শেহতীয়াকৈ পহেলগামত পৰ্যটকৰ (Pahalgam Attack) ওপৰত সন্ত্ৰাসবাদী আক্ৰমণৰ পিছতে সমগ্ৰ জম্মু-কাশ্মীৰত নিৰাপত্তা বাহিনীয়ে সন্ত্ৰাস বিৰোধী অভিযান তীব্ৰতৰ কৰি তুলিছে। কাশ্মীৰ উপত্যকাৰ কুপৱাৰা, শ্ৰীনগৰ, গণ্ডাৰৱাল, বাৰামুল্লাকে ধৰি কমেও ১০টা স্থানত তালাচী চলাই আছে ৰাজ্যিক অনুসন্ধান সংস্থাই।
কিন্তু শনিবাৰে বিয়লিলৈকে এই তালাচী অভিযানৰ পৰা কোনো লোকক গ্ৰেপ্তাৰ বা জব্দ কৰাৰ খবৰ পোৱা হোৱা নাই। ২২ এপ্ৰিলৰ পহেলগাম আক্ৰমণৰ পিছত দক্ষিণ কাশ্মীৰৰ নিৰ্দিষ্ট অঞ্চলত লক্ষ্য নিৰ্ধাৰণ কৰি অভিযান চলাই থকা বুলি নিৰাপত্তা সংস্থাই অৱগত কৰিছে।
বিগত তিনিদিনত মুঠ ৬ জন সন্ত্ৰাসবাদী নিহত হৈছে। মঙলবাৰে শ্বপিয়ানৰ কিলাৰ অঞ্চলত আৰু বৃহস্পতিবাৰে পুলৱামাৰ ট্ৰালৰ নাদেৰত দুটা পৃথক সংঘৰ্ষত মুঠ ছয়জন সন্ত্ৰাসবাদী নিহত হয়।
নিহতসকলৰ ভিতৰত এজন হৈছে একাধিক আক্ৰমণৰ সৈতে জড়িত শ্বাহিদ কুট্টে। ইয়াৰ ভিতৰত ২০২৩ চনৰ ১৮ মে’ত শ্বপিয়ানৰ হিৰপোৰাত এজন গাঁওবুঢ়াক হত্যা কৰা আৰু ৮ এপ্ৰিলত ডেনিছ ৰিজ’ৰ্টত সংঘটিত গুলীচালনা, য’ত দুজন জাৰ্মান পৰ্যটক আৰু এজন চালক আহত হয়।
