বিজেপি সাংসদ তথা হিন্দী ছবিৰ একচন অভিনেতা ছানী দেওলে তেওঁৰ কেৰিয়াৰত এনে কিছুমান ছবিত অভিনয় কৰিছে, যিবোৰ আজিও স্মৰণীয় হৈ আছে। ইয়াৰে এখন ছবি হৈছে “ঘায়েল”, যিখনে ইতিমধ্যে মুক্তিৰ ৩২ বছৰ সম্পূৰ্ণ কৰিছে। ছানি দেওলে এই উপলক্ষে “ঘায়েল” ৰ ফটোৰ এক আভাস ছচিয়েল মিডিয়াত শ্বেয়াৰ কৰি নিজৰ অধিকাৰ আৰু ন্যায়ৰ যুঁজক আজিও প্ৰাসংগিক বুলি বৰ্ণনা কৰে।
“ঘায়েল” ছবিখনক ১৯৯০ চনৰ ২২ জুনত মুক্তি দিয়া হৈছিল। ছবিখন ৰাজকুমাৰ সন্তোষীয়ে পৰিচালনা কৰিছিল আৰু ধৰ্মেন্দ্ৰই প্ৰযোজনা কৰিছিল। মীনাক্ষী শেষাদ্ৰীয়ে ছবিখনত মহিলাৰ মুখ্য চৰিত্ৰত অভিনয় কৰিছিল, আনহাতে ৰাজ বব্বৰে ছানীৰ চৰিত্ৰটোৰ জ্যেষ্ঠ ভাতৃৰ চৰিত্ৰত অভিনয় কৰিছিল। মৌচুমী চেটাৰ্জী তেওঁৰ ভগ্নী হৈছিল, আনহাতে কিংবদন্তি অভিনেতা অমৰীশ পুৰীয়ে ছবিখনত খলনায়কৰ চৰিত্ৰত অভিনয় কৰিছিল।
ঘায়েল সেই সময়ছোৱাত যথেষ্ট জনপ্ৰিয় হৈছিল। ছবিখনে প্ৰায় ১৭ কোটি টকা সংগ্ৰহৰ সৈতে ব্লকবাষ্টাৰ ছবি হিচাবে ঘোষিত হৈছিল। একে সময়তে, ছবিখনে দুটা ৰাষ্ট্ৰীয় বঁটাকে ধৰি বহুতো বঁটা লাভ কৰে। ছানী দেওলক এই ছবিখনৰ বাবে বিশেষ জুৰিৰ ৰাষ্ট্ৰীয় বঁটা প্ৰদান কৰা হৈছিল।
ছানীয়ে লিখিছিল যে- “পৃথিৱীখন আজিও বেছি সলনি হোৱা নাই। ন্যায়ৰ বাবে আৰু যি শুদ্ধ তাৰ বাবে সংগ্ৰাম আজিও অব্যাহত আছে।”
পৰৱৰ্তী সময়, “ঘায়েল” তামিল, তেলেগু আৰু কানাড়া ভাষাতো পুনৰ নিৰ্মাণ কৰা হৈছিল। তামিলত বিজয়কান্ত, তেলেগুত শ্ৰীকান্ত আৰু কানাড়াত শিৱ ৰাজকুমাৰে মুখ্য চৰিত্ৰত অভিনয় কৰিছিল। আকৰ্ষণীয় দিশটো হ’ল যে তামিল সংস্কৰণত ৰাজ বব্বৰৰ চৰিত্ৰটো প্ৰয়াত কিংবদন্তি গায়ক এছ পি বালাসুব্ৰমন্যমে অভিনয় কৰিছিল।