এল পি জিক লৈ দেশজুৰি (LPG Crisis) উদ্বেগৰ মাজতে এইবাৰ মুখ খুলিছে প্ৰধানমন্ত্ৰী নৰেন্দ্ৰ মোদীয়ে। পৰিস্থিতিৰ সুযোগ লৈ একাংশ লোকে অপ্ৰয়োজনীয় আতংক বিয়পাইছে বুলিও তেওঁ কয়।
ই দেশৰ ক্ষতি কৰিছে। প্ৰধানমন্ত্ৰীয়ে তেওঁলোকৰ বিৰুদ্ধে কঠোৰ ব্যৱস্থা গ্ৰহণৰ সকীয়নি দিছে। ইয়াৰ সমান্তৰালকৈ তেওঁ ক’লা বজাৰলৈও সুকীয়া বাৰ্তা দিছে।
ৰাজনীতিৰ ঊৰ্ধ্বত উঠি সংকটৰ মোকাবিলা কৰিব লাগে বুলি মোদীয়ে কয়। তেওঁ ৰাজ্য চৰকাৰসমূহক ক’লা বজাৰ ৰোধ কৰিবলৈ সক্ৰিয় হ’বলৈ কয়। আনহাতে, বৃহস্পতিবাৰে তেওঁ ইৰাণৰ ৰাষ্ট্ৰপতি মাছুদ পেজেছকিয়ানৰ সৈতেও পশ্চিম এছিয়াত উদ্ভৱ হোৱা পৰিস্থিতিৰ বিষয়ে কথা পাতে।
বৃহস্পতিবাৰে দিল্লীত এখন সন্মিলনত অংশগ্ৰহণ কৰে প্ৰধানমন্ত্ৰীয়ে। তাত তেওঁ এল পি জিৰ উদ্বেগৰ বিষয়টো উত্থাপন কৰে। তেওঁ কয় যে পশ্চিম এছিয়াৰ যুদ্ধ পৰিস্থিতিয়ে সকলো দেশকে প্ৰভাৱিত কৰিছে। ইয়াৰ সৈতে মোকাবিলা কৰিবলৈ চৰকাৰে যৎপৰোনাস্তি চেষ্টা কৰিছে।
মোদীয়ে কয়, “একাংশ লোকে এল পি জিক লৈ আতংক বিয়পাবলৈ চেষ্টা কৰিছে। মই কোনো ৰাজনৈতিক মন্তব্য কৰিব নিবিচাৰো। মই মাত্ৰ ক’ম যে তেওঁলোকে জনসাধাৰণৰ সন্মুখত নিজৰ প্ৰকৃত ৰং উদঙাই দিছে আৰু সামগ্ৰিকভাৱে দেশৰ ক্ষতি কৰিছে।” ইয়াৰ পিছত প্ৰধানমন্ত্ৰীয়ে ক’লা বজাৰৰ ওপৰত মন্তব্য কৰে।
তেওঁ কয় যে একাংশ লোকে পৰিস্থিতিৰ সুযোগ লৈ ক’লা বজাৰত কিছুমান সামগ্ৰী বিক্ৰী কৰি আছে। তেওঁলোকৰ বিৰুদ্ধে কঠোৰ ব্যৱস্থা গ্ৰহণ কৰা হ’ব। কাকো ৰেহাই দিয়া নহ’ব। ইয়াৰ পিছত তেওঁ কয়, “ৰাষ্ট্ৰসমূহে ক’লা বজাৰকৰ্তা আৰু জমাকাৰীক নিয়ন্ত্ৰণৰ বাবে পদক্ষেপ ল’ব লাগিব। মই আপোনালোকক অনুৰোধ কৰিছো যে তদাৰকী বৃদ্ধি কৰক।”
প্ৰধানমন্ত্ৰীয়ে কয় যে পশ্চিম এছিয়াৰ যুদ্ধৰ বাবে এক কঠিন আৰু জটিল পৰিস্থিতিৰ সৃষ্টি হৈছে। একেলগে ইয়াৰ সন্মুখীন হ’ব লাগিব। বিভিন্ন ৰাজনৈতিক দল, সংবাদ মাধ্যম, দেশৰ যুৱক-যুৱতী, চহৰ-গাঁৱৰ সাধাৰণ ৰাইজ, ইয়াত সকলোৰে গুৰুত্বপূৰ্ণ ভূমিকা আছে।
তেওঁ কয়, “পৃথিৱীখন এতিয়া এক কঠিন সময়ৰ মাজেৰে পাৰ হৈ আছে। অৱশ্যে ভাৰতে নিজস্ব ছন্দ বজাই ৰাখিছে। সমগ্ৰ বিশ্বই জানে যে যদি আমি ভৱিষ্যতৰ ফালে চাব বিচাৰো তেন্তে ভাৰতৰ ফালে চাব লাগিব। আমি ভাৰতৰ সৈতে সংস্পৰ্শত থাকিব লাগিব। আমাৰ মাত্ৰ এটাই লক্ষ্য, এটাই উদ্দেশ্ আছে- এখন উন্নত ভাৰত।
দেশখন কেৱল আগবাঢ়ি যোৱাই নহয়, দেশখনে পৰৱৰ্তী পৰ্যায়ত ভৰি দিবলৈ ওলাইছে। দেশৰ বহু নেতাই ইয়াৰ গুৰুত্ব স্বীকাৰ কৰিছে।” লগতে তেওঁ কয়, “আমাৰ উদ্দেশ্য স্পষ্ট যে বিশ্বৰ সিটো পাৰে হোৱা যুদ্ধৰ বাবে দেশৰ জনসাধাৰণ সমস্যাৰ সন্মুখীন হ’ব নালাগিব।
১.৪০ কোটি ভাৰতীয়ৰ ওপৰত মোৰ সম্পূৰ্ণ আস্থা আছে। কোভিড কালৰ দৰেই আমি এই সংকটো সফলতাৰে অতিক্ৰম কৰিম।” আনহাতে, প্ৰধানমন্ত্ৰীয়ে গভীৰ নিশা ছ’চিয়েল মিডিয়াত পোষ্ট কৰি কয় যে তেওঁ ইৰাণৰ ৰাষ্ট্ৰপতি মাছুদ পেজেছকিয়ানৰ সৈতে ফোনত বাৰ্তালাপ কৰে।
উল্লেখ্য যে যুদ্ধ আৰম্ভ হোৱাৰ পিছত দেশখনৰ ৰাষ্ট্ৰপতিৰ সৈতে মোদীৰ এইটো প্ৰথম ফোনযোগে বাৰ্তালাপ। বৰ্ধিত উত্তেজনা, অসামৰিক লোকৰ জীৱন হানি আৰু অসামৰিক আন্তঃগাঁথনিৰ ক্ষতিক লৈ তেওঁ গভীৰ উদ্বেগ প্ৰকাশ কৰে।
এই অশান্ত পৰিস্থিতিত নতুন দিল্লীয়ে বৰ্তমান দেশখনত থকা ভাৰতীয় নাগৰিকৰ সুৰক্ষা সুনিশ্চিত কৰাৰ লগতে সামগ্ৰী আৰু শক্তিৰ প্ৰবাহ নিৰৱচ্ছিন্ন কৰি ৰখাৰ ক্ষেত্ৰত সৰ্বোচ্চ অগ্ৰাধিকাৰ দিছে। ভাৰতে শান্তি আৰু স্থিতিশীলতাৰ পক্ষত বুলি পুনৰবাৰ স্পষ্ট কৰি দিছে। যুদ্ধৰ জৰিয়তে নহয়, আলোচনা আৰু কূটনীতিৰ জৰিয়তে এই সংকটৰ সমাধানৰ আহ্বান কৰে মোদীয়ে।
