আলিগড় মুছলিম বিশ্ববিদ্যালয় (Aligarh Muslim University)ৰ জ্যেষ্ঠ অধ্যাপিকা (Senior Professor) এগৰাকীয়ে প্ৰায় তিনি দশক ধৰি ধৰ্মীয় বৈষম্য (Religious discrimination) আৰু মানসিক হাৰাশাস্তি (Mental harassment)ৰ সন্মুখীন হোৱাৰ অভিযোগ উত্থাপন (Raise a complaint) কৰিছে। এই অবিৰত হেঁচাত তেওঁৰ ব্যক্তিগত আৰু পেছাদাৰী জীৱনত যথেষ্ট কষ্ট পাইছে বুলি দাবী কৰে। আনকি তেওঁৰ গৰ্ভপাতো হৈছিল।
ৰাজনীতি বিজ্ঞান বিভাগৰ অধ্যাপিকা ৰচনা কৌশলে অভিযোগ কৰিছে যে তেওঁ হিন্দু হোৱাৰ বাবে বিশ্ববিদ্যালয়খনৰ উচ্চ কৰ্তৃপক্ষই তেওঁক লক্ষ্য কৰি লয়। অডিঅ’ ৰেকৰ্ডিং আৰু নথি-পত্ৰৰ সৈতে আনুষ্ঠানিক অভিযোগ উপাচাৰ্যৰ ওচৰত দাখিল কৰি এই বিষয়ত তেওঁ এফ আই আৰ দাখিল কৰাৰ পৰিকল্পনা কৰা বুলিও কয়।
অধ্যাপিকা ৰচনা কৌশলৰ মতে, ১৯৯৮ চনত আলিগড় মুছলিম বিশ্ববিদ্যালয়ত প্ৰবক্তা হিচাপে যোগদান কৰাৰ পিছতে এই হাৰাশাস্তি আৰম্ভ হৈছিল।তেওঁ কয়, “মোৰ নিযুক্তিৰ কম সময়ৰ ভিতৰতে বৈষম্য আৰু মানসিক হাৰাশাস্তি আৰম্ভ হৈছিল। মই কেতিয়াও ভবা নাছিলো যে মোৰ ধৰ্মীয় পৰিচয় মোৰ বিৰুদ্ধে কোনো কেন্দ্ৰীয় বিশ্ববিদ্যালয়ত ব্যৱহাৰ কৰা হ’ব।” ৰচনা কৌশলে অভিযোগ কৰে যে এই হেঁচা বছৰ বছৰ ধৰি অব্যাহত আছিল আৰু জীৱনৰ গুৰুত্বপূৰ্ণ পৰ্যায়ত তীব্ৰতৰ হৈ পৰিছিল। ২০০৪ চনত যমজ সন্তানৰ গৰ্ভৱতী হোৱাৰ সময়ত তেওঁ অত্যধিক কামৰ বোজা আৰু মানসিক চাপৰ সন্মুখীন হৈছিল, যাৰ ফলত তেওঁৰ গৰ্ভপাত হৈছিল। অধ্যাপিকা কৌশলে লগতে কয় যে তেওঁৰ স্বামী ডাঃ ডি এ এম ইউৰ জে এন মেডিকেল কলেজৰ জ্যেষ্ঠ অধ্যাপক পাণ্ডেৰ ২০১২ চনত মৃত্যু হয়।
সমাজ বিজ্ঞান বিভাগৰ বৰ্তমানৰ ডীন অধ্যাপক মহম্মদ নাফিছ আহমেদ আনছাৰীয়েও বাৰে বাৰে তেওঁৰ ধৰ্মক লৈ মন্তব্য কৰাৰ অভিযোগ উত্থাপন কৰিছে অধ্যাপিকাগৰাকীয়ে। ৰচনা কৌশলে অভিযোগ কৰে, “ডীনে মোক কৈছিল, ‘আপুনি হিন্দু, বেনাৰস হিন্দু বিশ্ববিদ্যালয়লৈ যাওক।”
ৰচনাই কয় যে এই মন্তব্য ব্যক্তিগতভাৱে অপমানজনক আৰু বিশ্ববিদ্যালয়খনৰ ধৰ্মনিৰপেক্ষ মূল্যবোধক ক্ষতিগ্ৰস্ত কৰে। এনে মন্তব্যই শত্ৰুতাপূৰ্ণ কৰ্ম পৰিৱেশৰ সৃষ্টি কৰা বুলিও কয় তেওঁ। অধ্যাপিকা ৰচনা কৌশলে এই মন্তব্যৰ অডিঅ’ ৰেকৰ্ডিং প্ৰমাণ হিচাপে উপাচাৰ্য অধ্যাপিকা নাইমা খাতুনক জমা দিছে।
হাৰাশাস্তিৰ অভিযোগ উত্থাপন হোৱাৰ পাছতো অধ্যাপিকা ৰচনা কৌশলে পৰিস্থিতি উন্নত হ’ব বুলি আশা কৰি বছৰ বছৰ ধৰি শিক্ষকতা কৰি থকা বুলি কয়। অৱশ্যে এতিয়া তেওঁৰ মতে আইনী ব্যৱস্থাই সমস্যা সমাধানৰ একমাত্ৰ উপায়। বিষয়টো ৰাজহুৱা কৰি আৰক্ষীৰ কাষ চাপিবলৈ মনস্থ কৰা বুলিও কয় তেওঁ।
ইফালে এ এম ইউ কৰ্তৃপক্ষই অভিযোগ লাভ কৰা বুলি স্বীকাৰ কৰিছে। কৰ্তৃপক্ষই জনোৱা মতে, আভ্যন্তৰীণ তদন্ত আৰম্ভ কৰা হৈছে। বিশ্ববিদ্যালয়খনৰ বা অভিযুক্ত অধ্যাপকৰ পৰা এতিয়ালৈকে কোনো আনুষ্ঠানিক সঁহাৰি পোৱা নাই।
