বদ্ৰীনাথৰ পৰা উভতি অহাৰ পথত এখন যাত্ৰীবাহী হেলিকপ্টাৰ সন্ধানহীন হৈ পৰে। উত্তৰাখণ্ডৰ চামোলী জিলাৰ যোশীমঠ অঞ্চলত প্ৰচণ্ড বৰষুণ আৰু ডাঠ ডাৱৰৰ মাজেৰে গৈ থকাৰ সময়তে হঠাতে যোগাযোগ বিচ্ছিন্ন হৈ পৰে। পিছত উত্তৰাখণ্ডৰ মুখ্যমন্ত্ৰী পুষ্কৰ সিং ধামীয়ে হেলিকপ্টাৰখন দুৰ্ঘটনাগ্ৰস্ত হোৱা বুলি কয়। এতিয়ালৈকে পোৱা তথ্যৰ পৰা অনুমান কৰা হৈছে যে যোশীমঠ অঞ্চলৰ হাতী পৰ্বতৰ পিছফালে থকা ছয়ী গাঁৱৰ সমীপত হেলিকপ্টাৰখন দুৰ্ঘটনাগ্ৰস্ত হ’ব পাৰে। পাইলটৰ বাহিৰেও হেলিকপ্টাৰখনত আছিল ৫ জন যাত্ৰী। ছয়জনৰেই মৃত্যুৰ আশংকা কৰা হৈছে। প্ৰায় ১.১৪ বজাত বদ্ৰীনাথৰ পৰা উৰা মাৰিছিল হেলিকপ্টাৰখন।
যোশীমঠৰ এছডিএম চন্দ্ৰশেখৰ বশিষ্ঠৰ মতে, “সেনা আৰু আমাৰ দুৰ্যোগ ব্যৱস্থাপনা দলে উদ্ধাৰ অভিযান আৰম্ভ কৰিছে। আৰক্ষী আৰু স্বাস্থ্যকৰ্মীসকল সেই স্থানলৈ গৈ আছে।” ছ’চিয়েল মিডিয়াত এটা পোষ্টত ধামীয়ে লিখিছে, “যোশীমঠৰ সমীপৰ ছয়ী গাঁৱৰ সমীপত এখন হেলিকপ্টাৰ দুৰ্ঘটনাগ্ৰস্ত হোৱাৰ খবৰ পোৱা গৈছে। জিলা প্ৰশাসন আৰু এছডিআৰএফৰ যৌথ অনুসন্ধান অভিযান আৰম্ভ কৰা হৈছে। মই ব্যক্তিগতভাৱে সমগ্ৰ বিষয়টো নিৰীক্ষণ কৰি আছোঁ। গুৰুতৰভাৱে আহতসকলৰ চিকিৎসাৰ বাবে মই হেলিকপ্টাৰ প্ৰেৰণৰ নিৰ্দেশ দিছোঁ।” হেলিকপ্টাৰখনত থকা যাত্ৰীসকল হৈছে প্ৰতাপ, অৰুণ, শংকৰ গৌড়া, সুধীৰ কে আৰু এইচ এছ নটৰাজ। আটাইকেইজনেই বেংগালুৰুৰ বাসিন্দা। বদ্ৰীনাথলৈ তীৰ্থযাত্ৰা কৰি তেওঁলোক উভতি আহিছিল। হেলিকপ্টাৰখনৰ পাইলটৰ পৰিচয়ো পোহৰলৈ আহিছে। কেপ্টেইন হিমাংশুৱে এই হেলিকপ্টাৰখন চলাইছিল।
প্ৰতিকূল বতৰ, অবিৰত বৰষুণ আৰু কম দৃশ্যমানতাৰ বাবে হেলিকপ্টাৰখন দুৰ্ঘটনাগ্ৰস্ত হ’ব পাৰে বুলি সন্দেহ কৰা হৈছে। উত্তৰাখণ্ডৰ অসামৰিক বিমান উন্নয়ন কৰ্তৃপক্ষই এক বিবৃতিত কয় যে এই হেলিকপ্টাৰখন ‘ট্ৰান্স ইণ্ডিয়া এভিয়েচন প্ৰাইভেট লিমিটেড’ৰ। প্ৰথমে হেলিকপ্টাৰখন নিৰুদ্দেশ হোৱাৰ খবৰ পোৱা গৈছিল। যোশীমঠ উপত্যকাৰ ওপৰেৰে উৰা মৰাৰ সময়ত হেলিকপ্টাৰখনৰ সৈতে সংযোগ হেৰাই যায়। ট্ৰেকিং ছিষ্টেমে হেলিকপ্টাৰখনৰ ট্ৰেজেক্টৰীও ধৰা পেলাব পৰা নাছিল।
অক্টোবৰৰ আৰম্ভণিতে উত্তৰাখণ্ডত দুখন হেলিকপ্টাৰ জৰুৰীকালীন অৱতৰণ কৰিবলগীয়া হৈছিল। এখন বেয়া বতৰৰ বাবে ৰুদ্ৰপ্ৰয়াগত জৰুৰীকালীন অৱতৰণ কৰে। কিন্তু আনখনত যান্ত্ৰিক বিজুতি ধৰা পৰাত পাইলটজনে তেহৰিত জৰুৰীকালীন অৱতৰণ কৰিবলৈ বাধ্য হয়। দুয়োখনেই আছিল যাত্ৰীবাহী হেলিকপ্টাৰ। কিন্তু শেহতীয়াকৈ উত্তৰাখণ্ডৰ বতৰৰ অৱনতিৰ বাবে হেলিকপ্টাৰ যাত্ৰাৰ সুৰক্ষাৰ ওপৰত প্ৰশ্ন উত্থাপন হৈছে। প্ৰায়েই প্ৰচণ্ড বৰষুণ আৰু দৃশ্যমানতা হ্ৰাস পোৱাৰ ফলত হেলিকপ্টাৰ চলাচলত বাধাৰ সৃষ্টি হৈছে।
