স্পেইন (Spain) ত সংঘটিত হৈছে এক ভয়ংকৰ ৰে’ল দুৰ্ঘটনা (Rail Accident)। দেওবাৰে সন্ধিয়া (স্থানীয় সময় অনুসৰি) দেশত দুখন ৰে’লৰ সংঘৰ্ষত কমেও ২১ জন লোকৰ মৃত্যু হয়। ৭৫ জনতকৈ অধিক লোক আহত হৈছে। ইয়াৰে ভিতৰত ৩০ জন গুৰুতৰভাৱে আহত হয়। স্পেইনৰ পৰিবহণ মন্ত্ৰী অস্কাৰ পুয়েণ্টেৰ আশংকা যে হতাহতৰ সংখ্যা বৃদ্ধি পাব পাৰে।
দেওবাৰে সন্ধিয়া ৭.৪৫ বজাত (স্থানীয় সময় অনুসৰি) দক্ষিণ স্পেইনৰ আদামুজ চহৰৰ সমীপত সংঘটিত হয় এই দুৰ্ঘটনা। সেই সময়ত স্পেইনৰ মালাগাৰ পৰা ৰাজধানী চহৰ মাদ্ৰিদলৈ যোৱাৰ পথত এখন ৰে’ল লাইনচ্যুত হৈ কাষৰ ট্ৰেকত ওলোটা হৈ পৰে।
তীব্ৰ গতিৰ বাবে ৰে’লখনৰ কিছু অংশ ৰে’লপথৰ পৰা আঁতৰি যোৱাৰ পিছত কাষৰীয়া ট্ৰেকত বাগৰি পৰে। একে সময়তে মাদ্ৰিদৰ পৰা হুৱেলভালৈ যোৱা এখন ৰে’ল একেটা লাইনতে আহি আছিল। ফলত দুয়োখন ৰে’লৰ সংঘৰ্ষ হয়।
স্পেইনৰ ৰে’ল পৰিবহণ ব্যৱস্থা বহুলাংশে ব্যক্তিগত কোম্পানীসমূহৰ দ্বাৰা নিয়ন্ত্ৰিত। উক্ত কোম্পানীসমূহৰ পৰা পোৱা সূত্ৰ অনুসৰি, প্ৰথমে ৰে’লপথৰ পৰা বাগৰি পৰা ৰে’লখনত প্ৰায় ৩০০ যাত্ৰী আছিল। আনখন ৰে’লত প্ৰায় ১০০ জন যাত্ৰী আছিল। দুৰ্ঘটনা সংঘটিত হোৱাৰ লগে লগে উদ্ধাৰৰ কাম আৰম্ভ হয়। অৱশ্যে এই দুৰ্ঘটনাৰ কাৰণ স্পষ্ট হোৱা নাই। স্পেইনৰ পৰিবহণ মন্ত্ৰীয়ে কয় যে প্ৰথমখন ৰে’ল ৰে’লপথৰ পৰা ওলাই যোৱা ট্ৰেকত কোনো ভাঁজ নাছিল। ইয়াৰ পিছতো এই দুৰ্ঘটনাটোক তেওঁ বিস্ময়কৰ বুলি অভিহিত কৰে। স্পেইনৰ প্ৰধানমন্ত্ৰী পেড্ৰ’ ছানচেজে এই দুৰ্ঘটনাক লৈ শোক প্ৰকাশ কৰে।
