“মই নিশ্চিত যে মই জৈৱিকভাৱে জন্ম লোৱা নাই। ঈশ্বৰে মোক পঠিয়াইছে। কিছু বিশেষ কাম কৰিবলৈ পঠিওৱা হৈছে।” আজি পুনৰবাৰ নৰেন্দ্ৰ মোডীয়ে (PM Modi) এই কথা উল্লেখ কৰি কয় যে ভগৱানে তেওঁক ২০৪৭ চনত ‘উন্নত ভাৰত’ৰ লক্ষ্য পূৰণৰ বাবে পঠিয়াইছে। যেতিয়ালৈকে সেই লক্ষ্য পূৰণ নহ’ব, তেতিয়ালৈকে ভগৱানে তেওঁক উভতাই নিব নোৱাৰে।
আনহাতে, ৰাহুল গান্ধীয়ে ইয়াৰ প্ৰতিক্ৰিয়া প্ৰকাশ কৰি কয় যে যদি মোডীক ভগৱানে পঠিয়াইছিল, তেন্তে কোভিডৰ সময়ত গংগাত মৃতদেহ ওপঙি থকাৰ সময়ত, চিকিৎসালয়ৰ সন্মুখত মৃতদেহবোৰ গোট খাই থকাৰ সময়ত তেওঁ কিয় বাচন বজাবলৈ কৈছিল। যাক পৰমত্মাই পঠিয়াইছে তেওঁ কৈছিল, মোবাইলৰ লাইট জ্বলাওক।
ভগৱানে যাক পঠিয়াইছে, কিয় তেওঁ কেৱল আদানী, আম্বানীৰ দৰে দেশৰ ২২জন কোটিপতিৰ বাবে কাম কৰে? কংগ্ৰেছ নেতাসকলে লগতে কটাক্ষ কৰে, মোডীয়ে ইমান দিনে নিজকে ঈশ্বৰৰ দূত বুলি মানিছিল। এতিয়া তেওঁ ইচ্ছামৃত্যুৰ শক্তি থকা বুলিও দাবী কৰিছে।
উল্লেখ্য যে শেহতীয়াকৈ বাৰাণসীত দিয়া এক সাক্ষাৎকাৰত নৰেন্দ্ৰ মোডীক সোধা হৈছিল, তেওঁ ইমান শক্তি ক’ৰ পৰা পায়? নৰেন্দ্ৰ মোডীয়ে তাৰ উত্তৰত কয়, “মা জীয়াই থকালৈকে মই অনুভৱ কৰিছিলো যে মই এটা জৈৱিক প্ৰক্ৰিয়াত জন্ম লৈছো। কিন্তু মা যোৱাৰ পিছত মোৰ অভিজ্ঞতাৰ ভিত্তিত ক’ব পাৰো যে ভগৱানে মোক পঠিয়াইছে। সেইবাবেই ইমান কামৰ সজীৱতা। মোৰ এটা কাম আছে। সেইবাবেই মোক পঠোৱা হ’ল।”
ইলেক্ট্ৰনিক মিডিয়াৰ এক অনুষ্ঠানত ভাষণ দি ৭৩ বছৰীয়া নৰেন্দ্ৰ মোডীয়ে কয়, “২০৪৭ চনত এখন উন্নত ভাৰতৰ দৃষ্টিভংগী পূৰণ কৰিবলৈ ভগৱানে মোক পঠিয়াইছে। মোৰ সম্পূৰ্ণ বিশ্বাস আছে, সেই লক্ষ্য পূৰণ নোহোৱালৈকে ভগৱানে মোক উভতাই নিনিয়ে।” উল্লেখ্য যে ২০৪৭ চনত নৰেন্দ্ৰ মোডীৰ বয়স হ’ব ৯৬ বছৰ।
