পশ্চিম এছিয়াৰ পৰিস্থিতিক উদ্বেগ প্রকাশ কৰিছে ভাৰতে। লগতে সংঘৰ্ষজর্জৰ দেশবোৰৰ মাজত কূটনৈতিক আলোচনাৰ বাবে আহ্বান জনাইছে ভাৰতৰ বিদেশ মন্ত্ৰালয়ে। মঙলবাৰে এই সন্দৰ্ভত বিবৃতি প্রকাশ কৰি পশ্চিম এছিয়াত যিমান পাৰি সোনকালে যুদ্ধ ৰোধৰ কথাও উল্লেখ কৰিছে। তাৰ মাজতে এইবাৰ ওমান (Oman) আৰু কুৱেইট (Kuwait)ৰ ৰাষ্ট্রপ্রধান (Head of State)ৰ সৈতেও আলোচনা কৰিছে প্রধানমন্ত্রী নৰেন্দ্র মোদী (Modi)য়ে।
উল্লেখযোগ্য যে পশ্চিম এছিয়াৰ যিবোৰ দেশত আমেৰিকান সামৰিক ঘাটি আছে তাত ইৰাণে প্ৰত্যাক্ৰমণ চলাইছে। উক্ত তালিকাত ওমান আৰু কুৱেইটো আছে। বৈদেশিক মন্ত্ৰালয়ে জনোৱা মতে, পৰিস্থিতিৰ ওপৰত নজৰ ৰখা হৈছে।
পি টি আয়ে জনোৱা অনুসৰি, মঙলবাৰে ওমানৰ চুলতান হাইথাম বিন তাৰিক আৰু কুৱেইটৰ যুৱৰাজ শ্বেইখ চাবা আল-খালেদ আল-হামাদ আল-মুবাৰক আল-চাবাহৰ সৈতে মোদীয়ে ফোনযোগে বাৰ্তালাপ কৰি দেশ দুখনত আক্ৰমণক লৈ তেওঁ উদ্বেগ প্রকাশ কৰা বুলি প্ৰকাশ। লগতে তেওঁ দেশ দুখনত বাস কৰা ভাৰতীয়সকলৰ নিৰাপত্তাক লৈও আলোচনা কৰে। ইয়াৰ পূৰ্বে প্ৰধানমন্ত্ৰী মোদীয়ে বাহৰেইনৰ ৰজা, চৌদি আৰবৰ যুৱৰাজ, জৰ্ডানৰ ৰজা দ্বিতীয় আব্দুল্লাৰ সৈতে কথা পাতি এই আক্ৰমণক গৰিহণা দিছে। ইয়াৰ উপৰি সংযুক্ত আৰব আমিৰ শ্বাহিৰ ৰাষ্ট্ৰপতি শ্বেইখ মহম্মদ বিন জায়েদ আল নাহিয়ান আৰু ইজৰাইলৰ প্রধানমন্ত্রী বেঞ্জামিন নেতানিয়াহুৰ সৈতেও আলোচনা কৰিছে2।
আনহাতে, বিদেশ মন্ত্ৰালয়ৰ এক বিবৃতিত জনোৱা হৈছে যে সাম্প্রতিক সময়ত এই সংঘাত কেৱল গুৰুতৰ হৈ উঠাই নহয়, অন্য দেশতো বিয়পি পৰিছে। হতাহতৰ সংখ্যা বৃদ্ধি পাইছে। স্বাভাৱিক জীৱনযাত্রা ব্যাহত হৈছে। আনকি ব্যৱসায় বাণিজ্যও স্থবিৰ হৈছে। উক্ত অঞ্চলবোৰৰ স্থিতাৱস্থা আৰু নিৰাপত্তাৰ ওপৰত যিহেতেু ভাৰতৰ বহু কথা নির্ভৰ কৰে, সেয়ে ভাৰত ‘অতি উদ্বিগ্ন’। বিবৃতিটোত লগতে কোৱা হৈছে, উপসাগৰীয় অঞ্চলত প্রায় এক কোটি ভাৰতীয়ই বসবাস কৰে, কাম কৰে। তেওঁলোকৰ নিৰাপত্তাক ভাৰতে অগ্রাধিকাৰ দিয়ে। তেওঁলোকৰ ওপৰত প্ৰভাৱ পৰিব পৰা বিষয়ত ভাৰতে সমর্থন কৰিব নোৱাৰে। উক্ত অঞ্চলেৰে ভাৰতৰ বাণিজ্য হয়। শক্তিৰ আগমন হয়। তাত ব্যাঘাত ঘটিলে ভাৰতৰ অর্থনীতিত প্ৰভাৱ পৰিব। ইয়াৰ উপৰি বাণিজ্যিক জাহাজত আক্ৰমণৰো তীব্র গৰিহণা দিছে ভাৰতে। আনহাতে, বিগত কেইদিনমানৰ আক্ৰমণত কেইবাজনো ভাৰতীয়ই প্রাণ হেৰুওৱাৰ লগতে কেইবাজনো সন্ধানহীন হৈ থকা বুলিও বিদেশ মন্ত্ৰালয়ে জনাইছে।
তেনে পৰিস্থিতিত ভাৰতে কূটনৈতিক আলোচনাৰ আহ্বান জনাইছে। বিবৃতিটোত লিখিছে, “আমি এই সংঘাতৰ অতি সোনকালে ইতি পেলাব বিচাৰিছোঁ। ইতিমধ্যে বহু লোকে প্রাণ হেৰুৱাইছে। তাৰ বাবে আমি দুঃখিত।”
