বাৰম্বাৰ ভিডিঅ’ আৰু ছবি প্ৰকাশ পোৱাৰ পিছতো ইজৰাইলৰ (Iran Israel Attack) প্ৰধানমন্ত্ৰী বেঞ্জামিন নেতানিয়াহুক কেন্দ্ৰ কৰি সৃষ্টি হোৱা জল্পনা-কল্পনা এতিয়াও মাৰ যোৱা নাই। তেওঁৰ মৃত্যুৰ জল্পনা-কল্পনা তীব্ৰতৰ হোৱাৰ লগে লগে নেতানিয়াহুৱে ইটোৰ পিছত সিটো ভিডিঅ’ মুকলি কৰি তেওঁ জীয়াই আছে বুলি দাবী কৰাৰ লগতে তেওঁ সুস্থ বুলি কয়। এইবাৰ ইজৰাইলৰ প্ৰধানমন্ত্ৰীয়ে তেওঁৰ এক্স হেণ্ডেলৰ পৰা আন এটা ভিডিঅ’ মুকলি কৰি কোৱা শুনা গ’ল, “মই জীয়াই আছো।” কিছু হাস্যৰসৰ সুৰত এইদৰে কোৱা শুনা গ’ল।
এইবাৰ নেতানিয়াহুৱে প্ৰকাশ কৰা ভিডিঅ’টোত তেওঁৰ লগত আন এজন ব্যক্তিক দেখা গৈছে। তেওঁ আন কোনো নহয় ইজৰাইলত থকা আমেৰিকাৰ ৰাষ্ট্ৰদূত মাইক হাকাবি। প্ৰকাশ পোৱা ভিডিঅ’টোত নেতানিয়াহু আৰু হাকাবিয়ে একেলগে খোজকাঢ়ি গৈ থকা দেখা গৈছে। দুয়োজনে খুব লঘুভাৱে কথা পাতিছে।
হাকাবিয়ে কোৱা শুনা যায়, “প্ৰধানমন্ত্ৰী মহোদয়, ৰাষ্ট্ৰপতিয়ে (ড’নাল্ড ট্ৰাম্প) মোক ইয়ালৈ পঠিয়াইছিল আপোনাৰ সুৰক্ষা পৰীক্ষা কৰিবলৈ।”
নেতানিয়াহুৱে হাঁহি হাঁহি উত্তৰ দিয়ে, “অৱশ্যেই মাইক। মই জীয়াই আছোঁ আৰু সুস্থ।” এই কথা শুনি হাকাবিয়ে কয়, “আপুনি নিৰাপদ হোৱা দেখি মই বৰ আনন্দিত হৈছোঁ। কিন্তু ৰাষ্ট্ৰপতিয়ে আপোনাৰ বিষয়ে বাৰ বাৰ সুধি আছে।”
ইজৰাইলৰ আক্ৰমণত নিহত ইৰাণৰ নিৰাপত্তাৰক্ষী মুৰব্বী আলী লাৰিজানী আৰু বাছিজৰ অধিনায়ক গুলেৰেজা ছলেইমানীৰ মাজত হোৱা বাৰ্তালাপত নেতানিয়াহুৱে এই মন্তব্য কৰা শুনা যায়। তাৰ পাছত তেওঁ কয়, “মোৰ হাতত পাঞ্চ কাৰ্ড আছে। সেই কাৰ্ডখনত কেইটামান নাম আছে। আজি সেই তালিকাৰ পৰা দুটা নাম কটা গ’ল। আৰু কেইবাজনো বাকী আছে।”
এই কথা কোৱাৰ পিছত হাকাবিয়ে ধেমালিতে কয়, “কিমান ভাগ্যৰ কথা, মোৰ নাম সেই তালিকাত নাই।” তেতিয়া নেতানিয়াহুৱে কয়, “ভাল মানুহৰ তালিকাত তোমাৰ নাম আছে।” ইয়াৰ পিছত নেতানিয়াহুৱে আমেৰিকাৰ ৰাষ্ট্ৰপতি আৰু আমেৰিকান বাহিনীক প্ৰশংসা কৰা শুনা যায়।
ইৰাণৰ সৈতে সামৰিক সংঘাতৰ সন্দৰ্ভত তেওঁ কয়, “ৰাষ্ট্ৰপতি আৰু আমেৰিকান বাহিনীয়ে যি কৰিছে সেয়া প্ৰশংসনীয়। আমি অতি গৌৰৱান্বিত। দুয়োখন দেশে কান্ধত কান্ধ মিলাই খোজকাঢ়িব। আমি সেই উন্মাদসকলক নিৰ্মূল কৰিম, যিসকলে পাৰমাণৱিক অস্ত্ৰ নিৰ্মাণ কৰিব। আমি তেওঁলোকক এই কামত সফল হ’বলৈ নিদিওঁ।”
কিন্তু ইতিমধ্যে বিভিন্ন মহলত প্ৰশ্ন উত্থাপন হৈছে যে এই ভিডিঅ’টো deepfake ব্যৱহাৰ কৰি নিৰ্মাণ কৰা হৈছে নেকি? সোমবাৰে নেতানিয়াহুৱে ইৰাণৰ নাগৰিকক বাৰ্তা প্ৰদান কৰে। লগতে নৌৰুজ উৎসৱ উপলক্ষে তেওঁলোকক শুভেচ্ছা জনায়। তেওঁ তেওঁলোকক “নিৰ্ভীক মানুহ” বুলি উল্লেখ কৰে।
কিন্তু তাৰ পিছতো নেতানিয়াহুক কেন্দ্ৰ কৰি সৃষ্টি হোৱা সন্দেহৰ কুঁৱলী পৰিষ্কাৰ হোৱা নাই। ইফালে উক্ত ভিডিঅ’টো প্ৰকাশ পোৱাৰ কেইঘণ্টামান পিছতে নেতানিয়াহুৰ এক্স হেণ্ডেলৰ পৰা আন এটা ভিডিঅ’ মুকলি কৰে। এইবাৰ ভিডিঅ’টোত দেখা গৈছে ইজৰাইলৰ প্ৰধানমন্ত্ৰীক আমেৰিকাৰ ৰাষ্ট্ৰদূতৰ সৈতে।
উল্লেখ্য যে পশ্চিম এছিয়াৰ সংঘাতৰ মাজতে ইৰাণ চৰকাৰে মুকলিকৈ নেতানিয়াহুক হত্যা কৰাৰ ভাবুকি দিছে। কিছুদিন পূৰ্বে নেতানিয়াহুৰ এটা ভিডিঅ’ মুকলি হৈছিল, য’ত তেওঁক এহাতত ছয়টা আঙুলি লৈ দেখা গৈছিল। ভিডিঅ’টো প্ৰকাশ পোৱাৰ পিছত নেতানিয়াহু হয়তো আৰু জীয়াই নাই বুলি জল্পনা-কল্পনা তীব্ৰতৰ হৈ পৰে। ইয়াৰ পিছত সোমবাৰে নেতানিয়াহুৰ এক্স হেণ্ডেলৰ পৰা আন এটা ভিডিঅ’ পোষ্ট কৰা হয়।
ইয়াত নেতানিয়াহুৱে জেৰুজালেমৰ ‘দ্য ছাটাফ কেফে’ত হাতত কফি কাপ লৈ থিয় হৈ থকা দেখা গৈছে। হাতখনো জোকাৰি আছে। তাত এহাতত পাঁচটা আঙুলি আছে। ভিডিঅ’টোৰ সত্যতাক লৈও সন্দেহ প্ৰকাশ কৰা হৈছে। এজন নেটিজেনে গ্ৰকক ভিডিঅ’টোৰ সত্যতা পৰীক্ষা কৰিবলৈ অনুৰোধ জনায়। ইয়াৰ উত্তৰত গ্ৰকে কয় যে ভিডিঅ’টো ‘ডীপফেক’।
অৰ্থাৎ কৃত্ৰিম বুদ্ধিমত্তাৰ সহায়ত নিৰ্মিত। যদিও ইজৰাইলৰ প্ৰধানমন্ত্ৰীৰ কাৰ্যালয়ে এই সকলোবোৰ উৰাবাতৰি বুলি দাবী কৰিছে, তথাপিও নেতানিয়াহুৰ অৱস্থান আৰু তেওঁ আনকি জীয়াই আছেনে নাই সেই সম্পৰ্কে বিভিন্ন মহলত ৰহস্য বৃদ্ধি পাইছে।
