ইৰাণৰ সৈতে আমেৰিকাৰ যুদ্ধবিৰতিৰ পিছত প্ৰথমবাৰৰ বাবে আমেৰিকাৰ ৰাষ্ট্ৰপতি ড’নাল্ড ট্ৰাম্পে (Donald Trump) প্ৰধানমন্ত্ৰী নৰেন্দ্ৰ মোদীক ফোন কৰে। প্ৰায় ৪০ মিনিট সময় ফোনত কথা পাতে দুয়োগৰাকী ৰাষ্ট্ৰপ্ৰধানে।
ইয়াৰ পিছতে মোদীয়ে তেওঁৰ এক্স হেণ্ডেলত এই বিষয়ে অৱগত কৰে। হৰমুজ প্ৰণালী মুকলি কৰি ৰখাৰ প্ৰয়োজনীয়তাৰ উপৰি প্ৰধানমন্ত্ৰীয়ে ‘বন্ধু’ ট্ৰাম্পৰ সৈতে আলোচনা কৰা বিষয়সমূহৰ বিষয়েও অৱগত কৰে।
মোদীয়ে নিজৰ এক্স একাউণ্টত লিখিছে, “মোৰ বন্ধু ড’নাল্ড ট্ৰাম্পৰ পৰা ফোন আহিছিল। আমি বিভিন্ন ক্ষেত্ৰত আমাৰ দ্বিপাক্ষিক সহযোগিতাৰ অগ্ৰগতিৰ বিষয়ে আলোচনা কৰোঁ।” ইয়াৰ পিছত মোদীয়ে কয়, “আমি বিশ্বৰ সকলো ক্ষেত্ৰতে কৌশলগত সহযোগিতা আৰু অধিক শক্তিশালী কৰাৰ বাবে দৃঢ়প্ৰতিজ্ঞ।”
প্ৰধানমন্ত্ৰীয়ে লিখিছে যে পশ্চিম এছিয়াৰ পৰিস্থিতি সন্দৰ্ভতো ট্ৰাম্পৰ সৈতে আলোচনা কৰা হৈছে। মোদীৰ মতে, “পশ্চিম এছিয়াৰ পৰিস্থিতিৰ বিষয়েও আলোচনা হয়। হৰমুজ প্ৰণালী মুকলি কৰি ৰখা আৰু ইয়াৰ নিৰাপত্তা নিশ্চিত কৰাৰ গুৰুত্বৰ বিষয়েও আলোচনা কৰা হয়।”
আনহাতে, ভাৰতত থকা আমেৰিকাৰ ৰাষ্ট্ৰদূত চাৰ্জিঅ’ গোৰে এনডিটিভিক জনাইছে, “দুয়োৱে কিছু সময়ৰ পূৰ্বে কথা পাতে। ৰাষ্ট্ৰপতিয়ে আমাক জনাইছে পশ্চিম এছিয়াত কি হৈ আছে। ভাৰত আৰু আমেৰিকাৰ মাজত কিছু বিষয়ৰ ওপৰতো আলোচনা কৰোঁ।” বাৰ্তালাপৰ সময়ত মোদীয়ে ট্ৰাম্পক কয় যে ভাৰতৰ জনসাধাৰণে তেওঁক ভালপায়। ইয়াৰ পূৰ্বে ২৪ মাৰ্চত দুয়োগৰাকী নেতাই কথা পাতিছিল।
