বাংলাদেশৰ প্ৰাক্তন প্ৰধানমন্ত্ৰী শ্বেখ হাছিনাক (Sheikh Hasina) শাস্তি প্ৰদানৰ কথা ঘোষণা কৰিছে আন্তঃৰাষ্ট্ৰীয় অপৰাধ ন্যায়াধিকৰণে। আদালত অৱমাননাৰ গোচৰত ছমাহৰ কাৰাদণ্ড বিহা হৈছে তেওঁক। অৱশ্যে সশ্ৰম নহয়, সাধাৰণ কাৰাদণ্ড।
বাংলাদেশৰ আন্তঃৰাষ্ট্ৰীয় অপৰাধ ন্যায়াধিকৰণৰ তিনিজনীয়া বিচাৰপীঠে বুধবাৰে এই নিৰ্দেশ দিয়ে। ইয়াৰ নেতৃত্বত আছিল ন্যায়াধীশ মহম্মদ গোলাম মৰ্তুজা মজুমদাৰ। বাংলাদেশৰ সংবাদ মাধ্যম প্ৰথম আলোৱে এই তথ্য প্ৰকাশ কৰিছে।
ন্যায়াধীশ মৰ্তুজাৰ উপৰি আন্তঃৰাষ্ট্ৰীয় অপৰাধ ন্যায়াধিকৰণত ন্যায়াধীশ মহম্মদ চফিউল আলম মাহমুদ আৰু ন্যায়াধীশ মহম্মদ মহিতুল হক এনাম চৌধুৰীও অন্তৰ্ভুক্ত আছিল। হাছিনাক দোষী সাব্যস্ত কৰা আদালত অৱমাননাৰ গোচৰত আনজন অভিযুক্ত আছিল গোবিন্দগঞ্জৰ চাকিল আকন্দ বুলবুল ওৰফে মহম্মদ চাকিল আলম।
লগতে তেওঁকো দোষী সাব্যস্ত কৰা হয়। দুমাহৰ সাধাৰণ কাৰাদণ্ডৰ নিৰ্দেশ দিয়া হয়। যোৱা বছৰৰ ৫ আগষ্টত বাংলাদেশত তীব্ৰ গণ আন্দোলনৰ ৰোষত হাছিনাই প্ৰধানমন্ত্ৰীৰ পদ ত্যাগ কৰি বাংলাদেশ এৰি ভাৰতলৈ গুচি আহে।
তেতিয়াৰে পৰাই তেওঁ ভাৰতত আছে। তেওঁক প্ৰত্যৰ্পণ কৰিবলৈ নতুন দিল্লীৰ সৈতে যোগাযোগ কৰি আহিছে ঢাকাই। বাংলাদেশত হাছিনাৰ বিৰুদ্ধে কেইবাটাও গোচৰ চলি আছে। ক্ষমতাত থকাৰ সময়ত ক্ষমতাৰ অপব্যৱহাৰ কৰা বুলি অভিযোগ উত্থাপন হৈছে। তেওঁ বল প্ৰয়োগ কৰি বিৰোধীক দমন কৰিছিল।
এইবোৰৰ সৈতে জড়িত অভিযোগৰ বিচাৰ চলি আছে বাংলাদেশৰ আদালতত। হাছিনাক উৎখাত কৰাৰ পিছত বাংলাদেশত নোবেল বিজয়ী মহম্মদ ইউনুছৰ নেতৃত্বত এখন অন্তৱৰ্তীকালীন চৰকাৰ ক্ষমতালৈ আহে। চৰকাৰৰ লক্ষ্য হৈছে দেশত প্ৰয়োজনীয় সংস্কাৰ সাধন কৰি সাধাৰণ নিৰ্বাচন অনুষ্ঠিত কৰা।
ইতিমধ্যে বাংলাদেশৰ ৰাজনৈতিক দলসমূহে নিৰ্বাচনৰ বাবে হেঁচা প্ৰয়োগ কৰিবলৈ আৰম্ভ কৰিছে। অৱশ্যে অহা বছৰৰ এপ্ৰিলৰ পূৰ্বে বাংলাদেশত সাধাৰণ নিৰ্বাচন অনুষ্ঠিত কৰাৰ কোনো সম্ভাৱনা নাই বুলি উল্লেখ কৰিছে ইউনুছে। এপ্ৰিলৰ আৰম্ভণিতে হ’ব পাৰে নিৰ্বাচন। বি এন পিকে ধৰি বিৰোধীয়ে এই ঘোষণাৰ বিৰোধিতা কৰিছে। ডিচেম্বৰ মাহত নিৰ্বাচনৰ দাবী জনাইছে।
নিৰ্বাচনক লৈ সৃষ্টি হোৱা উত্তেজনাৰ সমান্তৰালভাৱে হাছিনাৰ বিৰুদ্ধেও গোচৰ চলি আছে। তেনে এটা গোচৰত হাছিনাক শাস্তি দিয়াৰ কথা বুধবাৰে ঘোষণা কৰা হয়।
