Wrestler’s Protest I এইবাৰ মল্লযুঁজাৰুৰ মাজত মতানৈক্য, দুই ডংগল-কন্যাৰ বাকযুদ্ধ

এইবাৰ ভাৰতীয় মল্লযুঁজাৰু (Wrestler) সন্থাৰ মুৰব্বী ব্ৰিজ ভূষণ চৰণ সিঙৰ (Brij Bhushan Sharan Singh) বিৰুদ্ধে যুঁজ দি থকা মল্লযুঁজাৰুসকলৰ মাজতে আৰম্ভ হৈছে বাকযুদ্ধ৷ সাক্ষী মালিক (Sakshi Malik) আৰু ববিতা ফোগাটৰ (Bobita Phogat)  মাজত আৰম্ভ হৈছে অভিযোগ-প্রতি অভিযোগ৷ তাৰ মাজত আকৌ ৰাজনীতিও প্ৰৱেশ কৰিছে। সাক্ষীয়ে অভিযোগ কৰে যে বিজেপি নেত্ৰী ববিতাই নিজৰ স্বাৰ্থ পূৰণৰ বাবে মল্লযুঁজাৰুসকলক ব্যৱহাৰ কৰিছে। ববিতাই এই অভিযোগ প্ৰতিহত কৰি কয় যে সাক্ষী কংগ্ৰেছৰ পুতলা হৈ পৰিছে।

সাক্ষী আৰু তেওঁৰ মল্লযুঁজাৰু স্বামী সত্যব্ৰত কাদিয়াননে (Satyawart Kadian) শনিবাৰে ভিডিঅ’ বাৰ্তাযোগে ববিতাৰ বিৰুদ্ধে অভিযোগ উত্থাপন কৰে। অলিম্পিকৰ ব্ৰঞ্জৰ পদক বিজয়ী সাক্ষীৰ অভিযোগ যে যন্তৰ-মন্তৰত তেওঁলোকৰ ধৰ্ণা কাৰ্যসূচীৰ বাবে ববিতাই নিজেই অনুমতি বিচাৰিছিল। সাক্ষীয়ে কয়, “প্ৰথমে মই স্পষ্টকৈ ক’ব বিচাৰো যে আমাৰ আন্দোলনত কোনো ৰাজনীতি নাই। জানুৱাৰী মাহত আমি যন্তৰ-মন্তৰলৈ গৈছিলো। সেই সময়ত বিজেপিৰ দুগৰাকী নেত্ৰী তীৰ্থ ৰাণা আৰু ববিতা ফোগাটে ধৰ্ণাৰ অনুমতি বিচাৰিছিল।”

সাক্ষীয়ে অভিযোগ কৰে যে ববিতাই সেইবোৰ নিজৰ স্বাৰ্থত ব্যৱহাৰ কৰিবলৈ চেষ্টা কৰিছিল। তেওঁ কয়, “প্ৰথমে তেওঁলোকে মল্লযুঁজাৰুসকলক নিজৰ স্বাৰ্থত ব্যৱহাৰ কৰিবলৈ চেষ্টা কৰিছিল। কিন্তু পিছত বিপদৰ কথা উপলব্ধি কৰি চৰকাৰৰ কোলাত বহে। আমাৰ আন্দোলনত কংগ্ৰেছৰ হাত নাই। তাত থকাসকলৰ কমেও ৯০ শতাংশই মল্লযুঁজৰ সৈতে জড়িত। আমি তেওঁলোকক ১০-১২ বছৰ ধৰি চিনি পাওঁ।”

সাক্ষীৰ এই অভিযোগ অৱশ্যে ববিতাই মানি লোৱা নাই। কমনৱেলথৰ সোণ বিজয়ী মল্লযুঁজাৰুগৰাকীয়ে ইয়াৰ উত্তৰ দিয়ে, “এনেকৈ কথাবোৰ নকʼব যাতে পিছত লুকুৱাবলগীয়া হয়। মোৰ সৰু ভনী (সাক্ষী) আৰু তেওঁৰ স্বামীৰ ভিডিঅ’ এটা দেখি বৰ দুখ লাগিল। আকৌ হাঁহিও উঠিল। তেওঁলোকে কʼলে, ধৰ্ণাৰ অনুমতি লৈছিলোঁ। তেওঁলোকে মোক স্বাক্ষৰিত নথি এখন দেখুৱাব পাৰিবনে? তেওঁলোকৰ হাতত কোনো প্ৰমাণ নাই।”

ববিতাৰ অভিযোগ যে কংগ্ৰেছৰ সহায়ত সাক্ষীয়ে তেওঁক বদনাম কৰিবলৈ চেষ্টা কৰিছে। তেওঁ কয়, “মই প্ৰথম দিনাৰ পৰাই কৈ আহিছো যে প্ৰধানমন্ত্ৰী নৰেন্দ্ৰ মোডী আৰু দেশৰ আইনৰ ওপৰত মোৰ বিশ্বাস আছে। এগৰাকী নাৰী হিচাপে মই সদায় নাৰীৰ সংগ্ৰামৰ কাষত থিয় দি আহিছো। কিন্তু সংসদ ভৱনৰ উদ্বোধনী দিনটোত তেওঁলোকে যিদৰে পদযাত্ৰা কৰিছিল বা গংগাত পদক উটুৱাই দিবলৈ গৈছিল সেই ধৰণটো মই মানি লোৱা নাছিলো। দেশক অসন্মান কৰা হৈছে। বাৰে বাৰে প্ৰধানমন্ত্ৰী বা গৃহমন্ত্ৰীক সাক্ষাৎ কৰিবলৈ কোৱা হৈছিল। সেইটো হ’লে সমাধান হ’ব। তেনে কৰাৰ পৰিৱৰ্তে তেওঁলোকে প্ৰিয়ংকা গান্ধী, দিপেন্দ্ৰ হুডাৰ কথা মানি চলিছে।”

এই বিতৰ্কৰ মাজতে অৱশ্যে দিল্লী আৰক্ষীয়ে ব্ৰিজ ভূষণৰ বিৰুদ্ধে ১৫০০ পৃষ্ঠাৰ অভিযোগনামা দাখিল কৰে। যোৱা বৃহস্পতিবাৰে ৰাউজ এভিনিউ আদালতত ব্ৰিজ ভূষণৰ বিৰুদ্ধে দাখিল কৰা হয় অভিযোগনামা। ভাৰতীয় দণ্ডবিধিৰ ৩৫৪ (বলপূৰ্বকভাৱে মহিলাক নিৰ্যাতন চলোৱাৰ চেষ্টা), ৩৫৪এ (অশ্লীল মন্তব্য), ৩৫৪ডি (হাৰাশাস্তি) ধাৰাত ব্ৰিজ ভূষণৰ বিৰুদ্ধে অভিযোগনামা দাখিল কৰা হৈছে। ইয়াৰে ৩৫৪টা ধাৰা জামিনবিহীন। কিন্তু বাকী দুটা দফা জামিনযোগ্য। ২২ জুনত এই গোচৰৰ পৰৱৰ্তী শুনানি হʼব।