কয়দীসকল কেনেকৈ গৰ্ভৱতী হয় এই সন্দৰ্ভত পশ্চিমবংগৰ এটা গোচৰ উচ্চতম ন্যায়ালয়ে (Supreme Court) স্বতঃপ্ৰণোদিতভাৱে গ্ৰহণ কৰিছিল। এই গোচৰটো সন্দৰ্ভত এতিয়া সকলো ৰাজ্যৰ পৰা প্ৰতিবেদন বিচৰা হৈছে। দেশৰ শীৰ্ষ আদালতে কাৰাগাৰত থকা মহিলাসকলৰ অৱস্থাৰ বিষয়েও জানিব বিচাৰিছে। সকলো ৰাজ্যই এই তথ্য প্ৰতিবেদন আকাৰে প্ৰদান কৰিব লাগিব। শীৰ্ষ ন্যায়ালয়ে এই সন্দৰ্ভত সকলো ৰাজ্যকে জাননী জাৰি কৰিছে।
উচ্চতম ন্যায়ালয়ে শুকুৰবাৰে কাৰাগাৰত মহিলা কয়দীসকলৰ গোচৰৰ শুনানি গ্ৰহণ কৰে। ন্যায়াধীশ হিমা কোহলী আৰু আছানুদ্দিন আমানুল্লাহৰ বিচাৰপীঠে গোচৰটোত এখন সমিতি গঠনৰ নিৰ্দেশ দিয়ে। সমিতিখনে ৰাজ্যিক কাৰাগাৰত মহিলা কয়দীসকলৰ অৱস্থা আৰু তেওঁলোকৰ বাবে কেনেধৰণৰ সেৱা উপলব্ধ আছে সেই বিষয়ে অনুসন্ধান কৰিব।
উল্লেখযোগ্য যে তাপস ভঞ্জে নামৰ এগৰাকী ব্যক্তিয়ে কাৰাগাৰৰ ভিতৰত মহিলা কয়দীসকলৰ অৱস্থাৰ প্ৰতি কলিকতা উচ্চ ন্যায়ালয়ৰ দৃষ্টি আকৰ্ষণ কৰিছিল। তেওঁ উল্লেখ কৰে যে ৰাজ্যখনৰ বিভিন্ন কাৰাগাৰৰ মহিলা কয়দীসকল গৰ্ভৱতী হৈ আছে। তাপসে দাখিল কৰা প্ৰতিবেদন অনুসৰি, যোৱা বছৰলৈকে ৰাজ্যখনৰ বিভিন্ন কাৰাগাৰত ১৯৬ টা শিশুৰ জন্ম হৈছে।
শেহতীয়াকৈ আলিপুৰ মহিলা কাৰাগাৰৰ এগৰাকী কয়দীও গৰ্ভৱতী হয়। সেয়েহে তেওঁ ন্যায় বিচাৰি মুখ্য ন্যায়াধীশ টি এছ শিৱজ্ঞানম আৰু ন্যায়াধীশ সুপ্ৰতীম ভট্টাচাৰ্যৰ খণ্ড বিচাৰপীঠৰ দৃষ্টি আকৰ্ষণ কৰে। তেওঁ লগতে বিচাৰিছিল যে ৰাজ্যখনৰ সকলো মহিলা সংশোধনী গৃহত বা মহিলাৰ কোষত কোনো পুৰুষক প্ৰৱেশ কৰিবলৈ অনুমতি দিয়া উচিত নহয়।
আনহাতে, উচ্চতম ন্যায়ালয়ে গোচৰটোৰ স্বতঃপ্ৰণোদিতভাৱে বিবেচনা কৰে। তেনে ক্ষেত্ৰত আদালতে সকলো ৰাজ্যৰ পৰা প্ৰতিবেদন বিচাৰিছে। সকলো ৰাজ্যলৈ এই সন্দৰ্ভত জাননী জাৰি কৰা হৈছে। শীৰ্ষ আদালতে এখন সমিতি গঠনৰো নিৰ্দেশো দিয়ে। শুকুৰবাৰে শুনানিৰ সময়ত ন্যায়াধীশ কোহলীয়ে বংগ কাৰাগাৰত মহিলা কয়দীসকলৰ বাবে পৰ্যাপ্ত চেনিটাৰী নেপকিন আছেনে নাই সেয়াও সোধা-পোছা কৰে।
