এইবাৰ পাকিস্তানে আফগানিস্তানৰ এখন চিকিৎসালয়ত আক্ৰমণ (Pak Attack Kabul) কৰাৰ অভিযোগ উত্থাপন হৈছে। সোমবাৰে নিশা পাকিস্তানী সেনাই আফগানিস্তানৰ ৰাজধানী কাবুলৰ এখন চিকিৎসালয়ত বিমান আক্ৰমণ চলায়। এই অভিযোগ তালিবান চৰকাৰৰ।
জানিব পৰা মতে, চিকিৎসালয়খনত পাকিস্তানৰ আক্ৰমণত কমেও ৪০০ লোক নিহত হৈছে আৰু প্ৰায় ২৫০ জন আহত হয়। মৃত আৰু আহতসকলৰ অধিকাংশই চিকিৎসালয়খনৰ ৰোগী। অৱশ্যে চিকিৎসালয় আক্ৰমণৰ অভিযোগ অস্বীকাৰ কৰিছে পাকিস্তানে। তেওঁলোকে দাবী কৰে যে পাকিস্তানী সেনাই কোনো অসামৰিক অট্টালিকাত আক্ৰমণ কৰা নাই।
বিগত দুসপ্তাহ ধৰি আফগানিস্তান আৰু পাকিস্তানে সীমান্ত সংঘৰ্ষত লিপ্ত হৈছে। সোমবাৰে দুয়োখন দেশৰ সীমান্তত গুলীয়াগুলী সংঘটিত হয়। বন্দুকৰ যুদ্ধত আফগান তালিবানৰ চাৰিজন জোৱান নিহত হয়। বন্দুকৰ যুঁজৰ কেইঘণ্টামান পিছতে আফগানিস্তানৰ ৰাজধানী কাবুলৰ এখন চিকিৎসালয়ত পাকিস্তানে আক্ৰমণ চলোৱাৰ খবৰ বিয়পি পৰে। চিকিৎসালয়খনৰ কিছু ভিডিঅ’ স্থানীয় সংবাদ মাধ্যমতো প্ৰকাশ পাইছে।
ফুটেজত দেখা গৈছে যে নিৰাপত্তা বাহিনীৰ সদস্যই টৰ্চ জ্বলাই আহতসকলক চিকিৎসালয়ৰ পৰা উদ্ধাৰ কৰি আছে। চিকিৎসালয় ভৱনৰ এটা বৃহৎ অংশ ধ্বংসাৱশেষলৈ পৰিণত হৈছে। চাৰিওফালে জুই জ্বলি আছে। অগ্নিনিৰ্বাপক বাহিনীৰ এটা দলে জুই নিৰ্বাপনৰ চেষ্টা চলাইছে।
কাবুলৰ এই চিকিৎসালয়খনত ড্ৰাগছ আসক্তৰ চিকিৎসা কৰা হয়। সোমবাৰে নিশা পাকিস্তানে ২০০০ বিছনাযুক্ত চিকিৎসালয়খনত বিমান আক্ৰমণ চলোৱা বুলি অভিযোগ উঠিছে। ঘটনাৰ কিছু সময়ৰ পাছতে আফগান চৰকাৰৰ উপ-মুখপাত্ৰ হামদুল্লা ফিত্ৰাটে ছ’চিয়েল মিডিয়াত পোষ্ট কৰে।
তেওঁ জনোৱা মতে, স্থানীয় সময় অনুসৰি নিশা প্ৰায় ৯ বজাত চিকিৎসালয়খনত আক্ৰমণ কৰা হয়। এই আক্ৰমণৰ ফলত চিকিৎসালয়খনৰ এক বৃহৎ অংশ সম্পূৰ্ণৰূপে ধ্বংস হয়। ফিত্ৰাটে প্ৰথমতে কয় যে ৪০০ লোক নিহত হোৱাৰ লগতে প্ৰায় ২৫০ জন আহত হৈছে।
আফগানিস্তানে চিকিৎসালয়খনৰ ওপৰত বিমান আক্ৰমণৰ বাবে পাকিস্তানক পোনপটীয়াকৈ জগৰীয়া কৰিছে। তালিবান চৰকাৰৰ মুখপাত্ৰ জাবিহুল্লাহ মুজাহিদে এই আক্ৰমণক গৰিহণা দি ছ’চিয়েল মিডিয়াত পোষ্ট কৰিছে।
তেওঁ পাকিস্তানে চিকিৎসালয় আৰু অসামৰিক অট্টালিকাসমূহক লক্ষ্য কৰি নিজৰ “নিষ্ঠুৰ কাৰ্যকলাপ” অব্যাহত ৰখাৰ অভিযোগ উত্থাপন কৰে। তালিবান চৰকাৰৰ মুখপাত্ৰই এই আক্ৰমণক “অনৈতিক” আৰু “মানৱতাৰ বিৰুদ্ধে অপৰাধ” বুলিও অভিহিত কৰে।
অৱশ্যে পাকিস্তানে কোনো চিকিৎসালয়ত আক্ৰমণ কৰা নাছিল বুলি দাবী কৰিছে।
পাকিস্তানৰ প্ৰধানমন্ত্ৰী শ্বাহবাজ শ্বৰীফৰ মুখপাত্ৰ মুশ্বাৰফ জাইদীয়ে এই অভিযোগক ভিত্তিহীন বুলি খাৰিজ কৰে। তেওঁ দাবী কৰে যে পাকিস্তানে কাবুলৰ কোনো চিকিৎসালয়ক লক্ষ্য কৰি লোৱা নাছিল। পাকিস্তানৰ তথ্য মন্ত্ৰালয়ে কয় যে আফগানিস্তানৰ সামৰিক ঘাটি আৰু সন্ত্ৰাসবাদী কাৰ্যকলাপৰ সমৰ্থন থকা ঠাইকে ধৰি নিৰ্দিষ্ট স্থানতহে আক্ৰমণ চলি আছে।
আফগান মুখপাত্ৰগৰাকীৰ অভিযোগ নাকচ কৰি পাকিস্তানৰ তথ্য মন্ত্ৰালয়ে দাবী কৰে যে পাকিস্তানে আক্ৰমণৰ স্থানসমূহ অতি সাৱধানে আৰু নিখুঁতভাৱে বাছি লৈছে, যাতে কোনো অশুভ কাণ্ড সংঘটিত নহয়। তেওঁলোকে দাবী কৰে যে আফগানিস্তানে সন্ত্ৰাসবাদক সমৰ্থন কৰাৰ অভিযোগৰ পৰা মনোযোগ আঁতৰাই নিবলৈ এনে “ভিত্তিহীন আৰু বিভ্ৰান্তিকৰ” অভিযোগ উত্থাপন কৰিছে।
