মহাৰাষ্ট্ৰৰ নাগপুৰত এগৰাকী যুৱতীয়ে আত্মহত্যা কৰে। তেওঁৰ শোকত ভাগি পৰা ওচৰ-চুবুৰীয়া আৰু পৰিয়ালৰ লোকে তেওঁৰ মৃতদেহ লৈ শ্মশানলৈ নি অন্ত্যেষ্টিক্ৰিয়া আৰম্ভ কৰে। ঠিক তেতিয়াই যুৱতীগৰাকীৰ প্ৰেমিক তাত উপস্থিত হয়। শোকাকুল পৰিৱেশত যুৱকজনক কোনেও লক্ষ্য কৰা নাছিল।
কিন্তু হঠাতে প্ৰেমিকাৰ চিতাৰ জুইৰ সন্মুখত তেওঁ ঘূৰিবলৈ ধৰে । কোনোৱে একো বুজি পোৱাৰ পূৰ্বেই তেওঁ সকলোৰে সন্মুখত জ্বলি থকা চিতাৰ জুইত জঁপিয়াই পৰিবলৈ চেষ্টা কৰে। কিন্তু তাৰ পূৰ্বে শ্মশানত থকা লোকসকলে তেওঁক ধৰে।
আৰক্ষীৰ সূত্ৰ অনুসৰি, যুৱকজনক ধৰি মাৰপিট কৰাৰ অভিযোগ উত্থাপন হৈছে। সোমবাৰে সন্ধিয়া ৪ বজাত শ্মশানত উপস্থিত হয় ২৭ বছৰীয়া অনুৰাগ ৰাজেন্দ্ৰ মেশ্ৰম। স্থানীয় সূত্ৰৰ পৰা জানিব পৰা মতে, অনুৰাগৰ মৃত্যু হোৱা যুৱতীগৰাকীৰ সৈতে প্ৰেমৰ সম্পৰ্ক আছিল।
প্ৰেমিকাৰ মৃত্যুৰ খবৰ পাই অনুৰাগ শ্মশানত উপস্থিত হয়। ইয়াৰ পিছত তেওঁ নিজেও আত্মহত্যাৰ চেষ্টা চলায়। কিন্তু তাত উপস্থিত ৰাইজৰ প্ৰচেষ্টাত তেওঁৰ এই প্ৰচেষ্টা বিফল হয়। ইয়াৰ পিছতে যুৱকজনক প্ৰহাৰ কৰাৰ অভিযোগ।
আৰক্ষীয়ে জনোৱা মতে, যুৱতীগৰাকীৰ আত্মহত্যাৰ কাৰণ এতিয়াও স্পষ্ট হোৱা নাই। প্ৰেমৰ বাবেই আত্মহত্যা কৰিছিল নে আন কিবা কাৰণ তাৰ তদন্ত অব্যাহত ৰাখিছে আৰক্ষীয়ে। অনুৰাগক গ্ৰেপ্তাৰ কৰিছে আৰক্ষীয়ে। তেওঁকো জেৰা অব্যাহত ৰাখিছে। যুৱতীগৰাকীৰ মৃত্যুৰ আঁৰত অনুৰাগ আছে নেকি সেই বিষয়েও আৰক্ষীয়ে জানিবলৈ চেষ্টা চলাইছে।
