ইৰাণৰ পৰৱৰ্তী সৰ্বোচ্চ নেতা আয়াতুল্লা আলী খামেইনীৰ পুত্ৰ মোজতাবা খামেইনী। সোমবাৰে তেহৰানে আমেৰিকা আৰু ইজৰাইলৰ সতৰ্কবাণীক কাৰ্যকৰীভাৱে আওকাণ কৰি মোজতাবাৰ নাম ঘোষণা কৰে। খামেইনীৰ পুত্ৰক প্ৰশংসাৰেও উপচাই দিয়া হৈছে। ইৰাণৰ চৰকাৰী সংবাদ মাধ্যমে কয় যে মোজতাবা এজন “জাহৱাজ”।
পাৰ্চী ভাষাত ইয়াৰ অৰ্থ এনে এজন ব্যক্তি যিয়ে নিজৰ জীৱন বিপন্ন হʼলেও যুঁজি যাব। অৰ্থাৎ তেহৰানে মোজতাবাক পিতৃৰ উত্তৰাধিকাৰী হিচাপে বাছি লৈ আমেৰিকা আৰু ইজৰাইলৰ বিৰুদ্ধে যুঁজ অব্যাহত থাকিব বুলি বাৰ্তা প্ৰেৰণ কৰিছে।
ইৰাণৰ পৰৱৰ্তী সৰ্বোচ্চ নেতা হোৱাৰ বাবে মোজতাবা দৌৰত আগবাঢ়ি থকাৰ ইংগিত পোৱা গৈছিল। দেওবাৰে (স্থানীয় সময় অনুসৰি) এই খবৰ আনুষ্ঠানিকভাৱে হোৱাইট হাউছত উপস্থিত হয়। এক সাক্ষাৎকাৰত এই সন্দৰ্ভত সোধাত আমেৰিকাৰ ৰাষ্ট্ৰপতি ড’নাল্ড ট্ৰাম্পে কোনো সবিশেষ মন্তব্য দিব বিচৰা নাছিল। তেওঁ মাত্ৰ কৈছিল, “আমি চাম (ইৰাণত) কি হয়।”
২৮ ফেব্ৰুৱাৰীত আমেৰিকা আৰু ইজৰাইলৰ যৌথ আক্ৰমণত নিহত হৈছিল খামেইনী। তেতিয়াৰে পৰাই তেওঁৰ পদ কোনে উত্তৰাধিকাৰী হিচাপে ল’ব আৰু ইৰাণৰ উচ্চতম নেতাৰ চকীত কোনে বহিব সেই সম্পৰ্কে জল্পনা-কল্পনা চলি আহিছে। পুত্ৰ মোজতাবাৰ নামটো কেইবাবাৰো আহে। অৱশ্যে সোমবাৰৰ পূৰ্বে তেহৰানে কোনো আনুষ্ঠানিক ঘোষণা কৰা নাছিল। এই পৰিস্থিতিত আমেৰিকা আৰু ইজৰাইলৰ পৰা ধাৰাবাহিকভাৱে ভাবুকি আহিছে।
দেওবাৰে ইজৰাইল সেনাই এক বিবৃতিত কয় যে যিয়েই খামেইনীৰ চকীত বহিব তেওঁ পৰৱৰ্তী লক্ষ্য হ’ব। ইজৰাইলে সকীয়াই দিছিল যে সেই চকীখনত কাৰোবাক বহাবলৈ চেষ্টা কৰাসকলকো হত্যা কৰা হ’ব। উল্লেখ্য যে ইৰাণে ঠিক পিছদিনা সৰ্বোচ্চ নেতাৰ নাম ঘোষণা কৰে।
শেহতীয়াকৈ আমেৰিকাৰ ৰাষ্ট্ৰপতি ড’নাল্ড ট্ৰাম্পেও খামেইনীৰ উত্তৰাধিকাৰীৰ স্থিতিৰ ওপৰত মন্তব্য আগবঢ়াইছে। ইৰাণৰ সৰ্বোচ্চ নেতা নিৰ্বাচনত আমেৰিকাৰ মতামতৰ প্ৰতি লক্ষ্য ৰখাটো প্ৰয়োজনীয় বুলিও তেওঁ কয়।
যদিহে আমেৰিকাৰ সন্মতি সাপেক্ষে সেই পদত কাৰোবাক নিযুক্তি দিয়া হয়, তেন্তে হোৱাইট হাউছে ইৰাণৰ উন্নয়নৰ বাবে কাম কৰিব। অৱশ্যে তেহৰানে ট্ৰাম্পৰ এই দাবীৰ প্ৰতি কোনো গুৰুত্ব নিদিলে। ইয়াৰ পূৰ্বে ৰাষ্ট্ৰপতি মাছুদ পেজেছকিয়ানে কৈছিল যে ট্ৰাম্পৰ ইৰাণৰ নিঃচৰ্ত আত্মসমৰ্পণৰ সপোন সপোন হৈয়ে থাকিব।
