পহেলগাম সন্ত্ৰাসবাদী আক্ৰমণৰ (Pehelgam Attack) বৰ্ষপূৰ্তি উপলক্ষে দেশবাসীলৈ বাৰ্তা প্ৰেৰণ কৰিছে প্ৰধানমন্ত্ৰী নৰেন্দ্ৰ মোদীয়ে। পাকিস্তানৰ পৃষ্ঠপোষকতাত সন্ত্ৰাসবাদীৰ আক্ৰমণত নিহত পৰ্যটকসকলক স্মৰণ কৰি তেওঁ বুধবাৰে ছ’চিয়েল মিডিয়াত লিখিছে, “যোৱা বছৰৰ আজিৰ দিনটোতে পহেলগামত সংঘটিত সন্ত্ৰাসবাদী আক্ৰমণত প্ৰাণ হেৰুওৱা নিৰীহ লোকসকলক স্মৰণ কৰিছোঁ। এইবোৰ কেতিয়াও পাহৰিব নোৱাৰি। এই যন্ত্ৰণাৰ সৈতে যুঁজি থকা শোকসন্তপ্ত পৰিয়ালবোৰৰ বাবে মোৰ চিন্তা আছে।”
উল্লেখ্য যে ২০২৫ চনৰ ২২ এপ্ৰিলত জম্মু-কাশ্মীৰৰ পহেলগামৰ বৈছাৰণ উপত্যকাত পাকিস্তানী সন্ত্ৰাসবাদীৰ আক্ৰমণত ২৬ জন পৰ্যটক আৰু স্থানীয় লোক নিহত হৈছিল।
উক্ত ঘটনাৰ কথা উল্লেখ কৰি মোদীয়ে লিখিছে, “এটা জাতি হিচাপে আমি শোক আৰু দৃঢ়তাৰে একত্ৰিত হৈ আছোঁ। ভাৰতে কেতিয়াও কোনো ধৰণৰ সন্ত্ৰাসবাদৰ আগত শিৰ নত নকৰে। সন্ত্ৰাসবাদীৰ জঘন্য পৰিকল্পনা কেতিয়াও সফল নহ’ব।” ইফালে বুধবাৰে জম্মু-কাশ্মীৰৰ বৈছাৰণ উপত্যকাৰ কিছু অংশকে ধৰি ৩৯টা পৰ্যটনস্থলী মুকলি কৰা হয়। সেইবোৰ পহেলগাম সন্ত্ৰাসবাদী আক্ৰমণৰ পিছৰে পৰা বন্ধ হৈ আছিল।
অনন্তনাগ জিলাৰ পহেলগাম চহৰৰ পৰা প্ৰায় ৭ কিলোমিটাৰ নিলগত অৱস্থিত বৈছাৰণৰ এই সেউজীয়া বিশাল ঘাঁহনিলৈ খোজকাঢ়ি বা ঘোঁৰাত উঠিহে যাব পাৰি। যাক ভ্ৰমণকাৰীয়ে মৰমেৰে ‘মিনি ছুইজাৰলেণ্ড’ বুলি কয়।
যোৱা বছৰৰ ২২ এপ্ৰিলত সংঘটিত সন্ত্ৰাসবাদী আক্ৰমণৰ পিছত উপত্যকাটোৰ ৫০টাতকৈও অধিক পৰ্যটনস্থলী বন্ধ হৈ পৰে। ২০২৬ চনৰ মাৰ্চ মাহত কটকটীয়া নিৰাপত্তাৰ অধীনত টিউলিপ বাগিচাকে ধৰি ১২টা পৰ্যটনস্থলী মুকলি কৰা হয়। বুধবাৰে আৰু ৩৯ টা পৰ্যটনস্থলী পৰ্যটকৰ বাবে মুকলি কৰা হয়।
বুধবাৰে পহেলগামৰ পৰা বৈছাৰণ উপত্যকালৈ খোজকাঢ়ি যোৱা পথত একাংশ পৰ্যটক যায়। তেওঁলোকৰ সুৰক্ষাৰ বাবে কেন্দ্ৰীয় অৰ্ধসামৰিক বাহিনীয়ে সমগ্ৰ অঞ্চলটোৰ চাৰিওফালে নিৰাপত্তাৰক্ষীৰ ব্যৱস্থা কৰে। নিৰ্দিষ্ট এলেকাৰ বাহিৰলৈ যোৱা পৰ্যটকৰ ওপৰত কঠোৰ নিষেধাজ্ঞা আৰোপ কৰা হয়।
