স্বাধীনতা দিৱস (Independence Day)ৰ এদিন পূৰ্বে বোমা বিস্ফোৰণৰ ভাবুকি (Threat of a bomb explosion)ত দিল্লীত আতংকৰ (Panic in Delhi) সৃষ্টি হৈছে। সূত্ৰ অনুসৰি, শুকুৰবাৰে স্বাধীনতা দিৱসৰ পূৰ্বে ৰাজধানীৰ দিল্লী উচ্চ ন্যায়ালয় আৰু ইন্দিৰা গান্ধী আন্তঃৰাষ্ট্ৰীয় বিমানবন্দৰৰ টাৰ্মিনেল ৩কে ধৰি কেইবাটাও গুৰুত্বপূৰ্ণ স্থানত বিস্ফোৰণৰ ভাবুকি আহিছে। উচ্চ ন্যায়ালয়লৈ প্ৰেৰণ কৰা ইমেইলত লালকিল্লাক লক্ষ্য কৰি লোৱাৰ কথাও উল্লেখ কৰা হৈছে। ভাবুকি পোৱাৰ পিছত সেই স্থানসমূহত নিৰাপত্তা কটকটীয়া কৰা হৈছে।
ইতিমধ্যে স্বাধীনতা দিৱস উপলক্ষে সমগ্ৰ ৰাজধানীত অতিৰিক্ত নিৰাপত্তাৰ ব্যৱস্থা কৰা হৈছে। কোনো ধৰণৰ অপ্ৰীতিকৰ ঘটনা ৰোধ কৰিবলৈ ৰাজধানীখন কটকটীয়া নিৰাপত্তাৰক্ষীৰে ঘেৰি ৰখা হৈছে। সূত্ৰ অনুসৰি শুকুৰবাৰে পুৱা ১১.৪৩ বজাত দিল্লী উচ্চ ন্যায়ালয়ে ইমেইল ভাবুকি (Email threat in Delhi High Court) লাভ কৰে। ইয়াত ১৫ আগষ্টৰ কথা উল্লেখ কৰা হৈছে আৰু কোৱা হৈছে যে লালকিল্লাক লক্ষ্য কৰি লোৱা হ’ব।
সূত্ৰ অনুসৰি, ইমেইলটোত এইটোও কোৱা হৈছে যে যিসকলক বোমা বিস্ফোৰণৰ বাবে নিযুক্তি দিয়া হৈছে তেওঁলোক সকলোৱে খাকী ৰঙৰ ইউনিফৰ্ম পিন্ধিব। ইমেইল লাভ কৰাৰ পিছতে দিল্লী উচ্চ ন্যায়ালয়ৰ মহাপঞ্জীয়কে আৰক্ষীৰ সৈতে যোগাযোগ কৰে। দিল্লী উচ্চ ন্যায়ালয়ত বৃদ্ধি পায় নিৰাপত্তা। বোমা স্কোৱাড আহি পুংখানুপুংখ তালাচী চলোৱা হয়। অৱশ্যে সূত্ৰ অনুসৰি সন্দেহজনক একো পোৱা নগ’ল। ইমেইলটোত ‘খালিস্তান’ৰ নাম উল্লেখ কৰা বুলি সূত্ৰটোৱে দাবী কৰিছে।
উল্লেখ্য যে শেহতীয়াকৈ দিল্লীৰ পৰা ‘পাকিস্তানী সমৰ্থিত’ শ্বাহজাদ ভাট্টি মডিউলৰ ৯ জন সন্ত্ৰাসবাদীক গ্ৰেপ্তাৰ কৰা হৈছে। অস্ত্ৰ-শস্ত্ৰসহ আটক কৰে সন্ত্ৰাসবাদীকেইটাক। তদন্তত প্ৰকাশ পাইছে যে দিল্লীৰ এটা বিখ্যাত মন্দিৰ আৰু হাৰিয়ানাৰ এটা সেনা শিবিৰত আক্ৰমণৰ পৰিকল্পনা আছিল। তেতিয়াৰে পৰাই দিল্লী আৰক্ষীৰ সন্ত্ৰাসবাদ বিৰোধী বিভাগে সন্ত্ৰাসবাদ মডিউলৰ শ্লীপাৰ চেল বিচাৰি ফুৰিছে। ইফালে স্বাধীনতা দিৱসৰ পূর্বে ৰাজধানীৰ বিভিন্ন প্রান্তত বোমা বিস্ফোৰণৰ ভাবুকি লাভ কৰাত নিৰাপত্তা কটকটীয়া কৰা হৈছে৷
