বিদায় মাগিব ওলোৱা ২০২৩ বৰ্ষত অসমৰ মুখ্যমন্ত্ৰী হিমন্ত বিশ্ব শৰ্মা (Himanta Biswa Sarma) ৰাজ্যৰ লগতে ৰাষ্ট্ৰীয় ৰাজনীতিতো অতি চৰ্চাত থাকে৷ বিশেষকৈ ৰাজ্যৰ প্ৰশাসনিক স্তৰত হিমন্ত বিশ্ব চৰকাৰে গ্ৰহণ কৰা কেতবোৰ পদক্ষেপ আৰু বিধানসভাত গ্ৰহণ কৰা সিদ্ধান্তৰ বাবে হিমন্ত বিশ্ব শৰ্মা চৰ্চাৰ শীৰ্ষত থাকে৷ তাৰে ভিতৰত গুৰুত্বপূৰ্ণ কেইটামান বিষয় উল্লেখ কৰা হৈছে৷
১) বাল্যবিবাহৰ বিৰুদ্ধে অভিযান বাল্যবিবাহৰ বিৰুদ্ধে অভিযানত বহুসংখ্যক লোকক গ্ৰেপ্তাৰ তথা বহুবিবাহ প্ৰথাৰ বিলুপ্ত কৰাৰ বাবে বিধানসভাত আইন প্ৰণয়নৰ প্ৰচেষ্টা আছিল হিমন্ত বিশ্ব শৰ্মা চৰকাৰৰ ২০২৩ বৰ্ষৰ উল্লেখনীয় পদক্ষেপ৷আনহাতে, পাঁচটা খিলঞ্জীয়া মুছলমান সম্প্ৰদায়ৰ আৰ্থ-সামাজিক সমীক্ষাৰ কথাও হিমন্ত বিশ্ব শৰ্মাই ঘোষণা কৰে৷
২) ফেব্ৰুৱাৰী আৰু অক্টোবৰত বাল্যবিবাহৰ বিৰুদ্ধে দুটা পৰ্যায়ত চলোৱা অসম চৰকাৰৰ অভিযানত প্ৰায় ৫,৫০০ জন লোক গ্ৰেপ্তাৰ হয়। ইয়াৰে ভিতৰত বেছিভাগেই সংখ্যালঘু সম্প্ৰদায় অধ্যুষিত জিলাৰ।
৩) মুখ্যমন্ত্ৰীয়ে ২০২৬ চনৰ ভিতৰত এই সামাজিক ব্যাধি সম্পূৰ্ণৰূপে নাইকিয়া কৰাৰ কথাও ঘোষণা কৰে৷ ইয়াৰ বাবে সকলো গাঁও পঞ্চায়ত সচিবক বাল্যবিবাহ প্ৰতিৰোধ বিষয়া হিচাপে মনোনীত কৰা হ’ব ।
৪) মুখ্যমন্ত্ৰী হিমন্ত বিশ্ব শৰ্মাই দৃঢ়তাৰে কয় যে বাল্যবিবাহ-বিৰোধী অভিযান আৰম্ভ হোৱাৰ পিছত ৰাজ্যখনত প্ৰসূতিৰ মৃত্যুৰ হাৰ ৩৩ শতাংশতকৈও অধিক হ্ৰাস পাইছে আৰু ইয়াৰ ফলত শিশুৰ মৃত্যু প্ৰায় ১৫ শতাংশ হ্ৰাস পাইছে।
৫) ৰাজ্য চৰকাৰে মুছলমানসকলৰ মাজত বহুবিবাহ প্ৰথা নিষিদ্ধ কৰাৰ বাবে এখন আইন প্ৰণয়নৰ পৰিকল্পনা কৰে। কিয়নো বহুবিবাহৰ বিৰুদ্ধে চলোৱা অভিযানৰ সময়ত দেখা গৈছিল যে বহু বৃদ্ধ পুৰুষেও একাধিকবাৰ বিবাহপাশত আবদ্ধ হৈছে আৰু তেওঁলোকৰ পত্নীসকলৰ বেছিভাগেই সমাজৰ দৰিদ্ৰ শ্ৰেণীৰ যুৱতী। সেয়ে বহুবিবাহৰ ওপৰত নিষেধাজ্ঞা নাথাকিলে বাল্যবিবাহক সম্পূৰ্ণৰূপে মোকাবিলা কৰিব নোৱাৰি বুলি দাবী কৰে অসম চৰকাৰে৷
৬) বিধানসভাত বহুবিবাহ নিষিদ্ধ কৰাৰ বৈধতা পৰীক্ষা কৰাৰ বাবে আইনৰ বিশিষ্ট ব্যক্তিসকলৰ চাৰিজনীয়া বিশেষজ্ঞ সমিতি গঠন। সমিতিখনে এক অভিন্ন দেৱানী বিধিৰ বাবে ৰাজ্যিক নীতিৰ নিৰ্দেশনামূলক নীতি সন্দৰ্ভত সংবিধানৰ অনুচ্ছেদ ২৫-ৰ সৈতে মুছমুলিম ব্যক্তিগত আইন (শ্বৰিয়ত), ১৯৩৭ৰ বিধানবোৰ পৰীক্ষা কৰে৷ পেনেলে এই বিষয়ত সৰ্বসন্মতভাৱে কয় যে ৰাজ্যখনত বহুবিবাহ সমাপ্ত কৰিবলৈ নিজাববীয়া আইন প্ৰস্তুত কৰিব পৰা যায়। কিন্তু বিধেয়কখনৰ ওপৰত সন্মতি ৰাজ্যপালৰ পৰিৱৰ্তে ৰাষ্ট্ৰপতিয়ে দিব লাগিব। কিন্তু বিৰোধী দলসমূহে বহুবিবাহৰ ওপৰত আইন প্ৰণয়নৰ চৰকাৰৰ পৰিকল্পনাক সমালোচনা কৰি ইয়াক এক সাম্প্ৰদায়িক পদক্ষেপ বুলি অভিহিত কৰে।
৭) বহুবিবাহ নিষিদ্ধ কৰাৰ বাবে আইন প্ৰণয়নৰ ক্ষেত্ৰত ৰাজ্য চৰকাৰৰ পদক্ষেপ সন্দৰ্ভত বিৰোধীয়ে অভিযোগ কৰে যে শাসকীয় বিজেপিয়ে সংখ্যালঘু সম্প্ৰদায়ৰ বিৰুদ্ধে নিজৰ গোপন কাৰ্যসূচী আগবঢ়াই নিছে। কিন্তু মুখ্যমন্ত্ৰীয়ে বিৰোধীৰ এই অভিযোগ নস্যাৎ কৰি কয় যে তেওঁৰ চৰকাৰে খিলঞ্জীয়া অসমীয়া আৰু বাংলাভাষী উভয় সম্প্ৰদায়ৰ মুছলমানসকলৰ অৱস্থা উন্নত কৰাৰ বাবে পদক্ষেপ গ্ৰহণ কৰিছে।
যাৰ প্ৰথম পদক্ষেপ হিচাপে ৰাজ্যখনৰ পাঁচটা থলুৱা মুছলমান সম্প্ৰদায় গৰীয়া, মৰিয়া, দেশী, জোলা আৰু চৈয়দসকলৰ আৰ্থ-সামাজিক সমীক্ষা চলোৱাৰ পদক্ষেপ গ্ৰহণ কৰা হৈছে৷ ইয়াৰ পৰা লাভ কৰা ফলাফলে থলুৱা সংখ্যালঘুসকলৰ সামাজিক, ৰাজনৈতিক আৰু শৈক্ষিক উত্থানৰ বাবে ৰাজ্য চৰকাৰে উপযুক্ত ব্যৱস্থা গ্ৰহণ কৰিবলৈ পথ নিৰ্দেশনা লাভ কৰিব বুলি মুখ্যমন্ত্ৰীয়ে দাবী কৰে।
৮) প্ৰব্ৰজনকাৰী মূলৰ বাকী মুছলমানসকলৰ বাবে ৰাজ্য চৰকাৰে নতুন বিদ্যালয়, মহাবিদ্যালয় আৰু স্বাস্থ্য প্ৰতিষ্ঠান স্থাপন আৰু বৈদ্যুতিকৰণ নিশ্চিত কৰাৰ বাবে পদক্ষেপ গ্ৰহণৰ কথা ঘোষণা কৰে৷ লগতে বাল্যবিবাহ বন্ধ কৰাৰ দৃঢ় পদক্ষেপ গ্ৰহণ কৰে।
৯) ২০২৩ বৰ্ষটোত ৰাজ্যখনৰ আন এক গুৰুত্বৰুপূৰ্ণ ঘটনা হৈছে ২০০১ চনৰ লোকপিয়লৰ আধাৰত ভাৰতৰ নিৰ্বাচন আয়োগৰ সমষ্টি পুনৰ নিৰ্ধাৰণ। ১১ আগষ্টত প্ৰকাশ হয় ইয়াৰ চূড়ান্ত প্ৰতিবেদন। ইয়াৰ জৰিয়তে দুটা সংসদীয় আৰু ১৯ টা বিধানসভা সমষ্টিৰ নতুন নামকৰণ কৰা হয়। অৱশ্যে ১২৬ টা বিধানসভা সমষ্টি আৰু লোকসভা আসনৰ সংখ্যা ১৪ খনেই অক্ষুণ্ণ ৰাখে।
১০) ২০২৩ চনত মুখ্যমন্ত্ৰীয়ে দাবী কৰে যে বড়ো, কাৰ্বি আৰু ডিমাচা জনজাতিৰ আধিপত্য থকা বিভিন্ন উগ্ৰপন্থী সংগঠনৰ লগতে বিভিন্ন আদিবাসী সংগঠনৰ সৈতে শান্তিচুক্তি স্বাক্ষৰ কৰাৰ লগে লগে ৰাজ্যখনত বিদ্ৰোহী সমস্যা ‘প্ৰায় সমাপ্ত’ হৈছে। ইতিমধ্যে আলফাৰ লগত শান্তিচুক্তি স্বাক্ষৰিত হৈছে আৰু কুকি আৰু মাৰ গোটৰ আলোচনাপন্থী গোটৰ সৈতেও আলোচনা চলি আছে বুলি তেওঁ উল্লেখ কৰে।
১১) হিমন্ত বিশ্ব শৰ্মাৰ কাৰ্যকালত ২০২৩ বৰ্ষত আন এক গুৰুত্বপূৰ্ণ ঘটনাক্ৰম হৈছে ৰাজ্যখনত শান্তিৰ পৰিৱেশ ঘূৰি অহাৰ বাবে সশস্ত্ৰ বাহিনী আইন বা আফস্পা (বিশেষ ক্ষমতা) ক্ৰমান্বয়ে বাতিল কৰা হৈছে৷
১২) ৰাষ্ট্ৰীয় অপৰাধ ৰেকৰ্ড ব্যুৰোৰ শেহতীয়া প্ৰতিবেদনত প্ৰকাশ পোৱা অনুসৰি, ২০২২ চনৰ তুলনাত ২০২৩ চনত ৰাজ্যত অপৰাধৰ সংখ্যা হ্ৰাস পাইছে৷ ২০২২ চনত সংঘটিত মুঠ অপৰাধৰ সংখ্যা ৪৮ শতাংশ হ্ৰাস পাইছে৷মুখ্যমন্ত্ৰীয়ে দাবী কৰে যে উন্নয়নমূলক কাৰ্যকলাপৰ লগতে আৰক্ষীৰ শক্তিশালী আৰু আপোচবিহীন ব্যৱস্থা আৰু যুৱসকলক চৰকাৰী সংস্থাপন প্ৰদানৰ ফলত এই অপৰাধৰ গ্ৰাফ হ্ৰাস কৰাত সহায় কৰিছে।
১৩) ২০২৩ বৰ্ষত অনুষ্ঠিত দেশৰ কেইবাখনো ৰাজ্যৰ নিৰ্বাচনী প্ৰচাৰত মুখ্যমন্ত্ৰী হিমন্ত বিশ্ব শৰ্মা আছিল বিজেপিৰ ষ্টাৰ কেম্পেইনাৰ৷ কৰ্ণাটক, ছত্তীশগড়, মধ্যপ্ৰদেশ, ৰাজস্থান, তেলেংগানা আদি নিৰ্বাচনত হিমন্ত বিশ্ব শৰ্মাই মাৰাথন প্ৰচাৰ চলায়৷ ইয়াৰ লগে লগে মুখ্যমন্ত্ৰী হিমন্ত বিশ্ব শৰ্মা দেশৰ ৰাজনীতিত ক্ৰমান্বয়ে শক্তিশালী নেতা হিচাপে আত্মপ্ৰকাশ কৰিছে৷