১১এ (11A) । ইউৰোপীয়সকলে কয় যে বয়িং বিমানৰ এই আসনত যাত্ৰা কৰিলে ভ্ৰমণৰ আমেজ নষ্ট হয়। এই আসনক ‘উইণ্ডোলেছ উইণ্ডো ছীট’ বুলি কোৱা হয়। আচলতে ১১এৰ কাষত কোনো খিৰিকী নাই। বিমানখনৰ বেৰখন আছে।
আৰু সেইবাবেই যাত্ৰীসকলে আসনখন একেবাৰেই ভাল নাপায়। কিন্তু এয়াৰ ইণ্ডিয়াৰ আহমেদাবাদ-লণ্ডন অভিমুখী বয়িং বিমানৰ সেই আসনত বহিয়ে বিশ্বকুমাৰ ৰমেশৰ জীৱন ৰক্ষা পৰে।
বিমানখনত থকা ২৪২ জন লোকৰ ভিতৰত তেওঁ একমাত্ৰ জীৱিত ব্যক্তি। ইয়াৰ পিছতে প্ৰশ্ন উত্থাপন হৈছে, বয়িং বিমানৰ আটাইতকৈ অপছন্দৰ আসনখনেই আটাইতকৈ নিৰাপদ নেকি? ব্ৰিটেইনৰ প্ৰাক্তন প্ৰধানমন্ত্ৰী ঋষি সুনকেও ছচিয়েল মিডিয়াত এই প্ৰশ্ন উত্থাপন কৰে।
বৃহস্পতিবাৰে দিনৰ ১.৩৮ বজাত লণ্ডনৰ গেটৱিক অভিমুখী এয়াৰ ইণ্ডিয়াৰ বিমানখনে আহমেদাবাদৰ চৰ্দাৰ বল্লভভাই পেটেল বিমানবন্দৰৰ পৰা উৰা মাৰিছিল। উৰণৰ পাঁচ মিনিটৰ পাছত আহমেদাবাদৰ মেঘনীনগৰত দুৰ্ঘটনাগ্ৰস্ত হয়।
বিমানখনত থকা ২৪২ জন লোকৰ ভিতৰত ২৪১ জনৰ মৃত্যু হয়। ১১এ আসনৰ ৰমেশ মাথোঁ জীয়াই আছে। তেওঁৰ জীয়াই থকাক সমগ্ৰ বিশ্বই ‘অলৌকিক’ বুলি গণ্য কৰে। ছচিয়েল মিডিয়া ব্যৱহাৰকাৰীসকলে এতিয়া বয়িং বিমানৰ আটাইতকৈ বিৰক্তিকৰ আসনখনক আটাইতকৈ ‘সুৰক্ষিত’ বুলি অভিহিত কৰিছে।
যদিও বয়িং ৭৩৭-৯০০ আৰু ৯০০ ইআৰত ১১এ ছিট খিৰিকীৰ কাষতে আছে, তথাপিও ইয়াৰ কাষত কোনো খিৰিকী নাই। সেইবাবেই ইয়াক ‘উইণ্ডোলেছ উইণ্ডো ছীট’ বুলি কোৱা হয়। এয়াৰ কণ্ডিচনাৰ সঁজুলিৰ গাঁথনি আৰু আন্তঃগাঁথনিৰ বাবে ১১এ আসনৰ কাষত কোনো খিৰিকী নাই।
৯এ, ১০এ, ১২এ আসনতো এই সমস্যা আছে। সকলো বয়িং ৭৩৭ বিমানৰ একে সমস্যা। আৰু যাত্ৰীসকলে ইয়াক লৈ প্ৰায়ে ছচিয়েল মিডিয়াত নিজৰ ক্ষোভ প্ৰকাশ কৰে। তেওঁলোকৰ বহুতেই অজানিতে এই আসনখন বুকিং কৰে। খিৰিকীৰ কাষৰ আসনত বহি যাত্ৰা কৰিব বুলি ভাবে যদিও বাস্তৱত ইয়াৰ বিপৰীত হয়।
বহুতে ইয়াক লৈ ধেমালিও কৰে। বয়িং বিমানত এই ১১এ আসনৰ আন কিছু অসুবিধাও আছে। উদাহৰণস্বৰূপে, এই আসনৰ কাষতে প্ৰায়ে খাদ্য আৰু চাহৰ বাবে ট্ৰলী এখন থাকে। ফ্লাইট এটেণ্ডেণ্টসকলৰ তাত গোটেই ৰাতি কিছু কাম থাকে। ফলত তাত বহাজনৰ অসুবিধা হয়।
বিজনেছ ক্লাছ শেষ হোৱাৰ পিছত এই ১১এৰ পৰা বিমানখনৰ ইকনমী ক্লাছ আৰম্ভ হয়। সেইবাবেই এই আসনৰ সন্মুখত অলপ বেছি ঠাই আছে। ভৰি দুখন মেলি বহিব পাৰি। সেইবাবেই বহু সময়ত শিশুৰ সৈতে যাত্ৰা কৰা যাত্ৰীসকলক এই আসন দিয়া হয়। মুঠৰ ওপৰত এই আসনত যাত্ৰা বৰ ‘সুখদায়ক’ নহয়।
