ASSAM TIMES POST
গুৱাহাটীঃ স্বাধীনতা দিৱসৰ প্ৰাকক্ষণত গুৱাহাটীত যান-বাহনৰ চলাচল, পাৰ্কিঙৰ ক্ষেত্ৰত কেতবোৰ নিষেধাজ্ঞা আৰোপ কৰিছে গুৱাহাটীৰ যান-বাহন আৰক্ষীৰ উপ আয়ুক্তৰ কাৰ্যালয়ে।
গুৱাহাটীৰ খানাপাৰাস্থিত অসম পশু চিকিৎসা বিজ্ঞান মহাবিদ্যালয়ৰ খেলপথাৰত স্বাধীনতা দিৱসৰ ৰাজ্যিক কাৰ্যসূচী অনুষ্ঠিত হ’বলগীয়াৰ পৰিপ্ৰেক্ষিতত সেই সময়চোৱাত ৩১ আৰু ৩৭ নং ৰাষ্ট্ৰীয় ঘাইপথেদি গুৱাহাটীলৈ আহিবলগীয়া গধুৰ বাণিজ্যিক মাল কঢ়িওৱা গাড়ীবোৰ প্ৰয়োজন সাপেক্ষে ক্ষেত্ৰী, সোনাপুৰ, বৰ্ণিহাট, যোৰাবাট, জালুকবাৰী, আমিনগাঁও আৰু বংগাৰাত ৰখোৱা হ’ব।
ইফালে ৰঙা, নীলা আৰু হালধীয়া পাছ থকা যান-বাহনসমূহ কইনাধৰা পইন্ট বা খানাপাৰা ৰটাৰী আৰু ৩৭ নং ৰাষ্ট্ৰীয় ঘাইপথ বা আছাম ৰাইফলছৰ বিল্ডিঙৰ সমীপলৈ যাব পাৰিব আৰু ইয়াৰ নিৰ্ধাৰিত স্থানত পাৰ্কিং কৰিব পাৰিব। কিন্তু কোনো বাহনকে কইনাধৰা পইন্টৰপৰা মিউজিয়াম পইন্টলৈ আহিবলৈ দিয়া নহ’ব। বিপৰীতে বিজ্ঞান সংগ্ৰহালয় পইন্টৰপৰা কইনাধৰা পইন্টলৈ মাথো যাব পাৰিব ৰঙা, নীলা পাছ থকা বাহনসমূহহে। তদুপৰি সেই সময়চোৱাত খানাপাৰাৰপৰা ছয়মাইললৈ জিএছ ৰোডৰে কোনো বাণিজ্যিক মাল কঢ়িওৱা গাড়ীয়ে চলাচল কৰিব নোৱাৰিব।
আনহাতেদি স্বাধীনতা দিৱসৰ কাৰ্যসূচী উপভোগ কৰিবলৈ পাছ অবিহনে দিছপুৰ, বেলতলা, নুনমাটি, নাৰেংগীৰ দিশৰপৰা অহা লোকসকলে গণেশ মন্দিৰ ইনড’ৰ ষ্টেডিয়াম প্ৰাংগণত বাহনসমূহ ৰাখিব লাগিব বা ছয়মাইল আৰু জয়ানগৰ চাৰিআলিৰপৰা অসম প্ৰশাসনীয় পদাধিকাৰী মহাবিদ্যালয়ৰ গেটলৈকে পাৰ্কিং কৰিব পাৰিব।
ন’ পাৰ্কিংঃ
১) কইনাধৰা পইন্টৰপৰা খানাপাৰা ৰটাৰীলৈকে।
২) কইনাধৰা পইন্টৰপৰা আছাম ৰাইফলছৰ বিল্ডিঙৰ সমীপলৈকে।
৩) অসম প্ৰশাসনীয় পদাধিকাৰী মহাবিদ্যালয়ৰ গেটৰপৰা ৰিচাৰ্চ গেটলৈকে।
৪) জিএছ ৰোড, বি বৰুৱা ৰোড, জিএনবি ৰোড, কেএলবি ৰোড আৰু এমজি ৰোড।
