প্ৰধানমন্ত্ৰী নৰেন্দ্ৰ মোডী (Narendra Modi)য়ে কোভিড যুগত লকডাউন বৃদ্ধিৰ সিদ্ধান্ত ঘোষণা কৰি দেশবাসীক সম্বোধন কৰাৰ সময়ত তেওঁৰ নাক আৰু মুখ ডিঙিত ওলমি থকা মণিপুৰী চাদৰেৰে ঢাকি ৰাখিছিল। কিন্তু মণিপুৰত হিংসাত্মক (Violence in Manipur) পৰিস্থিতিৰ ডেৰ মাহৰ পাছতো মৌনতা অৱলম্বন কৰি আছে প্ৰধানমন্ত্ৰীয়ে। দেওবাৰে প্ৰধানমন্ত্ৰীৰ ৰেডিঅ’ বাৰ্তা ‘মন কি বাত’ৰ পূৰ্বে নৰেন্দ্ৰ মোডীয়ে তাত ‘মণিপুৰ কী বাত’ (Manipur ki Baat) কৰিবলৈ দাবী উত্থাপন হৈছিল। কিন্তু প্ৰধানমন্ত্ৰীয়ে মণিপুৰত হিংসা ৰোধ কৰাত কেন্দ্ৰ বা ৰাজ্যৰ বিজেপি চৰকাৰৰ ব্যৰ্থতাৰ ব্যাখ্যা দিয়াতো বহু দূৰৰ, মণিপুৰৰ জনসাধাৰণক শান্তিৰ আহ্বানো নজনালে।
তাৎপৰ্যপূৰ্ণভাৱে আৰএছএছৰ সাধাৰণ সম্পাদক দত্তত্ৰেয় হোছাবালেই এক বিবৃতি প্ৰকাশ কৰি কয় যে বিগত ৪৫ দিন ধৰি মণিপুৰত অব্যাহত থকা হিংসাত্মক পৰিস্থিতি অতি চিন্তনীয়। কেন্দ্ৰীয় চৰকাৰ, স্থানীয় প্ৰশাসন, আৰক্ষী, সেনা, কেন্দ্ৰীয় সংস্থাসমূহক হিংসা বন্ধ কৰাৰ বাবে তাৎক্ষণিক পদক্ষেপ লʼবলৈ অনুৰোধ জনায় তেওঁ। কিন্তু প্ৰশ্ন উত্থাপন হৈছে, আৰএছএছে মোডী চৰকাৰৰ ব্যৰ্থতাকে আঙুলিয়াই দিছে নেকি? কংগ্ৰেছে অভিযোগ কৰিছে যে আৰএছএছ আচলতে দ্বিধাগ্ৰস্ত হৈ পৰিছে। আৰএছএছৰ মেৰুকৰণ আৰু বিভাজনৰ মতাদৰ্শৰ বাবেই বৈচিত্ৰময় উত্তৰ-পূৰ্বাঞ্চলৰ পৰিৱৰ্তন ঘটিছে। মণিপুৰ ইয়াৰ প্ৰধান উদাহৰণ।
‘মন কি বাত’ত মোডীয়ে কয় যে প্ৰধানমন্ত্ৰী হিচাপে তেওঁৰ কামৰ বহুতে শলাগ লয়। জৰুৰীকালীন অৱস্থাক লৈ কংগ্ৰেছক লক্ষ্য কৰি লয়। তেওঁ গুজৰাটৰ কচ্ছৰ জনসাধাৰণক প্ৰশংসা কৰে যে তেওঁলোকে ঘূৰ্ণীবতাহৰ লগত মোকাবিলা কৰিছে। কিন্তু মণিপুৰৰ বিষয়ে এটা শব্দও উচ্চাৰণ কৰা নাছিল। মণিপুৰৰ ৰাজপথত দেখা গৈছে যে প্ৰধানমন্ত্ৰীৰ ‘মন কি বাত’ৰ সময়ত মানুহে ৰেডিঅ’ ভাঙিছে। কংগ্ৰেছৰ সভাপতি মল্লিকাৰ্জুন খাৰ্গেয়ে প্ৰধানমন্ত্ৰী মোডীক অটল বিহাৰী বাজপেয়ীৰ সৈতে সুৰ মিলাই ‘ৰাজধৰ্ম’ পালন কৰিবলৈ কয়। তেওঁ অভিযোগ কৰে যে মোডীয়ে মণিপুৰ সন্দৰ্ভত এটা শব্দও উচ্চাৰণ কৰা নাছিল, নিজে কোনো বৈঠক অনুষ্ঠিত কৰা নাছিল, সৰ্বদলীয় প্ৰতিনিধি দলকো সাক্ষাৎ কৰা নাছিল।
বিৰোধীৰ অভিযোগ যে যেতিয়াই তেওঁৰ চৰকাৰখন বিপদত পৰে তেতিয়াই নৰেন্দ্ৰ মোডীয়ে নিজৰ মুখ লুকুৱাই ৰাখিবলৈ আৰু দায়িত্বৰ পৰা আঁতৰি থাকিবলৈ চেষ্টা কৰে। কোভিডৰ দ্বিতীয় ঢৌৰ সময়ত অক্সিজেনৰ অভাৱ, লাডাখত চীনে ভাৰতীয় ভূমি বেদখল কৰা বা যৌন নিৰ্যাতনৰ অভিযোগত বিজেপি সাংসদৰ বিৰুদ্ধে মহিলা মল্লযুঁজাৰুৰ প্ৰতিবাদ— মোডীয়ে কোনো কথাতে মুখ খোলা নাই। ইমান দিনে তেওঁ উত্তৰ-পূৰ্বাঞ্চলত নিজৰ চৰকাৰৰ সফলতাৰ ঢোল পিটি আহিছে। কিন্তু ডেৰ মাহ ধৰি মণিপুৰত অশান্তিৰ মাজতো প্ৰধানমন্ত্ৰীয়ে শান্তিৰ আহ্বান নকৰিলে। মণিপুৰলৈ যোৱাটো বহু দূৰৈৰে কথা।
