পহেলগাম সন্ত্ৰাসবাদী আক্ৰমণৰ ঘটনা সন্দৰ্ভত মুখ্যমন্ত্ৰী ডঃ হিমন্ত বিশ্ব শৰ্মাৰ (CM Himanta Biswa Sarma) গুৰুত্বপূৰ্ণ ঘোষণা। বৃহস্পতিবাৰে পহেলগামৰ সন্ত্ৰাসবাদী আক্ৰমণৰ ঘটনাৰ পিছত বিধায়ক অমিনুল ইছলামে আগবঢ়োৱা বিতৰ্কিত মন্তব্যৰ বাবে তেওঁক নগাঁও আৰক্ষীয়ে গ্ৰেপ্তাৰ কৰাৰ পিছত এই ঘোষণা কৰিছে মুখ্যমন্ত্ৰীয়ে।
সামাজিক মাধ্যমত দিয়া এটা পোষ্টত মুখ্যমন্ত্ৰীয়ে কয় যে সন্ত্ৰাসবাদী ঘটনাক পৰোক্ষ বা প্ৰত্যক্ষভাৱে সমৰ্থন জনোৱা কোনো ব্যক্তিকে ৰেহাই দিয়া নহ’ব।
মুখ্যমন্ত্ৰীয়ে কয়, “পেহেলগামত পাকিস্তানৰ পৃষ্ঠপোষকতাত সংঘটিত ভয়ংকৰ সন্ত্ৰাসবাদী আক্ৰমণৰ ঘটনাক প্রত্যক্ষ বা পৰোক্ষভাৱে সমর্থন কৰা যিকোনো ব্যক্তিৰ বিৰুদ্ধে অসমে সম্ভৱপৰ শক্তিশালী ব্যৱস্থা গ্ৰহণ কৰিব।
ৰাজ্যৰ মাননীয় বিধায়ক আমিনুল ইছলামে যি বিৰূপ বক্তব্য প্ৰদান কৰিছে, এয়া নিশ্চিতভাৱে দেশবিৰোধী আৰু আমি এনে মানসিকতাক কাহানিও প্রশ্রয় নিদিওঁ৷ ভাৰতবৰ্ষৰ কোনো নাগৰিকে সন্ত্ৰাসবাদক প্ৰশ্ৰয় দিব সেয়া কোনো কাৰণতে গ্ৰহণযোগ্য হ’ব নোৱাৰে৷”
মুখ্যমন্ত্ৰীয়ে লগতে কয়, “এই কথা সকলোৱে স্পষ্টকৈ জনা উচিত– যিসকলে নিৰীহ নাগৰিকসকলৰ নিৰ্মম হত্যাক ন্যায়সংগত, স্বাভাৱিক বুজাবলৈ চেষ্টা কৰি আছে, তেওঁলোকে বাক-স্বাধীনতা প্ৰয়োগৰ নামত প্রকৃততে নিজ দেশৰ অর্থাৎ ভাৰতৰ আত্মাৰ বিৰুদ্ধে থিয় দিছে।”
