মধ্যপ্ৰাচ্যত হোৱা যুদ্ধই (Middle East war) পৃথিৱীখন জ্বলাই দিয়াৰ দৰে হৈছে৷ ইৰাণে হৰমুজ প্ৰণালী (Straight of Hormuz) ‘বন্ধ’ কৰাত বিশ্বত এক ভয়ানক তেল সংকটৰ সন্মুখীন হৈছে। তেহৰাণে চুবুৰীয়া দেশসমূহৰ তেল উৎপাদন আৰু শোধনাগাৰসমূহকো আক্ৰমণ কৰি আহিছে। মধ্যপ্ৰাচ্যৰ যুদ্ধই বিশ্বৰ শক্তি যোগানত ইমানেই প্ৰভাৱ পেলাইছে যে কেৱল ভাৰতেই নহয়, প্ৰায় দহখন দেশেই এক গুৰুতৰ গেছ আৰু শক্তিৰ সংকটৰ সন্মুখীন (Facing a gas and energy crisis) হ’বলৈ গৈ আছে। তাৰে এখন দিশ হ’ল পাকিস্তান (Pakistan)৷ পৰিস্থিতি ইমানেই বেয়া যে জুইৰ পৰা ৰক্ষা পাবলৈ দেশখনে কাৰ্যতঃ লকডাউনৰ পথত খোজ আগবঢ়াইছে।
বিশেষজ্ঞসকলৰ মতে, যদি মধ্যপ্ৰাচ্যত সংঘৰ্ষ দীৰ্ঘদিন ধৰি অব্যাহত থাকে, ই বিশ্ব অৰ্থনীতিত এক ডাঙৰ প্ৰভাৱ পেলাব পাৰে। ইয়াৰ পৰিণাম গুৰুতৰ হ’ব পাৰে। এই পৰিস্থিতিৰ ফলত চুবুৰীয়া দেশৰ অৰ্থনীতি ধ্বংসৰ পথত উপনীত হৈছে। পাকিস্তানে ইন্ধন ৰাহি কৰিবলৈ বাস্তৱিকতে ‘লকডাউন’ৰ পথত আছে। পাকিস্তানৰ প্ৰধান মন্ত্ৰী শ্বেহবাজ শ্বৰীফে চৰকাৰী কাৰ্যালয়ত কৰ্মদিনৰ সংখ্যা হ্ৰাস কৰিছে। কেৱল এয়াই নহয়, চৰকাৰে চৰকাৰী বিভাগসমূহৰ বাবে দুমাহৰ বাবে ইন্ধন আৱণ্টনত ৫০ শতাংশ কৰ্তনৰ নিৰ্দেশ দিছে। ইন্ধনৰ অভাৱৰ বাবে বাংলাদেশতো ৰেচনিং প্ৰৱৰ্তন কৰা হৈছে।
মটৰচাইকেলৰ বাবে প্ৰতিদিনে সৰ্বাধিক দুই লিটাৰ আৰু গাড়ীৰ বাবে প্ৰতিদিনে দহ লিটাৰ ইন্ধন ব্যৱহাৰৰ সীমা আৰোপ কৰা হৈছে। ইউৰোপৰ বিভিন্ন দেশৰ পেট্ৰ’ল পাম্পবোৰত দীঘলীয়া শাৰীৰ সৃষ্টি হৈছে। শ্ৰীলংকাত ইন্ধনৰ মূল্য প্ৰায় ৮ শতাংশ বৃদ্ধি কৰা হৈছে। ম্যানমাৰত যান-বাহনৰ বাবে অ’ড-ইভেন ব্যৱস্থা প্ৰৱৰ্তন কৰা হৈছে। বহু ঠাইত ইন্ধনৰ অভাৱত পাম্প বন্ধ হৈ আছে। ম্যানমাৰৰ পৰা বহু লোক তেল ক্ৰয় কৰিবলৈ থাইলেণ্ডলৈ গৈছে। ফ্লৰিডা আৰু লুইজিয়ানাৰ গেছ পাম্পত গেছৰ মূল্য প্ৰতি গেলনত প্ৰায় ১১ চেণ্ট বৃদ্ধি পাইছে। ভিয়েটনামৰ শক্তি সংকটৰ সৈতে মোকাবিলা কৰিবলৈ এক বিশেষ টাস্ক ফ’ৰ্চ গঠন কৰা হৈছে।
পাকিস্তান, বাংলাদেশ, ফ্ৰান্স, আমেৰিকা যুক্তৰাষ্ট্ৰ, জাৰ্মানী, পোলেণ্ড, ভিয়েটনাম, শ্ৰীলংকা আৰু ইণ্ডোনেছিয়াৰ দৰে দেশত ইন্ধনৰ মূল্য বৃদ্ধি পাইছে। সংবাদ সংস্থাৰ মতে, পাকিস্তান এক শক্তি সংকটত ভুগি আছে। এই সপ্তাহৰ শেষলৈ, পাকিস্তানৰ সকলো বিদ্যালয় একেৰাহে দুই সপ্তাহৰ বাবে বন্ধ থাকিব। উচ্চ শিক্ষাৰ ক্ষেত্ৰত, শ্ৰেণীসমূহ কেৱল অনলাইনহে হ’ব। কাৰ্যালয়ৰ সময়সূচী সলনি হৈ আছে। বেংকৰ বাহিৰে সকলো চৰকাৰী কাৰ্যালয় সপ্তাহত মাত্ৰ চাৰিদিনহে খোলা থাকিব। ইয়াৰ উপৰিও চৰকাৰী বিভাগৰ ৫০ শতাংশ কৰ্মচাৰীক অত্যাৱশ্যকীয় সেৱাৰ বাহিৰে ঘৰৰ পৰা কাম কৰিবলৈ নিৰ্দেশ দিয়া হৈছে। একে সময়তে, মন্ত্ৰীসকলৰ ভাট্টা হ্ৰাস কৰা হৈছে।
