ভাৰতৰ প্ৰতিৰক্ষা গৱেষণা আৰু উন্নয়ন সংস্থাই থলুৱাভাৱে নিৰ্মাণ কৰা নতুন ‘আকাশৰ পৰা মাটিলৈ’ ক্ষেপণাস্ত্ৰৰ সফল পৰীক্ষণ হৈছে। সংস্থাটোৱে জনোৱা মতে, মঙলবাৰে ওড়িশাৰ চণ্ডীপুৰ উপকূলত ভাৰতীয় বায়ুসেনাৰ এখন বিমানৰ পৰা ছুপাৰছনিক ৰুদ্ৰম-II মিছাইল (Rudram-II) (সামৰিক ভাষাত মেক ৩ নামেৰে জনাজাত) সফল পৰীক্ষণ কৰা হয়।
ডি আৰ ডি অ’ৰ সূত্ৰ অনুসৰি, ৰুদ্ৰম ছিৰিজৰ এই ক্ষেপণাস্ত্ৰই শত্ৰুৰ বায়ু প্ৰতিৰক্ষা ব্যৱস্থা এৰাই চলি ৰাডাৰ, ট্ৰেকিং আৰু যোগাযোগ ব্যৱস্থা ধ্বংস কৰিবলৈ সক্ষম। ভাৰতীয় বায়ুসেনাৰ সুখয়-৩০ যুদ্ধ বিমানৰ পৰা এই ক্ষেপণাস্ত্ৰ নিক্ষেপ কৰিব পাৰিব।
এই ছিৰিজৰ প্ৰথমটো ক্ষেপণাস্ত্ৰ ৰুদ্ৰম-I ২০২০ চনত প্ৰথমবাৰৰ বাবে সুখয় যুদ্ধ বিমানৰ পৰা সফলতাৰে পৰীক্ষা কৰা হৈছিল। আমেৰিকাৰ ‘এজিএম-৮৮ই’ ‘এণ্টি ৰেডিয়চন গাইডেড মিছাইল’ৰ সমতুল্য ৰুদ্ৰমত আছে বিশেষ প্ৰযুক্তি ‘আইএনএছ-জিপিএছ নেভিগেচন’ আৰু ‘হোমিং হেড’।
যিয়ে বিকিৰণ বা বিক্ষিপ্ততাৰ উৎস (তাপ, তেজস্ক্রিয়তা বা ৰশ্মি) সহজেই চিনাক্ত কৰিব পাৰে। ডি আৰ ডি অ’ৰ প্ৰতিৰক্ষা গৱেষণা আৰু উন্নয়ন পৰীক্ষাগাৰ, উচ্চ শক্তি সামগ্ৰী গৱেষণা পৰীক্ষাগাৰ, অস্ত্ৰ গৱেষণা আৰু উন্নয়ন প্ৰতিষ্ঠান আৰু আই টি আৰৰ দৰে অন্যান্য সহযোগী পৰীক্ষাগাৰেও ৰুদ্ৰম-II ক্ষেপণাস্ত্ৰ প্ৰকল্পত অংশগ্ৰহণ কৰিছে।
ডি আৰ ডি অ’ই কয় যে ‘ডেভেলপমেণ্ট কাম প্ৰডাকচন পাৰ্টনাৰ্ছ’ হিচাপে হিন্দুস্তান এৰ’নটিক্স লিমিটেড (এইচ এ এল), ৰিজিঅ’নেল চেণ্টাৰ ফৰ মিলিটাৰী এয়াৰৱৰ্থিনেছ, মিছাইল ছিষ্টেম কুৱেলিটি এশ্বুৰেন্স এজেন্সী আৰু আন বহুতো ঔদ্যোগিক প্ৰতিষ্ঠানে এই লক্ষ্যত উপনীত হোৱাত উল্লেখযোগ্য অৱদান আগবঢ়াইছে।
প্ৰতিৰক্ষা মন্ত্ৰী ৰাজনাথ সিঙে ‘ৰুদ্ৰম-II’ ক্ষেপণাস্ত্ৰৰ সফল পৰীক্ষাৰ বাবে বিজ্ঞানীসকলক অভিনন্দন জনাই ছ’চিয়েল মিডিয়াত লিখিছে, “এই পৰীক্ষাসমূহে থলুৱা প্ৰতিৰক্ষা প্ৰযুক্তিৰ ক্ৰমবৰ্ধমান উৎকৰ্ষতা প্ৰদৰ্শন কৰিছে, যিটোৱে উন্নত অস্ত্ৰ নিৰ্মাণৰ ক্ষেত্ৰত আত্মনিৰ্ভৰশীলতা লাভৰ দিশত যথেষ্ট অৰিহণা যোগাব।”
