ঝাৰখণ্ড মুক্তি মৰ্চা (জেএমএম) এৰিবলৈ ওলাইছে যদিও কোনো ৰাজনৈতিক দলত যোগদান নকৰে ঝাৰখণ্ডৰ প্ৰাক্তন মুখ্যমন্ত্ৰী চম্পাই সোৰেনে (Champai Soren)। বুধবাৰে তেওঁ নিজেই এই কথা ঘোষণা কৰে। লগতে আগন্তুক বিধানসভা নিৰ্বাচনৰ পূৰ্বে নতুন দল গঠন কৰিব বুলিও কয়।
বুধবাৰে চম্পায়ে কয়, “মই তিনিটা বিকল্পৰ বিষয়ে কথা পাতিলোঁ। অৱসৰ, সংগঠন আৰু সংগী। মই ৰাজনীতিৰ পৰা অৱসৰ লোৱা নাই। নতুন দল এটা গঠন কৰি বন্ধুবৰ্গৰ সৈতে আগবাঢ়ি যাম। মোৰ দুৱাৰ সকলোৰে বাবে মুকলি।” উল্লেখ্য যে চম্পাই সোৰেন বৰ্তমানো কাগজে-কলমে মুখ্যমন্ত্ৰী হেমন্ত সোৰেনৰ মন্ত্ৰীসভাৰ সদস্য তথা জেএমএমৰ বিধায়ক।
অৱশ্যে হেমন্ত সোৰেনৰ সৈতে হোৱা মতানৈক্যৰ বাবে তেওঁ যোৱা সপ্তাহত জেএমএম ত্যাগ কৰাৰ ইংগিত দিছিল। আনকি দিল্লীলৈ গৈ বিজেপিৰ কেন্দ্ৰীয় নেতাসকলকো সাক্ষাৎ কৰিছিল।
উল্লেখ্য যে চলিত বৰ্ষৰ শেষৰ ফালে ঝাৰখণ্ডত বিধানসভা নিৰ্বাচন অনুষ্ঠিত হোৱাৰ কথা। ৰাজনৈতিক পৰ্যবেক্ষকৰ মতে তাৰ পূৰ্বে চম্পাই সোৰেনৰ দলত্যাগে জেএমএম-কংগ্ৰেছ-আৰজেডি মিত্ৰতা বিপদত পেলাব পাৰে।
ঝাৰখণ্ডৰ প্ৰাক্তন মুখ্যমন্ত্ৰীগৰাকীয়ে জেএমএমৰ নেতৃত্বৰ সৈতে তিক্ততা আৰু অসন্মান হোৱাৰ বাবে নতুন ৰাজনৈতিক পথত নামিছে বুলি উল্লেখ কৰিছে। একে সময়তে চম্পায়ে তেওঁৰ ৰাজনৈতিক গুৰু আৰু হেমন্তৰ পিতৃ শিবু সোৰেনক ধন্যবাদ জনাই কয় যে গুৰুজীৰ নেতৃত্বতেই আমি জনসাধাৰণৰ স্বাৰ্থত ঝাৰখণ্ডৰ পৃথক ৰাজ্যৰ আন্দোলন আৰম্ভ কৰিছিলো।
