ৰাছিয়াৰ ৰাষ্ট্ৰপতি ভ্লাদিমিৰ পুটিন (Vladimir Putin) হৃদৰোগত আক্ৰান্ত হৈছে। টেলিগ্ৰামৰ এটা চেনেলত এই কথা দাবী কৰা হৈছে। ফলত এই সম্পৰ্কে ইতিমধ্যে আন্তঃৰাষ্ট্ৰীয় সংবাদ মাধ্যমত আৰম্ভ হৈছে তীব্ৰ চর্চা। ব্ৰিটিছ সংবাদ মাধ্যম মিৰ’ৰে প্ৰকাশ কৰিছে এই খবৰ।
টেলিগ্ৰাম চেনেলটোৰ নাম General SVR। পোষ্টটোৰ মতে, দেওবাৰে সন্ধিয়া পুটিন নিজৰ চৰকাৰী বাসগৃহৰ শোৱা কোঠাত অসুস্থ হৈ পৰে। পৰি যোৱাৰ শব্দ শুনি নিৰাপত্তাৰক্ষীয়ে লৰালৰিকৈ সোমাই পুটিনক উদ্ধাৰ কৰে। কোঠাটোলৈ গৈ দেখে বিছনাৰ কাষতে থকা টেবুলখনত তেওঁ বাগৰি পৰি আছে। বৰ্তমান চিকিৎসকে পুটিনক সুস্থ কৰি তুলিছে।
ৰাছিয়াৰ ৰাষ্ট্ৰপতিগৰাকীৰ স্বাস্থ্য সম্পৰ্কীয় বিভিন্ন চৰ্চা সদায় আন্তঃৰাষ্ট্ৰীয় সংবাদ মাধ্যমত প্ৰচাৰিত হৈ থাকে। পুটিনৰ জীৱন গোপনীয়তাৰে আবৃত। ক্ৰেমলিনে তেওঁৰ স্বাস্থ্যৰ কোনো তথ্য প্ৰকাশ নকৰে। গতিকে পুটিনৰ প্ৰকৃততে হাৰ্ট এটেক হৈছিলনে নাই সেয়া নিশ্চিত নহয়। ৰাছিয়া চৰকাৰে কোনো আনুষ্ঠানিক বিবৃতি দিয়া নাই।
কিন্তু পুটিনৰ হাৰ্ট এটেকৰ খবৰ প্ৰকাশ পোৱা টেলিগ্ৰাম চেনেলটোত প্ৰায়ে ৰাছিয়াৰ ৰাষ্ট্ৰপতিগৰাকীৰ স্বাস্থ্য সম্পৰ্কে বিভিন্ন তথ্য প্ৰদান কৰা হয়। অৱশ্যে তেওঁলোকৰ হাতত কোনো প্ৰামাণিক নথিপত্ৰ নাই। চেনেলটোৱে দাবী কৰিছে যে পুটিনৰ ঘনিষ্ঠ মহলত তেওঁলোকৰ মানুহ আছে। তাৰ পৰাই এই তথ্য পোৱা যায়।
চেনেলটোৱে ইয়াকো দাবী কৰিছে যে পুটিন দীৰ্ঘদিন ধৰি অসুস্থ হৈ আছে। আন্তঃৰাষ্ট্ৰীয় সমাজৰ দৃষ্টিগোচৰ নহʼবৰ বাবে ৰাছিয়াৰ চৰকাৰী সকলো কাম-কাজতে পুটিনৰ সলনি তেওঁৰ ‘বডি ডাবল’ (পুটিনৰ দৰে সাজ-পোছাক পিন্ধা আন কোনোবা) ব্যৱহাৰ কৰা হয়। এই তথ্যৰ সত্যতাক লৈও প্ৰশ্ন উত্থাপন হৈছে। কাৰণ ৰাছিয়াই আনুষ্ঠানিকভাৱে একো ঘোষণা কৰা নাই।
