কৰ্কট আৰু মধুমেহ ৰোগৰ ঔষধকে ধৰি ৭১ বিধ অত্যাৱশ্যকীয় ঔষধৰ (Medicine) মূল্য নিৰ্ধাৰণ কৰিছে কেন্দ্ৰই। শেহতীয়াকৈ কেন্দ্ৰীয় চৰকাৰে গেজেট অধিসূচনা জাৰি কৰি এই সিদ্ধান্তৰ কথা ঘোষণা কৰিছে।
ঔষধৰ দাম নিয়ন্ত্ৰণ কৰা কেন্দ্ৰীয় সংস্থা ‘নেচনেল ফাৰ্মাচিউটিকেল প্ৰাইচিং অথৰিটি’য়ে (এন পি পি এ) এই মূল্য নিৰ্ধাৰণ কৰিছে। এই তালিকাত মেটাষ্টেটিক স্তন কেন্সাৰ আৰু গেষ্ট্ৰ’ কেন্সাৰৰ ঔষধো সন্নিবিষ্ট কৰা হৈছে। কিছুমান বিশেষ ঔষধ কোম্পানীয়ে প্ৰস্তুত কৰা ঔষধৰ ক্ষেত্ৰত এই নিয়ম কাৰ্যকৰী কৰা হৈছে।
‘ৰিলায়েন্স লাইফ ছায়েন্সেছ’ৰ দ্বাৰা নিৰ্মিত ‘ট্ৰাষ্টুজুমেব’ ঔষধ মেটাষ্টেটিক স্তন কেন্সাৰ আৰু গেষ্ট্ৰ’ কেন্সাৰৰ চিকিৎসাত ব্যৱহাৰ কৰা হয়। উক্ত ঔষধৰ দাম কেন্দ্ৰই নিৰ্ধাৰণ কৰিছে।
গেজেটৰ অধিসূচনা অনুসৰি উক্ত ঔষধৰ খুচুৰা মূল্য প্ৰতি চিচিত ১১,৯৬৬ টকা। ‘টৰেণ্ট ফাৰ্মাচিউটিকেলছ’ৰ দ্বাৰা নিৰ্মিত এবিধ ঔষধ পেপটিক আলচাৰৰ চিকিৎসাত ব্যৱহাৰ কৰা হয়। ক্লেৰিথ্ৰ’মাইচিন, ইছ’মেপ্ৰাজ’ল আৰু এমোক্সিচিলিনৰ সংমিশ্ৰণেৰে নিৰ্মিত এই ঔষধৰ প্ৰতিটো টেবলেটৰ মূল্য ১৬২.৫০ টকা নিৰ্ধাৰণ কৰা হৈছে।
ইয়াৰ উপৰি কিছুমান কোম্পানীয়ে প্ৰস্তুত কৰা ২৫ বিধ ডায়েবেটিছ প্ৰতিৰোধী ঔষধৰ (য’ত চিটাগ্লিপ্টিন অন্তৰ্ভুক্ত) মূল্যও নিৰ্ধাৰণ কৰা হৈছে। একাংশ কোম্পানীয়ে প্ৰস্তুত কৰা পেৰাচিটামল ঔষধৰ মূল্যও নিৰ্ধাৰণ কৰা হৈছে। ৪ জুলাইত প্ৰকাশিত গেজেট অধিসূচনাত কোৱা হৈছে যে এই ঔষধৰ মূল্য নিৰ্ধাৰণ কৰা হৈছে ঔষধৰ মূল্য নিয়ন্ত্ৰণ নিয়ম, ২০১৩ অনুসৰি।
এই কেন্দ্ৰীয় সংস্থাই ঔষধৰ খুচুৰা মূল্য নিৰ্ধাৰণ কৰে। ইয়াৰ পূৰ্বে এপ্ৰিল মাহত দেশত ৭৪৮ বিধ অত্যাৱশ্যকীয় আৰু গুৰুত্বপূৰ্ণ ঔষধৰ মূল্য বৃদ্ধি কৰা হৈছিল। পাইকাৰী মূল্য সূচকাংকৰ ভিত্তিত সেই ঔষধসমূহৰ মূল্য ‘এম আৰ পি’তকৈ ১.৭৪ শতাংশ বৃদ্ধিৰ সেউজ সংকেত দিছিল কেন্দ্ৰীয় সংস্থাটোৱে।
এই তালিকাত পেৰাচিটামল, কাহ, মধুমেহ, বাতবিষ, কৃমি, ৰক্তচাপ নিয়ন্ত্ৰণ, টোপনি, ভিটামিন, কোষ্ঠকাঠিন্য আদি সাধাৰণ ৰোগৰ ঔষধৰ লগতে গুৰুত্বপূৰ্ণ এণ্টিবায়টিককে ধৰি বিভিন্ন ৰোগৰ টেবলেট আৰু বেজীও সন্নিবিষ্ট কৰা হৈছিল।
ইয়াৰ পূৰ্বে যোৱা বছৰৰ অক্টোবৰ মাহত কেঁচামালৰ মূল্যবৃদ্ধিৰ বাবে কেন্দ্ৰীয় সংস্থাটোৱে হাঁপানী, গ্ল’ক’মা, থেলাছেমিয়া, যক্ষ্মা আৰু মানসিক ৰোগৰ ঔষধকে ধৰি আঠটা অত্যাৱশ্যকীয় ঔষধৰ মূল্য কমেও ৫০ শতাংশ বা তাতকৈ অধিক বৃদ্ধিৰ অনুমোদন জনাইছিল।
