পশুখাদ্য কেলেঙ্কাৰী গোচৰত জামিন পোৱাৰ কেইদিনমানৰ ভিতৰতেই লালুপ্রসাদ যাদৱৰ বিৰুদ্ধে দুর্নীতিৰ নতুন অভিযোগ উঠিল। বিহাৰৰ মুখ্যমন্ত্রী হৈ থাকোতে চাকৰিত নিয়োগত দুর্নীতিৰ অভিযোগ উঠিছে লালুৰ বিৰুদ্ধে। ৰুজু হৈছে গোচৰ। বুধবাৰে কেন্দ্রীয় তদন্তকাৰী সংস্থা চিবিআইয়ে ৰাষ্ট্রীয় জনতা দলৰ প্রতিষ্ঠাতা লালুৰ ঘৰসহ ১৫টা স্থানত তালাচী চলায়।
উল্লেখ্য, পশুখাদ্য কেলেঙ্কাৰী গোচৰত জামিন লৈ এমাহমান পূৰ্বে জে’লৰ পৰা ঘৰলৈ উভতিছে লালু। বিশেষ চিবিআই আদালতে যোৱা ফেব্রুৱাৰী মাহত লালুক পাঁচ বছৰৰ কাৰাদণ্ড আৰু ৬০ লাখ টকা জৰিমনা বিহে। বিগত মাহত উক্ত গোচৰত ঝাড়খণ্ড হাইকোর্টৰ পৰা জামিন লাভ কৰে বিহাৰৰ প্রাক্তন মুখ্যমন্ত্রীজনে। এইবাৰ আন এক গোচৰৰ সন্মুখীন হ’ল ৭৩ বছৰীয়া লালু।
অসুস্থতাৰ বাবে নতুন দিল্লীৰ এইমছত ভর্তি কৰোৱা হৈছিল লালুক। এইমছ এৰাৰ পিছত দিল্লীত জীয়ৰী মিছা ভাৰতীৰ ঘৰতে আছিল প্রবীণ ৰাজনীতিকজন। ইয়াৰ মাজতেই পুনৰ নতুন গোচৰত তেওঁৰ বিপদ বাঢ়িল বুলিয়েই অনুমান কৰা হৈছে৷
