জিতেন বৰকটকী:
নগাঁও : নগাঁও চহৰৰ কিশলয় ভৱনত আজি আয়োজিত এক গাম্ভীর্যপূর্ণ অনুষ্ঠানত বিশিষ্ট গীতিকাৰ ,সুৰকাৰ সূৰ্য কুমাৰ ৰাজাই ৰচনা কৰা গীতসমূহৰ মাজৰে ১৪৩ গীতক সামৰি প্ৰকাশ কৰি উলিওৱা ‘অহাৰ দৰেই’ শীৰ্ষক এখনি গীতৰ সংকলন উন্মোচন কৰা হয়।
নগাঁও মহাবিদ্যালয়ৰ অধ্যক্ষ তথা বিশিষ্ট কবি ড: শৰৎ বৰকটকীয়ে গীতৰ সংকলনখন উন্মোচন কৰি কয় যে সূৰ্য কুমাৰ ৰাজাৰ গীতৰ ভাৱ আৰু ভাষা দুয়োটাই চহকী।তেওঁৰ গীতসমূহ শিল্পীগত গুনেৰে সমৃদ্ধ । বিষয়বস্তু জাতীয় পথাৰৰ পৰা উৎপাদিত য’ত মাটি,গছ,লতা আদি সকলোবোৰ সহজ সৰল শব্দ চয়ন ব্যৱহাৰ কৰা হৈছে।
সকলো গীতৰে এটা প্ৰতিক্ৰিয়া আছে। প্ৰতিটো গীতত লোককথা আৰু লোক বিশ্বাস সোমাই আছে। আনহাতে অসমীয়া ভাষা থকালৈকে সূৰ্য কুমাৰ ৰাজাৰ গীত সমূহ থাকিব বুলি উল্লেখ কৰি ড: শৰৎ বৰকটকীয়ে লগতে কয় যে সূৰ্য কুমাৰ ৰাজাৰ গীতত সমাজৰ বহুতো দিশ প্ৰতিফলিত হৈছে । অসমীয়া সাহিত্যৰ প্ৰতি অনবদ্য অৱদান স্বৰূপ এই গীতৰ সংকলনখনে নতুন প্ৰজন্মৰ লগতে সকলোকে চুই যাব বুলিও ড: বৰকটকীয়ে আশা প্ৰকাশ কৰে ।
নগাঁও চহৰৰ অন্যতম সামাজিক- সাংস্কৃতিক অনুষ্ঠান কিশলয়ৰ উদ্যোগত অনুষ্ঠিত গ্ৰন্থ উন্মোচনী সভাখনত শিল্পী সূৰ্য কুমাৰ ৰাজাৰ ব্যক্তিত্ব, সৃষ্টি আৰু জীৱন পৰিক্ৰমাৰ ওপৰত আলোকপাত কৰে ক্ৰমে সাংবাদিক জিতেন বৰকটকী, অৱসৰপ্ৰাপ্ত শিক্ষক মুনীন্দ্ৰ কুমাৰ শইকীয়া আৰু শিল্পী চিত্ৰদেৱ মহন্তই ।আনহাতে গ্ৰন্থখনৰ প্ৰকাশক দীপা বৰা ৰাজা আৰু সম্পাদক উজ্জ্বলজ্যোতি দাসেও সভাত ভাষণ দিয়ে।
অনুষ্ঠানৰ আৰম্ভনিতে সূৰ্য কুমাৰ ৰাজা ৰচিত গীত পৰিৱেশন কৰে ক্ৰমে শিল্পী আৰিফুল হক, ইন্দ্ৰাণী বৰা আৰু নয়নমণি ডেকাই। কিশলয়ৰ পাপুল বৰাই আঁত ধৰা সভাখনত গীতিকাৰ সূৰ্য কুমাৰ ৰাজা, সমাজ সেৱক মুকুট ভুঞা, পুনিৰাম শইকীয়া, তাৰিনী শৰ্মা, দীপ্তি দেৱী শৰ্মা, কবি প্ৰয়াগ শইকীয়া,নগাঁও প্ৰেছ ক্লাবৰ সভাপতি কনক হাজৰিকা প্ৰমুখ্যে ভালেসংখ্যক বিশিষ্ট ব্যক্তি উপস্থিত থাকে ।
উল্লেখ্য সাহিত্যিক, সাংবাদিক উজ্জ্বলজ্যোতি দাসে সম্পাদনা কৰা গীতৰ সংকলনখনি প্ৰকাশ কৰি উলিয়াইছে শিল্পী সূৰ্য কুমাৰ ৰাজাৰ সহধৰ্মিণী দীপা বৰা ৰাজাই।
