তৃতীয়বাৰৰ বাবে দেশৰ প্রধানমন্ত্রী পদত শপত গ্রহণ কৰিবলৈ আগবাঢ়িছে নৰেন্দ্র মোদী (Narendra Modi) । আজি সন্ধ্যা ৰাষ্ট্রপতি ভৱনত আয়োজিত এক অনুষ্ঠানত শপত গ্ৰহণ কৰিব মোদীয়ে। তাৰ পূৰ্বে দেওবাৰে পুৱা মোদীয়ে ৰাজঘাটলৈ গৈ মহাত্মা গান্ধীৰ স্মৃতিসৌধত শ্রদ্ধা জ্ঞাপন কৰে।
ইয়াৰ পিছত প্রাক্তন প্রধানমন্ত্রী অটলবিহাৰী বাজপেয়ীৰ স্মৃতিসৌধ ‘সদৈব অটল’ত গৈয়ো বিজেপিৰ প্ৰথমগৰাকী প্ৰধানমন্ত্ৰীক শ্রদ্ধা জ্ঞাপন কৰে মোদীয়ে। তেওঁৰ আগত আছিল প্রতিৰক্ষা মন্ত্রী ৰাজনাথ সিং। গান্ধী আৰু বাজপেয়ীক শ্রদ্ধা জ্ঞাপনৰ পিছত তেওঁলোকে ৰাজধানীৰ ৰাষ্ট্ৰীয় যুদ্ধ স্মাৰকত শ্ৰদ্ধাঞ্জলি জনায়।
আনহাতে, দেওবাৰে পুৱা মোদীৰ বাসগৃহত এক চাহ মেলৰ আয়োজন কৰা হৈছে। তাত মোদীৰ সৈতে সম্ভাৱ্য মন্ত্রীসকলে যোগ দিব বুলি সূত্রত প্ৰকাশ। ইতিমধ্যে তেওঁলোকক আমন্ত্রণ জনোৱা হৈছে।
উল্লেখ্য, দেওবাৰে সন্ধ্যা ৭.১৫ বজাত প্রধানমন্ত্রী হিচাবে শপত গ্রহণ কৰিব মোদীয়ে। তেওঁক শপতবাক্য পাঠ কৰাব ৰাষ্ট্রপতি দ্রৌপদী মুর্মুৱে। এই অনুষ্ঠানত উপস্থিত থাকিব বাংলাদেশৰ প্রধানমন্ত্রী শ্বেখ হাচিনা, শ্রীলঙ্কাৰ ৰাষ্ট্ৰপতি ৰনিল বিক্রমসিঙ্ঘে, মালদ্বীপৰ ৰাষ্ট্ৰপতি মহম্মদ মুইজ্জুসহ একাধিক ৰাষ্ট্রনেতা।
