ক’লা যাদুৰ বলি হৈ এটি ডেৰ বছৰীয়া শিশুক বলি দি বুকু ফালি কলিজা উলিয়াই আনি খালে মাতৃয়ে (Mother Killed Baby)। তাৰ পিছত তান্ত্ৰিককো প্ৰসাদ হিচাপে খুৱালে সেই মাংস। এই ভয়ংকৰ ঘটনা সংঘটিত হৈছে বিহাৰৰ পালামৌৰ খাদৰপাৰ গাঁৱত।
মহিলাগৰাকীৰ নাম গীতা দেৱী। জানিব পৰা মতে তেওঁ পালামৌৰ খাদৰপাৰ গাঁৱৰ বাসিন্দা। কেৱল শিশু কন্যাক হত্যা কৰি খোৱাই নহয়, বলিদানৰ পিছত তেওঁ নাচিলে উদ্যম নৃত্য। তেওঁৰ মতে এনে কাম কৰিলে পৰিয়ালটোৰ আৰ্থিক অৱস্থা উন্নত হ’ব। ঈশ্বৰে তেওঁক অলৌকিক শক্তি প্ৰদান কৰিব।
১২ নৱেম্বৰৰ নিশা সংঘটিত হয় এই নৃশংস ঘটনা। সেইদিনা সন্ধিয়া গাঁওখনৰ বাসিন্দা অৰুণ ৰামৰ পত্নী গীতা দেৱীয়ে শিশুটিক লৈ ঘৰৰ পৰা ওলাই যায়। ফোনত স্বামীক কয় যে তেওঁ স্থানীয় বজাৰলৈ গৈ আছে। গীতাৰ স্বামীয়ে দিল্লীত কাম কৰে। গীতাই শাহুৱেক আৰু চাৰিটা সন্তানৰ সৈতে ঘৰতে থাকে। প্ৰায় মাজনিশা গীতা উলংগ হৈ ঘৰলৈ উভতি আহে।
সেই অৱস্থাত তেওঁক দেখি পৰিয়ালৰ লোকৰ সন্দেহত হয়। তাৰ পিছত পৰিয়ালটোৱে জানিব বিচাৰে ছোৱালীজনী ক’ত আছে। গীতাই প্ৰথমে মুখ খুলিব বিচৰা নাছিল। পিছত হেঁচাত পৰি তেওঁ নিজৰ কন্যাক হত্যা কৰা বুলি কয়। তন্ত্ৰসাধনৰ অংশ হিচাপে সেয়া কৰা বুলি কয়।
লগে লগে পৰিয়ালৰ লোকে আৰক্ষীক অৱগত কৰে। তাৰ পিছত আৰক্ষীয়ে গ্ৰেপ্তাৰ কৰে গীতা দেৱীক। এই নৃশংস কাৰ্যত জড়িত তান্ত্ৰিকক বিচাৰি আছে আৰক্ষীয়ে। জানিব পৰা মতে তান্ত্ৰিকজন বিহাৰৰ সাছাৰামৰ বাসিন্দা। তন্ত্ৰ-মন্ত্ৰৰ জৰিয়তে তেওঁ গাঁৱৰ মানুহক প্ৰভাৱিত কৰিছিল।
তেওঁ কৈছিল যে এই সাধনা কৰিলে বহু ফল পোৱা যায়। গীতাদেৱীয়ে আৰক্ষীক জনায় যে যদিহে তেওঁ ধৰা নপৰে, তেন্তে পিছদিনা তেওঁৰ নিজৰ শৰীৰত জন্ম হোৱা শক্তিৰ পৰাই তেওঁ ছোৱালীজনীক বচাব পাৰিলেহেঁতেন। এই ঘটনাত গাঁৱৰ ৰাইজ স্তম্ভিত হৈ পৰে।
