বিত্তীয় অনিয়মৰ গোচৰত অভিযুক্ত উদ্যোগপতি অনিল আম্বানী (Anil Ambani) আৰু তেওঁৰ কোম্পানীৰ ৫৮১ কোটি টকাৰ স্থাৱৰ সম্পত্তি বৃহস্পতিবাৰে বলবৎকাৰী সঞ্চালকালয়ে আৰ্থিক অনিয়মৰ গোচৰত জব্দ কৰে।
ইডিয়ে ছ’চিয়েল মিডিয়াত জনাইছে যে ১৩ খন ৰাজ্যত বিস্তৃত সম্পত্তিসমূহ সংলগ্ন কৰা হৈছে। ইয়াৰ লগে লগে এই গোচৰত জব্দ কৰা মুঠ সম্পত্তিৰ পৰিমাণ ১৬,৩১০ কোটি টকা হয়গৈ।
ইডিয়ে জনোৱা মতে, পশ্চিমবংগ, গোৱা, কেৰালা, কৰ্ণাটক, পঞ্জাৱ, তামিলনাডু, উত্তৰ প্ৰদেশ, হাৰিয়ানা, ঝাৰখণ্ড, মহাৰাষ্ট্ৰ, দিল্লী, অন্ধ্ৰপ্ৰদেশ আৰু ৰাজস্থানত বৃহস্পতিবাৰে ভূমিসহ ৩১টা স্থাৱৰ সম্পত্তি সংলগ্ন কৰা হৈছে। এই পদক্ষেপ ‘ৰিলায়েন্স হোম ফাইনেন্স লিমিটেড’ (আৰ এইচ এফ এল) আৰু ‘ৰিলায়েন্স কমাৰ্চিয়েল ফাইনেন্স লিমিটেড’ৰ (আৰ চি এফ এল) ক্ষেত্ৰত গ্ৰহণ কৰা হৈছে।
ইডিৰ এক সূত্ৰই জনোৱা মতে, এই পদক্ষেপটোত এইটো নিশ্চিত কৰা হৈছে যে এই সম্পত্তিসমূহ যাতে মালিকীস্বত্বত হস্তান্তৰ বা পৰিৱৰ্তন নহয়। উল্লেখ্য যে যোৱা মাহত ইডিয়ে এই গোচৰত মুম্বাইৰ পালি হিলত থকা অনিল আম্বানীৰ ঘৰটো জব্দ কৰিছিল। প্ৰায় ৩,৭১৬ কোটি ৮৩ লাখ টকাৰ ১৭ মহলীয়া ঘৰটো এতিয়া তেওঁলোকৰ জিম্মাত।
ইয়াৰ পূৰ্বে ৬ ফেব্ৰুৱাৰীত অনিল আম্বানী গ্ৰুপৰ মালিকানাধীন ৰিলায়েন্স পাৱাৰ লিমিটেডৰ (আৰ-পাৱাৰ) কাৰ্যালয়ত ‘বিদেশী মুদ্ৰা নিয়ন্ত্ৰণ আইন’ (ফেমা) উলংঘা কৰাৰ গোচৰত ইডিয়ে অভিযান চলাইছিল। উল্লেখ্য, ৰিলায়েন্স এ ডি এ জি গ্ৰুপৰ বিভিন্ন কোম্পানী আৰু ইয়াৰ অধ্যক্ষ অনিল আম্বানীৰ বিৰুদ্ধে বিভিন্ন বেংকৰ পৰা ধনৰ বিনিময়ত ঋণ লোৱাৰ অভিযোগ উত্থাপন হৈছে। ইয়াৰ বাবে তদন্তকাৰী সংস্থাসমূহে তেওঁক জেৰাও কৰিছে।
সেই গোচৰত উচ্চতম ন্যায়ালয়ে জানুৱাৰী মাহত অনিল আম্বানী আৰু তেওঁৰ গ্ৰুপলৈ নতুন জাননী প্ৰেৰণ কৰিছিল। শীৰ্ষ আদালতে স্পষ্টভাৱে উল্লেখ কৰিছিল যে ‘এইটোৱেই শেষ সুযোগ’। তদুপৰি চিবিআই আৰু ইডিকো এই অভিযোগৰ তদন্তৰ স্থিতিৰ বিষয়ে ১০ দিনৰ ভিতৰত অৱগত কৰিবলৈ নিৰ্দেশ দিয়া হৈছিল।
৪ ফেব্ৰুৱাৰীত কেন্দ্ৰীয় তদন্তকাৰী সংস্থা দুটাৰ সঁহাৰি শুনি উচ্চতম ন্যায়ালয়ৰ মুখ্য ন্যায়াধীশ সূৰ্য কান্ত, ন্যায়াধীশ জয়মাল্য বাগচি আৰু ন্যায়াধীশ বিপুল এম পাঞ্চোলিৰে গঠিত বিচাৰপীঠে ক্ষোভ প্ৰকাশ কৰি কয়, “তদন্তত কিয় পলম হৈছে? ইমান পলমৰ কোনো যুক্তিসংগত ব্যাখ্যা নাই।” ইয়াৰ কিছু সময়ৰ পিছতে অনিল আম্বানীৰ বিৰুদ্ধে ইডি সক্ৰিয় হৈ পৰে।
