নিউয়ৰ্কৰ ভাৰতীয় মূলৰ মেয়ৰ জোহৰান মামদানীক লৈ অসন্তুষ্ট নতুন দিল্লী। শেহতীয়াকৈ মামদানীয়ে ভাৰতৰ কাৰাগাৰত বন্দী ওমৰ খালিদলৈ (Omar Khalid) এখন পত্ৰ লিখিছিল। সেইবাবেই অসন্তুষ্ট ভাৰত চৰকাৰ। লগতে ভাৰতৰ ন্যায়িক ব্যৱস্থা সন্দৰ্ভতো তেওঁলৈ এক বলিষ্ঠ বাৰ্তা দিয়া হৈছে।
উল্লেখ্য যে ওমৰৰ পিতৃ-মাতৃয়ে যোৱা ডিচেম্বৰ মাহত আমেৰিকাত মামদানীক লগ পাইছিল। সেই সময়ত মামদানীয়ে ওমৰক সমৰ্থন কৰি নিজ হাতেৰে এখন চুটি পত্ৰ লিখিছিল। নিউয়ৰ্কৰ মেয়ৰে লিখা এই পত্ৰখন কিছুদিন পূৰ্বে ৰাজহুৱা হয়।
ওমৰৰ জামিন গোচৰৰ শুনানিৰ পূৰ্বে উচ্চতম ন্যায়ালয়ত ওমৰৰ প্ৰেমিকা বনজ্যোৎস্না লাহিৰীয়ে দাখিল কৰা এই পত্ৰ ছ’চিয়েল মিডিয়াত প্ৰকাশ কৰে। ইয়াৰ পিছতে আৰম্ভ হয় বিতৰ্ক।
শুকুৰবাৰে ভাৰতীয় বৈদেশিক মন্ত্ৰালয়ৰ মুখপাত্ৰ ৰণধীৰ জয়ছোৱালক সাংবাদিকৰ মুখামুখি হোৱাত মামদানীৰ পত্ৰৰ বিষয়ে সোধা হয়।
তেওঁ মামদানীৰ নাম উল্লেখ নকৰাকৈ কয়, “আমি আশা কৰিছোঁ যে জনপ্ৰতিনিধিসকলে আন দেশৰ গণতন্ত্ৰৰ ন্যায়িক ব্যৱস্থাক সন্মান কৰিব। বিশেষকৈ বিশেষ পদত থকাসকলে ব্যক্তিগত পক্ষপাতিত্ব প্ৰকাশ কৰাটো উপযুক্ত নহয়। তেওঁলোকে এনে মন্তব্য কৰাৰ পৰিৱৰ্তে নিজৰ কৰ্তব্য পালনত মনোনিবেশ কৰিব লাগে।” উল্লেখ্য যে দিল্লীৰ জৱাহৰলাল নেহৰু বিশ্ববিদ্যালয়ৰ প্ৰাক্তন ছাত্ৰ নেতা ওমৰক ২০২০ চনত গ্ৰেপ্তাৰ কৰা হৈছিল।
দিল্লী আৰক্ষীৰ অভিযোগ যে ২০২০ চনৰ দিল্লী হিংসাৰ অন্যতম মূল ষড়যন্ত্ৰকাৰী আছিল ওমৰ। আন এজন প্ৰাক্তন ছাত্ৰ নেতা শ্বাৰ্জিল ইমামো তেওঁৰ সৈতে জে’লত আছে। সোমবাৰে উচ্চতম ন্যায়ালয়ত তেওঁলোকৰ জামিন গোচৰৰ শুনানি গ্ৰহণ কৰা হয়। উচ্চতম ন্যায়ালয়ে ৭ অভিযুক্তৰ ভিতৰত ৫ জনক জামিন মঞ্জুৰ কৰিছে।
ওমৰ আৰু শ্বাৰ্জিলে জামিন লাভ কৰা নাই। কমেও এবছৰৰ পাছত পুনৰ জামিনৰ বাবে আবেদন কৰিব পাৰিব বুলি আদালতে জানিবলৈ দিয়ে। এই গোচৰৰ একাংশ সুৰক্ষিত সাক্ষীৰ জেৰা এতিয়াও বাকী আছে। যদি সেই জেৰা এবছৰৰ আগতে সম্পূৰ্ণ হয়, তেন্তে নতুন জামিন আবেদন দাখিল কৰিব পাৰিব।
মামদানীয়ে ওমৰলৈ লিখা পত্ৰখনত লিখিছে, “প্ৰিয় ওমৰ, আপুনি তিক্ততাৰ বিষয়ে কোৱা কথাবোৰ মোৰ প্ৰায়ে মনত পৰে। আপুনি কৈছিল যেন তিক্ততাই যেন কেতিয়াও মানুহৰ সত্তাক গ্ৰাস নকৰে সেয়া অতি প্ৰয়োজনীয়। আপোনাৰ পিতৃ-মাতৃক লগ পাই ভাল লাগিল। আমি সকলোৱে আপোনাৰ কথা ভাবি আছোঁ।” তেওঁৰ এই মন্তব্যতে অসন্তুষ্ট ভাৰত।
