ষ্টাফ ৰিপ’ৰ্টাৰ
ডিফু : অসম-নগালেণ্ড সীমান্তৰ বোকাজান মহকুমাৰ অন্তৰ্গত লাহৰিজানত অবৈধ ভূমি দখলক লৈ তীব্র উত্তেজনা। লাহৰিজান-নিৰ্মল কুমাৰ চাহ বাগানৰ মাজত চেলিমউদ্দীন চৌধুৰীয়ে অবৈধভাৱে ভূমি দখল কৰি নিৰ্মাণ কৰিছিল বহু সংখ্যক ঘৰ। বাগানৰ ভিতৰত সোমাই চাহ গছ কাটি নিৰ্মাণ কৰিছিল ঘৰসমূহ। যাক লৈ ক্ষোদ্ধ হৈ পৰে বাগানখনৰ লোকসকল। ইয়াৰ পিছতে হাতত দা আৰু লাঠী লৈ বাগানখনৰ লোকসকলে নিজেই অবৈধ ঘৰসমূহ উচ্ছেদ কৰাত পৰিস্থিতি অধিক জটিল হৈ পৰে।
উল্লেখ্য যে লাহৰিজান নিৰ্মল চাহ বাগানত ভূ-মাফিয়া চেলিমউদ্দীন চৌধুৰী আৰু কায়ুম তালুকদাৰে দালালি কৰি চলাই আহিছে ভূমি দখল প্ৰক্ৰিয়া। বাগানৰ মাটি অবৈধভাৱে দখল কৰি সন্দেহযুক্ত নাগৰিকক দিয়া হৈছিল ঘৰ নিৰ্মাণ কৰি বসতি কৰিবলৈ। বাগানৰ মাটিত ঘৰ নিৰ্মাণ কৰি বহু অনৈতিক কাৰ্যকলাপ কৰাৰো অভিযোগ তুলিছে স্থানীয় ৰাইজে।
অন্যহাতে বোকাজান মহকুমা আৰক্ষী প্ৰশাসনে বিষয়টোৰ ওপৰত গুৰুত্ব প্ৰদান নকৰাৰ অভিযোগ উত্থাপন কৰিছে বাগানৰ কৰ্মচাৰীয়ে।
