বহু নিৰ্বাচনৰ ভৱিষ্যত নিৰ্ণয় কৰিলে যদিও ভোটকৌশলী প্ৰশান্ত কিশোৰে (Prasanta Kishore) ২০২৪ চনৰ লোকসভা নিৰ্বাচনৰ ভৱিষ্যদ্বাণী মিলাব নোৱাৰিলে। নিৰ্বাচনৰ ফলাফল ঘোষণাৰ তিনিদিন পিছত অৱশেষত ‘ভুল’ মানি ল’লে প্ৰশান্তই। একে সময়তে ঘোষণা কৰে যে আৰু কোনো দিনেই তেওঁ নিৰ্বাচনৰ ভৱিষ্যদ্বাণী নকৰে।
২০২৪ চনৰ লোকসভা নিৰ্বাচনৰ সময়ত সমীক্ষাকাৰী প্ৰশান্তই এই ফলাফলৰ ভৱিষ্যদ্বাণী কৰিছিল। ২১ মে’ত যেতিয়া দেশত পঞ্চম পৰ্যায়ৰ ভোটগ্ৰহণ সমাপ্ত হয়, তেতিয়া প্ৰশান্তই এক সাক্ষাৎকাৰত কয় যে বিজেপিয়ে ২০১৯ চনৰ ‘কাৰ্য্যক্ষমতা’ বজাই ৰাখিব। ২০১৯ চনত ৫৪৩খন আসনৰ ভিতৰত কেৱল বিজেপিয়েই ৩০৩খন আসন লাভ কৰিছিল।
বিজেপি নেতৃত্বাধীন এন ডি এয়ে লাভ কৰে ৩৩৬খন আসন। প্ৰশান্তই কয়, বিজেপিয়ে ৪০০ পাৰ হোৱাৰ কথা যিমানেই নকওক কিয়, মই নাভাবো যে সেয়া সম্ভৱ। সেইটো কৰিবলৈ বিজেপিয়ে ৩৭০খন আসন লাভ কৰিব লাগিব। তেনেকুৱা কৰিব নোৱাৰে। কিন্তু মই ভাবো বিজেপি ২৭০ৰ তললৈ নাযায়। মই ভাবো তেওঁলোকে ২০১৯ চনৰ ফলাফল ধৰি ৰাখিব।”
এতিয়া তেওঁ কয়, “হয়, মোৰ ভুল হ’ল। এজন ভোটকোশলী হিচাপে ভুল হৈছিল। মই সেই ভুলটো মানি লৈছোঁ।” এটা সাক্ষাৎকাৰত প্ৰশান্তই পোনপটীয়াকৈ কয়, “নিৰ্বাচনত আসনৰ সম্ভাৱ্য সংখ্যাৰ বিষয়ে মই আৰু কেতিয়াও কোনো ভৱিষ্যদ্বাণী নকৰো। মই মোৰ বিশ্লেষণ দিলোঁ। আৰু আজি মই কেমেৰাৰ সন্মুখত স্বীকাৰ কৰিছো যে মোৰ বিশ্লেষণ ভুল আছিল। কেৱল ভুল নহয়, ২০ শতাংশ নম্বৰৰ পাৰ্থক্য আছিল।”
কিন্তু একে সময়তে প্ৰশান্তই কয়, “মই এজন ভোটকোশলী। মোৰ কাম হৈছে ভোটৰ ৰণকৌশল ঠিক কৰা। সাধাৰণতে মই ভোটদানৰ ফলাফলৰ বিষয়ে ভৱিষ্যদ্বাণী নকৰো। এইবাৰো কৰা উচিত নাছিল।
যোৱা দুবছৰত এই সংখ্যাটোক লৈ দুবাৰকৈ মূৰ ঘামোৱাৰ ভুল কৰিলোঁ। ইয়াৰ পূৰ্বে মই পশ্চিমবংগৰ বিধানসভা নিৰ্বাচনত কৰিছিলোঁ (যদিও পশ্চিমবংগত বিধানসভাৰ নিৰ্বাচন তিনিবছৰ আগতে হৈছিলস ২০২১ চনত)। আৰু এইবাৰ ২০২৪ চনৰ লোকসভা নিৰ্বাচনত। কিন্তু সংখ্যাটো বাদ দিলে দেখিব যে মই কোৱা কথাখিনিত কোনো ভুল হোৱা নাছিল।”
