৭৫ সংখ্যক গণৰাজ্য দিৱসৰ (Republic Day) প্ৰাকক্ষণত ৰাষ্ট্ৰপতি দ্ৰৌপদী মুৰ্মুৱে বৃহস্পতিবাৰে সন্ধিয়া দেশবাসীক সম্বোধন কৰে। নিজৰ ভাষণত তেওঁ শেহতীয়াকৈ শতবাৰ্ষিকীত প্ৰৱেশ কৰা বিহাৰৰ প্ৰাক্তন মুখ্যমন্ত্ৰী কৰ্পুৰী ঠাকুৰৰ পৰা আৰম্ভ কৰি অযোধ্যাত ৰামলালাৰ প্ৰাণ প্ৰতিষ্ঠালৈকে বিভিন্ন বিষয়ৰ ওপৰত আলোকপাত কৰে। তেওঁ কয়, এক যুগান্তকাৰী পৰিৱৰ্তনৰ সময় আহি পৰিছে।
কিছুদিন পূৰ্বে বিহাৰৰ প্ৰাক্তন মুখ্যমন্ত্ৰী কৰ্পুৰী ঠাকুৰক মৰণোত্তৰভাৱে ভাৰতৰত্নৰে সন্মানিত কৰা হৈছে। পিছপৰা জাতিসমূহৰ জনসাধাৰণৰ উন্নয়নত আগবঢ়োৱা অৱদানৰ বাবে কেন্দ্ৰই তেওঁক সৰ্বোচ্চ অসামৰিক সন্মানেৰে সন্মানিত কৰে। সেই কথা উল্লেখ কৰি দ্ৰৌপদী মুৰ্মুৱে কয়, “তেওঁৰ অৱদানৰ জৰিয়তে জনজীৱন সমৃদ্ধ কৰাৰ বাবে কৰ্পুৰীজীক শ্ৰদ্ধাঞ্জলি জনাইছো।” তাৰোপৰি অযোধ্যাত ৰামলালাৰ প্ৰাণ প্ৰতিষ্ঠাৰ বিষয়টোও তেওঁৰ মুখত শুনা যায়। তেওঁ কয়, “ভগৱান শ্ৰীৰামৰ জন্মস্থান অযোধ্যাত নিৰ্মাণ কৰা নতুন মন্দিৰৰ ঐতিহাসিক প্ৰাণ প্ৰতিষ্ঠাৰ আমি সাক্ষী হৈছো।”
