দিল্লীৰ পৰা লণ্ডন অভিমুখী ভিস্তাৰা বিমানত (Vistara) বোমাতঙ্ক। যাৰ বাবে জাৰ্মানীৰ ফ্ৰেংকফৰ্টত নমাই দিয়া হয় যাত্ৰীসকলক। প্ৰয়োজনীয় সুৰক্ষা পৰীক্ষাৰ অন্তত বিমানখনক পুনৰ গন্তব্য স্থানলৈ প্ৰেৰণ কৰা হ’ব। উল্লেখ্য যে বিগত কিছুদিনত ৪০ খনতকৈও অধিক ভাৰতীয় বিমানে বোমাৰ ভাবুকি লাভ কৰিছে।
শুকুৰবাৰে পুৱা দিল্লীৰ পৰা লণ্ডন অভিমুখে ৰাওনা হৈছিল ভিষ্টাৰাৰ বিমান UK17। কিন্তু মাজআকাশত বোমাৰ ভাবুকি পাইলটৰ কাণত পৰে। ছ’চিয়েল মিডিয়াত বিয়পি পৰে বিমানখনত বোমা থকা বুলি। ফলত যাত্ৰীসকলৰ সুৰক্ষাৰ কথা বিবেচনা কৰি পাইলটে জৰুৰীকালীন অৱতৰণৰ সিদ্ধান্ত লয়। যাৰ বাবে জাৰ্মানীৰ ওচৰৰ ফ্ৰেংকফৰ্ট চহৰত অৱতৰণ কৰে বিমানখন।
শনিবাৰে পুৱা বিমান সংস্থাটোৱে জনোৱা মতে, লণ্ডন অভিমুখী বিমানখন নিৰ্বিঘ্নেই ফ্ৰেংকফৰ্টত অৱতৰণ কৰে। চলি আছে নিৰাপত্তা পৰীক্ষা। নিৰাপত্তা সংস্থাৰ পৰা সেউজ সংকেত পোৱাৰ পিছত বিমানখনে পুনৰ লণ্ডনলৈ যাত্ৰা আৰম্ভ কৰিব।
উল্লেখ্য, শুকুৰবাৰে এখন ঘৰুৱা বিমানেও বোমাৰ ভাবুকি লাভ কৰিছিল। বেংগালুৰুৰ পৰা মুম্বাইগামী আলাস্কা এয়াৰৰ QP1366 বিমানখনলৈ উৰণৰ কিছু মুহূৰ্তৰ পূৰ্বে এই ভাবুকি আহিছিল। উক্ত বিমানখনতো বোমা থকাৰ খবৰ পোৱা গৈছিল। সেই সময়ত সকলো যাত্ৰী বিমানত উঠিছিল।
কিন্তু খৰধৰকৈ তেওঁলোকক বিমানৰ পৰা নমাই দিয়া হয়। ইয়াৰ পিছতে বিমানবন্দৰত উপস্থিত থকা নিৰাপত্তাৰক্ষীয়ে বিমানখনত তালাচী চলায় যদিও তাত অৱশ্যে কোনো বোমা পোৱা নগ’ল। পিছত বিমানখনে যাত্ৰীসকলৰ সৈতে উৰা মাৰে।
