উপ-নিৰ্বাচন অনুষ্ঠিত হোৱা অসমৰ (Assam) পাঁচ বিধানসভা সমষ্টিৰ ভোটগণনা আৰম্ভ হৈছে। ১৩ নৱেম্বৰত ভোটগ্ৰহণ অনুষ্ঠিত হোৱা সমষ্টিকেইটা হৈছে বিহালী, বঙাইগাঁও, ধলাই, চামগুৰি আৰু চিদলী। এই পাঁচটা সমষ্টিত মুঠ ৩৪ গৰাকী প্ৰাৰ্থীৰ আজি ভাগ্য নিৰ্ণয় হ’ব।
পাঁচটা সমষ্টিৰ মুঠ ভোটাৰৰ সংখ্য়া হৈছে ৯,০৯,০৫৭ গৰাকী। ইয়াৰে ভিতৰত ধলাই (এছ চি) সমষ্টিত ১,৯৬,৭৭২ গৰাকী, চিদলী সমষ্টিত (এছ টি) ২,১৭,১৮৩ গৰাকী, বঙাইগাঁও সমষ্টিত ১,৮২,৩৫৪ গৰাকী, বিহালী সমষ্টিত ১,৩২,৩০০ গৰাকী আৰু চামগুৰি সমষ্টিত ১,৮০,৪৪৮ গৰাকী ভোটাৰ আছে।
আনহাতে, ধলাইত ২০৮ টা, চিদলীত ২৭৩ টা, বঙাইগাঁৱত ২৪৬ টা, বিহালীত ১৫৪ টা আৰু চামগুৰিত ১৯৭ টা ভোটকেন্দ্ৰকে ধৰি মুঠ ১,০৭৮ টা ভোটকেন্দ্ৰত ভোটগ্ৰহণ অনুষ্ঠিত হয় ৷ ইয়াৰে ভিতৰত বঙাইগাঁও সমষ্টিত ৭৭.৮৯ শতাংশ, চিদলীত ৭৫.৪৭ শতাংশ, বিহালীত ৭৫.৭৯ শতাংশ, চামগুৰিত ৭৯.৫৫ শতাংশ আৰু ধলাই সমষ্টিত ৭০.৩১ শতাংশ ভোটদান হৈছিল।
আনহাতে, বঙাইগাঁৱত আঠগৰাকী প্ৰাৰ্থী অৱতীৰ্ণ হৈছিল। তেওঁলোক হৈছে অগপৰ দীপ্তিময়ী চৌধুৰী, কংগ্ৰেছৰ ব্ৰজেনজিৎ সিংহ, এছ ইউ চি আইৰ মৃত্যুঞ্জয় ৰাভা, নিৰ্দলীয় শৈলেন্দ্ৰ সৰকাৰ, নিৰ্দলীয় অনুপ কুমাৰ কৰ্মকাৰ, নিৰ্দলীয় ভদ্ৰেশ্বৰ বৰ্মন, নিৰ্দলীয় গৌতম ৰায় আৰু নিৰ্দলীয় প্ৰাৰ্থী দীপক দাস।
চিদলী সমষ্টিত নিৰ্বাচনত অৱতীৰ্ণ হোৱা তিনিগৰাকী প্ৰাৰ্থী হৈছে ইউ পি পি এলৰ প্ৰাৰ্থী নিৰ্মল কুমাৰ ব্ৰক্ষ্ম, বি পি এফৰ প্ৰাৰ্থী শুদ্ধ কুমাৰ বসুমতাৰী আৰু কংগ্ৰেছৰ প্ৰাৰ্থী সঞ্জীৱ ৱাৰী।
বিহালী সমষ্টিত অৱতীৰ্ণ হোৱা চাৰিগৰাকী প্ৰাৰ্থী হৈছে বিজেপিৰ দিগন্ত ঘাটোৱাৰ, কংগ্ৰেছৰ জয়ন্ত বৰা, চি পি আই এম এলৰ লক্ষীকান্ত কুৰ্মী আৰু আম আদমি পাৰ্টীৰ অনন্ত গগৈ। চামগুৰিত নিৰ্বাচনত অৱতীৰ্ণ হৈছিল ১১ গৰাকী প্ৰাৰ্থী।
তেওঁলোক হৈছে বিজেপিৰ দিপ্লুৰঞ্জন শৰ্মা, কংগ্ৰেছৰ তানজিল হুছেইন, আম আদমি পাৰ্টীৰ নুৰুল আমিন চৌধুৰী, এছ ইউ চি আইৰ আব্দুছ চবুৰ মিঞা, ভাৰতীয় গণ পৰিষদৰ বীৰেন বসাক, ৰাষ্ট্ৰীয় উলামা কাউন্সিলৰ ৰবুল হক, নিৰ্দলীয় ফাতেমা খাতুন, শশী তাঁতী, জেহিৰুল ইছলাম, মুচাব্বিৰ আলী আহমেদ আৰু আব্দুল মাজিদ।
আনহাতে, ধলাই সমষ্টিত নিৰ্বাচনত অৱতীৰ্ণ হোৱা আঠগৰাকী প্ৰাৰ্থী হৈছে বিজেপিৰ নিহাৰ ৰঞ্জন দাস, কংগ্ৰেছৰ ধ্ৰুৱজ্যোতি পুৰুকায়স্থ, এছ ইউ চি আইৰ গৌৰ চন্দ্ৰ দাস, নিৰ্দলীয় অমলেন্দু দাস, ধীৰাজ দাস, দিলীপ কুমাৰ ধুবী, পৰিমল দাস আৰু ৰাজু দাস।
