নৰনাৰায়ণ সেতুত ৰেলৰ খুন্দাত দুই জোৱান নিহত

ASSAM TIMES POST

গোৱালপাৰাঃ গোৱালপাৰাৰ নৰনাৰায়ণ সেতুৰ ৰেল পথত যোৱা নিশা চলন্ত ৰেলে মহটিওৱাৰ ফলত থিতাতে নিহত হয় কনিষ্টবল কৰ্ণধৰ নাথ আৰু হাবিলদাৰ আবুল কালাম আজাদ৷ দুয়ো নৰনাৰায়ণ সেতু তালাচী চকীৰ জোৱান৷ প্ৰাপ্ত তথ্য অনুসৰি, নিশা প্রায় দহ বজাত নৰনাৰায়ণ সেতুৰ ওচৰৰ ৰেল পথত তালাচী চলাই সেতুৰ ফালে গৈ থকা অৱস্থাত গুৱাহাটী-বঙাইগাঁও ডেমো যাত্ৰীবাহী ৰেলে মহটিয়াই নিয়াত দুয়োৰে থিতাতে মৃত্যু হয়। কনিষ্টবল কৰ্ণধৰ নাথৰ ঘৰ পশ্চিম গোৱালপাৰাৰ বগুৱানত আৰু হাবিলদাৰ আবুল কালাম আজাদৰ ঘৰ গোৱালপাৰা চহৰৰ বাপুজীনগৰৰ শালবাৰীত। ঘটনাৰ ক্ষন্তেক পিছতে জিলাখনৰ অতিৰিক্ত আৰক্ষী অধীক্ষক অমিতাভ বসুমতাৰী ঘটনাস্থলীত উপস্থিত হৈ মৃতদেহ দুটা মৰণোত্তৰ পৰীক্ষাৰ বাবে গোৱালপাৰা অসামৰিক চিকিৎসালয়লৈ প্রেৰণ কৰে।