নাগপুৰৰ পৰা কলকাতা অভিমুখী এয়াৰ ইণ্ডিয়াৰ (Indigo) বিমানত মাজ আকাশত এটা চৰায়ে খুন্দা মাৰে। এই ঘটনাৰ পিছতে মঙলবাৰে পুৱা বিমানখন মহাৰাষ্ট্ৰলৈ ওভতাই নিয়া হয়।
পুৱা প্ৰায় ৭ বজাত নাগপুৰৰ পৰা কলকাতা অভিমুখে উৰা মাৰিছিল এয়াৰ ইণ্ডিয়াৰ ৬ই ৮১২ বিমানখন। কিন্তু বিমানখন উৰণৰ কেইমিনিটমানৰ ভিতৰতে সংঘটিত হয় এই ঘটনা।
ফলত যাত্ৰীসকলৰ সুৰক্ষাৰ কথা মনত ৰাখি বিমানখন পুনৰ নাগপুৰ বিমানবন্দৰলৈ নিয়া হয়। নাগপুৰ বিমানবন্দৰৰ জ্যেষ্ঠ বিমানবন্দৰ সঞ্চালক অবিদ ৰুহীয়ে কয় যে বিমানখনত চৰাইৰ খুন্দা লগাৰ সন্দেহ কৰা হৈছে। অৱশ্যে সঠিকভাৱে কি হৈছিল সেই বিষয়ে তদন্ত কৰিহে বুজিব পৰা যাব। সোমবাৰে মহাৰাষ্ট্ৰৰ পুনেৰ পৰা দিল্লী অভিমুখী স্পাইচজেটৰ বিমান এখনো কাৰিকৰী বিজুতিৰ বাবে উভতিবলগীয়া হৈছিল।
আনহাতে, যোৱা মাহত ইণ্ডিগোৰ এখন বিমানে পাটনা বিমানবন্দৰৰ পৰা উৰণৰ কিছু সময়ৰ পাছতে চৰায়ে খুন্দা মাৰে। অৱশ্যে কোনো ডাঙৰ ঘটনা সংঘটিত হোৱাৰ পৰা ৰক্ষা পৰে। তাৰ পিছত পাটনাত নিৰাপদে অৱতৰণ কৰে যাত্ৰীসকলে।
