মঙলবাৰে জম্মু-কাশ্মীৰৰ পহেলগামত সংঘটিত হয় ভয়ানক সন্ত্ৰাসবাদী আক্ৰমণৰ (Pahalgam Attack) ঘটনা। এই ঘটনাত নিহত হয় দেশৰ বিভিন্ন প্ৰান্তৰ ২৬ জন লোক। আনহাতে, আন কেইবাজনো লোক আহত হয় তেওঁলোক আছিল পৰ্যটক।
এই ঘটনাৰ পিছতে কেন্দ্ৰীয় গৃহমন্ত্ৰী অমিত শ্বাহ মঙলবাৰে নিশা ততাতৈয়াকৈ শ্ৰীনগৰলৈ ৰাওনা হয়। প্ৰধানমন্ত্ৰী নৰেন্দ্ৰ মোদীয়েও তেওঁৰ চৌদি আৰব ভ্ৰমণ আধাতে সামৰি বুধবাৰে পুৱা দেশলৈ উভতি আহে।
আনহাতে, এই ঘটনাক সকলোৱে তীব্ৰ ভাষাৰে গৰিহণা দিছে। বিদেশৰ পৰাও এই ঘটনাত দুখ প্ৰকাশ কৰি বিশ্ব নেতাসকলে গৰিহণা দিছে।
ইফালে বুধবাৰে শ্ৰীনগৰত নিহত লোকসকললৈ অন্তিম শ্ৰদ্ধা জনায় গৃহমন্ত্ৰী অমিত শ্বাহে। তেওঁ ইয়াৰ ফটো নিজৰ এক্স হেণ্ডেলত প্ৰকাশ কৰে।
আনহাতে, পহেলগামৰ এই বৰ্বৰ ঘটনাক তীব্ৰ ভাষাৰে গৰিহণা দিছে মুখ্যমন্ত্ৰী ডঃ হিমন্ত বিশ্ব শৰ্মাই। অমিত শ্বাহৰ কেইখনমান ফটো নিজৰ ছচিয়েল মিডিয়া একাউণ্টত শ্বেয়াৰ কৰি মুখ্যমন্ত্ৰীয়ে লিখিছে, “এই ছবিসমূহ অত্যন্ত হৃদয় বিদাৰক আৰু ই দেশৰ বিবেকক জোকাৰি গৈছে।
মাননীয় শ্ৰীঅমিত শ্বাহ ডাঙৰীয়াৰ সৈতে অসমৰ ৰাইজৰ হৈ আমিও মৃতকৰ বিদেহ আত্মাৰ চিৰশান্তিৰ বাবে প্ৰাৰ্থনা আগবঢ়াইছোঁ।” মুখ্যমন্ত্ৰীয়ে লগতে লিখিছে, ” এই জঘন্য আক্ৰমণৰ নিশ্চিতভাৱে উচিত ব্যৱস্থা লোৱা হ’ব আৰু অপৰাধীসকলক কাহানিও ৰেহাই দিয়া নহ’ব।”
