কৰে।
চোৰৰ বিৰুদ্ধে আৰক্ষীৰ এই অভিযান চলি থকাৰ মাজতে কালি নিশা ফুকন নগৰ নামঘৰত চুৰি কাৰ্য হোৱা ঘটনাই শিৱসাগৰ আৰক্ষীৰ ব্যথতাকে বুজাইছে।
চহৰৰ শংকৰমন্দিৰ পথত দেওবাৰে নিশা থকা শ্ৰীমন্ত শংকৰদেৱ সমাজ নামঘৰৰ খিড়িকি ভাঙি চোৰে বানবাতি, ভোৰতাল আদিকে ধৰি বিভিন্ন সামগ্ৰী চুৰি কৰি নিয়ে। ঘটনাৰ সন্দৰ্ভত নামঘৰ সমিতিয়ে শিৱসাগৰ আৰক্ষী থানাত এজাহাৰ দাখিল কৰিছে যদিও আৰক্ষীয়ে কোনো সফলতা লাভ কৰা নাই।
বিগত কেইবামাহ ধৰি শিৱসাগৰ আৰক্ষীৰ মূৰৰ কামুৰণি সৃষ্টি কৰিছে চোৰৰ দলে। কিছুদিনপূৰ্বে ব’ৰ্ডিং ৰোডৰ পৰা ইণ্ডিয়ান অভাৰচীজ বেংকৰ এটিএম মেচিন এটা উঠাই নিয়াৰ লগতে মেটেকাৰ দুটাকৈ নামঘৰৰ পৰা একে নিশাই চোৰে লুট পাত চলায়। উল্লেখ্য যে চহৰত নিশা আৰক্ষীৰ তহলৰ লগতে গাঁওৰক্ষী বাহিনীৰ জোৱানেও তহল দি থকা অৱস্থাত কেনেদৰে চোৰে চুৰি কাৰ্য সংঘটিত কৰিব পাৰিছে তাক সৰ্বত্তে প্ৰতিক্ৰিয়াৰ সৃষ্টি হৈছে।
ইফালে চুৰি ঘটনা ৰোধ কৰিবলৈ শিৱসাগৰ আৰক্ষীয়ে কেতবোৰ পৰিকল্পনা হাতত লৈছে বুলি সাংবাদিকৰ আগত মন্তব্য কৰিছে।
