জামিন পালে ইন্দ্রাণী মুখাৰ্জীয়ে। ২০১২ চনত কন্যা শ্বিনা বৰাক হত্যাৰ অভিযোগ উঠিছিল তেওঁৰ বিৰুদ্ধে। ২০১৫ত গ্রেপ্তাৰ হয় ইন্দ্রাণী। চাৰে ছয় বছৰ মুম্বাইৰ জে’লত কটোৱাৰ পিছত শুক্রবাৰে জামিন লাভৰ পিছত মুকলি আকাশৰ তললৈ আহে তেওঁ।
চিবিআই আদালতে বাৰম্বাৰ তেওঁৰ জামিনৰ আবেদন নাকচ কৰাত যোৱা ফেব্রুৱাৰী মাহত ছুপ্রিম কোর্টৰ দ্বাৰস্থ হয় ইন্দ্রাণী। বৃহস্পতিবাৰে আদালতে তেওঁৰ জামিন মঞ্জুৰ কৰে। লগতে আদালতে কয়, “চাৰে ছয় বছৰ এটা দীঘলীয়া সময়। আমি ইন্দ্রাণী মুখাৰ্জীৰ জামিন মঞ্জুৰ কৰিলো।”
বৃহস্পতিবাৰে আদালতে জামিন দিলেও কাগজ-পত্র ঠিকমতে প্ৰস্তুত নোহোৱাত সিদিনাও জে’লৰ পৰা ওলাব নোৱাৰে ইন্দ্রাণী। শুক্রবাৰে উক্ত কাগজ জে’ল কর্তৃপক্ষৰ হাতত পৰাৰ লগে লগেই ইন্দ্রাণীক মুক্তি দিয়া হয়।
কিন্তু ইন্দ্রাণীক চর্তসাপেক্ষেহে জামিন দিছে ছুপ্রিম কোৰ্টে। আদালতে জনাইছে, ইন্দ্রাণীয়ে দেশ এৰিব নোৱাৰিব। কোনো সাক্ষীৰ সৈতে যোগাযোগ কৰিবও নোৱাৰিব। উল্লেখ্য, শ্বিনা বৰা হত্যা গোচৰত ২০২০ চনতেই জামিন লাভ কৰিছিল ইন্দ্রাণীৰ স্বামী পিটাৰ মুখাৰ্জীয়ে।
