কেন্দ্ৰীয় চৰকাৰে ৰাজ্যিক দুৰ্যোগ প্ৰশমন পুঁজি চমুকৈ এছ ডি আৰ এফৰ পৰা দেশৰ ছয় ৰাজ্যলৈ প্ৰদান কৰিছে বান সাহায্য (Flood Relief)। বান আৰু ভূমিস্খলনত ক্ষতিগ্ৰস্ত ৰাজ্যকেইখনলৈ এই সাহায্য প্ৰদান কৰা হৈছে।
বৃহস্পতিবাৰে কেন্দ্ৰই মুঠ ছখন ৰাজ্যলৈ ১,০৬৬.৮০ কোটি টকা মুকলি কৰি দিয়ে। ৰাজ্যকেইখন হৈছে অসম, মণিপুৰ, মেঘালয়, মিজোৰাম, কেৰালা আৰু উত্তৰাখণ্ড।
ইয়াৰে ভিতৰত অসমে লাভ কৰিছে ৩৭৫.৬০ কোটি টকাৰ কেন্দ্ৰীয় বান সাহায্য । আনহাতে, মণিপুৰে ২৯.২০ কোটি, মেঘালয়ে ৩০.৪০ কোটি, মিজোৰামে ২২.৮০ কোটি, কেৰালাই ১৫৩.২০ কোটি আৰু উত্তৰাখণ্ডে লাভ কৰিছে ৪৫৫.৬০ কোটি টকাৰ এছ ডি আৰ এফৰ কেন্দ্ৰীয় খণ্ডৰ সাহায্য।
ইয়াৰ উপৰি কেন্দ্ৰই ইতিমধ্যে এছ ডি আৰ এফৰ পৰা ১৪ খন ৰাজ্যক ৬,১৬৬.০০ কোটি আৰু এন ডি আৰ এফৰ পৰা ১২ খন ৰাজ্যক ১,৯৮৮.৯১ কোটি টকা প্ৰদান কৰা বুলি কেন্দ্ৰীয় চৰকাৰৰ সূত্ৰত প্ৰকাশ।
আনহাতে, ৰাজ্যিক দুৰ্যোগ প্ৰশমন পুঁজিৰ পৰা ৫ খন ৰাজ্যলৈ ৭২৬.২০ কোটি টকা আৰু ৰাষ্ট্ৰীয় দুৰ্যোগ প্ৰশমন পুঁজিৰ পৰা দুখন ৰাজ্যলৈ ১৭.৫৫ কোটি টকা মুকলি কৰি দিয়া হৈছে।
